ಬೆಂಗಳೂರು: ಮಹಿಳೆ ಜತೆ ಡೇಟಿಂಗ್ ಮಾಡುವ ತವಕದಲ್ಲಿ ವೆಬ್ಸೈಟ್ಗಳನ್ನು ಜಾಲಾಡಿದ್ದ 47 ವರ್ಷದ ವ್ಯಕ್ತಿಯೊಬ್ಬನ ಮೊಬೈಲ್ಗೆ ಬಂದ ಕರೆ ಸುಮಾರು 1 ಲಕ್ಷ ರೂ. ಲಪಟಾಯಿಸಿದೆ!
ನಗರದ ಖಾಸಗಿ ಕಂಪನಿಯಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಜೆ.ಪಿ.ನಗರದ ವಾಸೀಂ ಪಾಷಾ ಇತ್ತೀಚೆಗೆ ಅಂತಾರ್ಜಾಲದಲ್ಲಿರುವ ಕೆಲ ಡೇಟಿಂಗ್ ವೆಬ್ಸೈಟ್ಗಳಿಗೆ ಭೇಟಿ ನೀಡಿ ಡೇಟಿಂಗ್ ನಡೆಸಲು ಇಚ್ಛೆ ಹೊಂದಿರುವ ಮಹಿಳೆಯನ್ನು ಹುಡುಕುತ್ತಿದ್ದರು.
ಜು.14ರಂದು ವಾಸೀಂ ಮೊಬೈಲ್ಗೆ ಕರೆ ಮಾಡಿದ್ದ ಅಪರಿಚಿತರು, 'ನೀವು ಡೇಟಿಂಗ್ ವೆಬ್ಸೈಟ್ಗಳಲ್ಲಿ ಹುಡುಕಾಟ ನಡೆಸಿರುವುದು ನಮ್ಮ ಗಮನಕ್ಕೆ ಬಂದಿದೆ. ನಿಮಗೆ ಮಹಿಳೆಯೊಬ್ಬರ ಜತೆ ಡೇಟಿಂಗ್ ನಡೆಸಲು ಅವಕಾಶ ಕೊಡಿಸುತ್ತೇವೆ. ಆದರೆ, ಇದಕ್ಕಿಂತ ಮೊದಲು ನಮ್ಮ ಬ್ಯಾಂಕ್ ಖಾತೆಗೆ ಹಣ ಜಮೆ ಮಾಡಬೇಕಾಗುತ್ತದೆ. ಹಣವನ್ನು ಮಹಿಳೆಗೆ ನೀಡಿದ ನಂತರ ಅವರನ್ನು ನಿಮ್ಮ ಜತೆ ಕಳಿಸಿಕೊಡಲಾಗುವುದು' ಎಂದು ಹೇಳಿದ್ದರು.
ಅವರ ಮಾತಿಗೆ ಮರುಳಾದ ವಾಸೀಂ, ಮೊದಲಿಗೆ ಸ್ವಲ್ಪ ಹಣ ಜಮೆ ಮಾಡಿದ್ದರು. ಇಷ್ಟಕ್ಕೆ ಸುಮ್ಮನಾಗದ ಅಪರಿಚಿತರು, 'ಮೊದಲು ನಾವು ಹೇಳಿದಷ್ಟು ಹಣ ಜಮೆ ಮಾಡಿದರೆ, ನಂತರದಲ್ಲಿ ಉಳಿದ ಹಣವನ್ನು ನಿಮಗೆ ಹಿಂತಿರುಗಿಸಲಾಗುವುದು' ಎಂದು ಹೇಳಿದ್ದರು. ಅಪರಿಚಿತರ ಈ ಷರತ್ತಿಗೂ ಒಪ್ಪಿಗೆ ಸೂಚಿಸಿದ ವಾಸೀಂ ಗೂಗಲ್ ಪೇ ಮೂಲಕ ಹಂತ ಹಂತವಾಗಿ ಒಟ್ಟು 99,700 ರೂ.ನ್ನು ಅಪರಿಚಿತರ ಖಾತೆಗೆ ಜಮೆ ಮಾಡಿದ್ದರು.
ಇದನ್ನೂ ಓದಿರಿ ತೋಟದ ಮನೆಯಲ್ಲಿ ಸೆಕ್ಸ್ ಮಾಡುತ್ತಿರುವಾಗಲೇ ಮಹಿಳೆ ಮತ್ತು ಯುವಕನನ್ನು ಬರ್ಬರವಾಗಿ ಕೊಚ್ಚಿ ಹಾಕಿದ ಅಜ್ಜ-ಮೊಮ್ಮಗ!
ಇದಾದ ಬಳಿಕ ಅವರು ಯಾವುದೇ ಡೇಟಿಂಗ್ ಸರ್ವೀಸ್ ಕೊಡದೆ, ಹಣವನ್ನೂ ಹಿಂತಿರುಗಿಸದೆ ಇನ್ನಷ್ಟು ಹಣಕ್ಕೆ ಬೇಡಿಕೆಯಿಟ್ಟಿದ್ದರು. ಅನುಮಾನಗೊಂಡ ವಾಸೀಂ, ಅಪರಿಚಿತರ ಮೊಬೈಲ್ಗೆ ಕರೆ ಮಾಡಿದಾಗ ಸ್ವಿಚ್ಡ್ ಆಫ್ ಆಗಿತ್ತು. ಪರಿಚಿತರ ಸಲಹೆ ಮೇರೆಗೆ ದಕ್ಷಿಣ ಸಿಇಎನ್ ಸೈಬರ್ ಕ್ರೈಂ ಠಾಣೆಗೆ ದೂರು ನೀಡಿದ್ದಾರೆ.
ನಕಲಿ ವೆಬ್ಸೈಟ್ ಸೃಷ್ಟಿಸಿ ವಂಚಿಸುವ ಜಾಲ ದೇಶಾದ್ಯಂತ ಬೇರೂರಿದೆ. ಸೈಬರ್ ಕಳ್ಳರ ಮಾತಿಗೆ ಮರುಳಾಗಿ ಒಮ್ಮೆ ಹಣ ಪಾವತಿಸಿದರೆ ಮತ್ತೆ ಆ ಹಣ ನಿಮ ಕೈ ಸೇರುವುದಿಲ್ಲ. ಈ ಜಾಲಕ್ಕೆ ಸಿಲುಕಿ ಹಣ ಕಳೆದುಕೊಂಡ ಹಲವರು ಠಾಣೆ ಮೆಟ್ಟಿಲೇರಲು ಹಿಂದೇಟು ಹಾಕುತ್ತಿದ್ದು, ಹಲವು ಪ್ರಕರಣಗಳು ಬೆಳಕಿಗೆ ಬರುತ್ತಿಲ್ಲ. ಈ ಬಗ್ಗೆ ಜನರು ಜಾಗ್ರತೆ ವಹಿಸಬೇಕಿದೆ.