ನವದೆಹಲಿ: ಭಾರತದ ಮಕ್ಕಳ ಬೆತ್ತಲೆ ಹಾಗೂ ಅಶ್ಲೀಲ ಚಿತ್ರಗಳನ್ನು ಕೇಳಿ ಪಡೆಯುತ್ತಿದ್ದ ಲಂಡನ್ ಶಿಕ್ಷಕನಿಗೆ 12 ವರ್ಷಗಳ ಜೈಲುಶಿಕ್ಷೆ ಆಗಿದೆ. ಲಂಡನ್ನ ಸೌತ್ವಾರ್ಕ್ ಕ್ರೌನ್ ಕೋರ್ಟ್ ಈತನಿಗೆ ಇಂದು ಈ ಶಿಕ್ಷೆಯನ್ನು ವಿಧಿಸಿದೆ.
ಈಸ್ಟ್ ಡಲ್ವಿಚ್ನ ಮ್ಯಾಥ್ಯೂ ಸ್ಮಿತ್ (35) ಶಿಕ್ಷೆಗೊಳಗಾದ ಅಪರಾಧಿ. ಲಂಡನ್ನ ಶಾಲೆಯೊಂದರಲ್ಲಿ ಈತ ಉಪ ಮುಖ್ಯೋಪಾಧ್ಯಾಯ ಆಗಿ ಕೆಲಸ ಮಾಡುತ್ತಿದ್ದ. ಈತನನ್ನು 2022ರ ನವೆಂಬರ್ನಲ್ಲಿ ನ್ಯಾಷನಲ್ ಕ್ರೈಮ್ ಏಜೆನ್ಸಿ (ಎನ್ಸಿಎ) ಬಂಧಿಸಿತ್ತು.
ಈತ ಭಾರತದ ಹದಿಹರೆಯದವರನ್ನು ಸಂಪರ್ಕಿಸಿ ಅವರಿಗಿಂತ ಚಿಕ್ಕ ಮಕ್ಕಳ ಬೆತ್ತಲೆ ಇಲ್ಲವೇ ಅಶ್ಲೀಲ ಫೋಟೋಗಳನ್ನು ಕಳಿಸುವಂತೆ ಹೇಳುತ್ತಿದ್ದ. ಅಲ್ಲದೆ ಅದಕ್ಕೆ ಪ್ರತಿಯಾಗಿ ಹಣ ನೀಡುವ ಆಮಿಷವೊಡ್ಡುತ್ತಿದ್ದ. ಆನ್ಲೈನ್ನಲ್ಲಿ ಇಂಥ ಕೆಲಸವನ್ನು ಮಾಡುತ್ತಿದ್ದಾಗಲೇ ಈತ ಸಿಕ್ಕಿಬಿದ್ದಿದ್ದು, ಬಂಧಿಸಲ್ಪಟ್ಟಿದ್ದ.
ಮಕ್ಕಳ ಲೈಂಗಿಕ ಶೋಷಣೆಗೆಂತೆಲೇ ಈತ ಡಾರ್ಕ್ ವೆಬ್ ಸೈಟ್ಗಳನ್ನು ಹೊಂದಿದ್ದ. ಮಕ್ಕಳ ಚಿತ್ರಗಳನ್ನು ಪಡೆದುಕೊಂಡು ಅವುಗಳಿಗೆ ಅಪ್ಲೋಡ್ ಮಾಡುತ್ತಿದ್ದ. ಮಕ್ಕಳ ಜೊತೆ ಹೇಗೆ ಲೈಂಗಿಕವಾಗಿ ನಡೆದುಕೊಳ್ಳಬೇಕು ಎಂಬ ಬಗ್ಗೆ ಹದಿಹರೆಯದವರಿಗೆ ಸೂಚನೆ ನೀಡುತ್ತಿದ್ದ ಈತ ಅದಕ್ಕೆ ಪೂರಕವಾಗಿ ಕೆಲ ಫೋಟೋ/ವಿಡಿಯೋ ಕಳಿಸಿ ಅದೇ ರೀತಿ ವರ್ತಿಸಿ ಫೋಟೋ/ವಿಡಿಯೋ ಕಳಿಸುವಂತೆ ಹೇಳುತ್ತಿದ್ದುದರ ಕುರಿತು ಕೂಡ ದಾಖಲೆ ಸಿಕ್ಕಿದೆ.
ಅಲ್ಲದೆ ಮಕ್ಕಳನ್ನು ಲೈಂಗಿಕವಾಗಿ ಬಳಸಿಕೊಳ್ಳುವ ನಿಟ್ಟಿನಲ್ಲಿ ಹೇಗೆ ಅವರ ಸ್ನೇಹ ಗಳಿಸಬೇಕು ಎನ್ನುವ ಕುರಿತು ಕೂಡ ಈತ ಮಾರ್ಗದರ್ಶನ ನೀಡುತ್ತಿದ್ದ. ಈತ ಭಾರತದ ನೇಪಾಳದಲ್ಲಿ ಬಹಳಷ್ಟು ಕಾಲ ಇರುತ್ತಿದ್ದು, ಅಲ್ಲಿದ್ದಾಗ ಇಂಥ ಅಪರಾಧ ಎಸಗಿದ್ದ. ಇದಕ್ಕೂ ಮೊದಲು ಈತ 2007-14ರ ಅವಧಿಯಲ್ಲಿ ಭಾರತದ ವಿವಿಧ ಅನಾಥಾಶ್ರಮ ಹಾಗೂ ಎನ್ಜಿಒಗಳಲ್ಲಿ ಕೆಲಸ ಮಾಡಿದ್ದ.
ಸ್ಮಿತ್ನ ಲ್ಯಾಪ್ಟಾಪ್, ಎಸ್ಡಿ ಕಾರ್ಡ್ ಹಾಗೂ ಮೊಬೈಲ್ಫೋನ್ಗಳಲ್ಲಿ ಸೇವ್ ಆಗಿದ್ದ ಮಕ್ಕಳ 1.2 ಲಕ್ಷಕ್ಕೂ ಅಧಿಕ ಫೋಟೋಗಳನ್ನು ಅಧಿಕಾರಿಗಳು ವಶಕ್ಕೆ ಪಡೆದುಕೊಂಡಿದ್ದರು. 13 ವರ್ಷ ಕೆಳಗಿನ ಮಕ್ಕಳ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸುವಂತೆ ಪ್ರೇರೇಪಿಸಿದ್ದ ಹಲವು ಪ್ರಕರಣಗಳು ಈತನ ಮೇಲಿವೆ. -ಏಜೆನ್ಸೀಸ್