ನವದೆಹಲಿ: ನಡುವಿಗೆ ಸೂಸೈಡ್ ವೆಸ್ಟ್ ಕಟ್ಟಿಕೊಂಡಿರುವ ವ್ಯಕ್ತಿಯೊಬ್ಬನ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ರಾಷ್ಟ್ರೀಯ ತನಿಖಾ ದಳ ನಡೆಸಿದ ದಾಳಿಯ ವೇಳೆ ಭಾರಿ ಪ್ರಮಾಣದ ಸೂಸೈಡ್ ವೆಸ್ಟ್, ಟೈಮ್ ಬಾಂಬ್, ಅಲಾರಂ ಕ್ಲಾಕ್ಸ್, ಮೊಬೈಲ್ ಫೋನ್ಸ್, ಸಿಮ್ ಕಾರ್ಡ್ಸ್ ಮತ್ತು ನಗದನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಫೋಟೋ ಕುರಿತಾಗಿ ಬರೆದಿರುವ ಮಾಹಿತಿ ಸುಳ್ಳೆಂಬುದು ಫ್ಯಾಕ್ಟ್ಚೆಕ್ ಮೂಲಕ ತಿಳಿದುಬಂದಿದೆ.
ರಾಷ್ಟ್ರ ರಾಜಧಾನಿಯಲ್ಲಿ ನಡೆದ ಕೋಮುಗಲಭೆ ಬೆನ್ನಲ್ಲೇ ಫೇಸ್ಬುಕ್ನಲ್ಲಿ ಈ ಪೋಸ್ಟ್ ಕಾಣಿಸಿಕೊಂಡಿದೆ. ಬಳಕೆದಾರ ದೀಪಕ್ ಕುಮಾರ್ ಎಂಬಾತ ಸೂಸೈಡ್ ವೆಸ್ಟ್ ಧರಿಸಿರುವ ವ್ಯಕ್ತಿಯ ಫೋಟೋವನ್ನು ಅಪ್ಲೋಡ್ ಮಾಡಿ ಹಿಂದಿಯಲ್ಲಿ ಬರೆದು ಪೋಸ್ಟ್ ಮಾಡಿದ್ದಾನೆ. ಅದರ ಸಾರ ಈ ರೀತಿ ಇದೆ- ರಾಷ್ಟ್ರೀಯ ತನಿಖಾ ದಳ ಮತ್ತು ಉತ್ತರ ಪ್ರದೇಶ ಪೊಲೀಸರು ದೆಹಲಿಯ ಸೀಲಾಂಪುರ ಮತ್ತು ಉತ್ತರ ಪ್ರದೇಶದ ಅಮ್ರೋಹದ ಕೆಲ ಪ್ರದೇಶಗಳಲ್ಲಿ ವಿದ್ಯಾರ್ಥಿಗಳು, ಗುಮಾಸ್ತರು ಸೇರಿದಂತೆ ಒಟ್ಟು 16 ಮಂದಿಯನ್ನು ಬಂಧಿಸಿದ್ದಾರೆ. ಅಲ್ಲದೆ, ಇದೇ ವೇಳೆ ಭಾರಿ ಪ್ರಮಾಣದ ಸೂಸೈಡ್ ವೆಸ್ಟ್, ಟೈಮ್ ಬಾಂಬ್, ಅಲಾರಂ ಕ್ಲಾಕ್ಸ್, ಮೊಬೈಲ್ ಫೋನ್ಸ್, ಸಿಮ್ ಕಾರ್ಡ್ಸ್ ಮತ್ತು ನಗದನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಬರೆದಿದ್ದಾನೆ.
ಕೊನೆಯಲ್ಲಿ ವಿಶೇಷವಾಗಿ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್ ದೆಹಲಿ ಪ್ರದೇಶಗಳಲ್ಲಿ ಸುತ್ತಾಡಿದ ಕಾರಣದಿಂದಾಗಿ ಇದೆಲ್ಲವು ಸಾಧ್ಯವಾಯಿತು ಎಂದೂ ಉಲ್ಲೇಖಿಸಿದ್ದಾನೆ. ಇತ್ತೀಚೆಗಷ್ಟೇ ನಡೆದ ಈಶಾನ್ಯ ದೆಹಲಿ ಗಲಭೆಯು ಹಿಂಸಾರಕ್ಕೆ ತಿರುಗಿದ್ದರಿಂದ ಭದ್ರತೆಯ ಉಸ್ತುವಾರಿಯನ್ನು ದೋವಲ್ ಅವರಿಗೆ ವಹಿಸಲಾಗಿತ್ತು. ಈ ವೇಳೆ ಅವರು ಗಲಭೆ ಪೀಡಿತ ಅನೇಕ ಪ್ರದೇಶಗಳಲ್ಲಿ ಸುತ್ತಾಡಿ ಸ್ಥಳೀಯರೊಂದಿಗೆ ಮಾತುಕತೆ ನಡೆಸಿದ್ದರು. ಇದು ಅನೇಕ ಮಾಧ್ಯಮಗಳಲ್ಲಿಯು ಪ್ರಸಾರವಾಗಿದೆ.
ಆದರೆ ಫೇಸ್ಬುಕ್ನಲ್ಲಿ ಕಂಡುಬಂದಿರುವ ಮಾಹಿತಿ ಅಕ್ಷರಶಃ ಸುಳ್ಳು ಎಂಬುದು ಇಂಡಿಯಾ ಟುಡೆ ಆ್ಯಂಟಿ ಫೇಕ್ ನ್ಯೂಸ್ ವಾರ್ ನಡೆಸಿದ ಫ್ಯಾಕ್ಟ್ಚೆಕ್ನಲ್ಲಿ ತಿಳಿದುಬಂದಿದೆ. ಸೂಸೈಡ್ ವೆಸ್ಟ್ ಧರಿಸಿರುವ ವ್ಯಕ್ತಿಯ ಫೋಟೋ ಸುಮಾರು 10 ವರ್ಷಗಳಷ್ಟು ಹಿಂದಿನದ್ದಾಗಿದೆ. ಫೋಟೋ ಅಫ್ಘಾನಿಸ್ತಾನಕ್ಕೆ ಸಂಬಂಧಿಸಿದ್ದಾಗಿದೆ. ಇನ್ನು ಎನ್ಐಎ ದಾಳಿಯು ಕೂಡ ಎರಡು ವರ್ಷದ ಹಿಂದೆ ಸಂಭವಿಸಿತ್ತು. ಹೀಗಾಗಿ ಈ ದಾಳಿಗೂ, ವೈರಲ್ ಪೋಟೋಗೂ ದೆಹಲಿ ಹಿಂಸಾಚಾರಕ್ಕೂ ಸಂಬಂಧವೇ ಇಲ್ಲ. ಆದರೂ ಫೋಟೋ ಫೇಸ್ಬುಕ್ನಲ್ಲಿ 200 ಕ್ಕೂ ಹೆಚ್ಚು ಶೇರ್ ಆಗಿದೆ.
ಗೂಗಲ್ ರಿವರ್ಸ್ ಸರ್ಚ್ ಇಂಜಿನ್ನಲ್ಲಿ ನೋಡಿದಾಗ 2010ರಲ್ಲೂ ಈ ಫೋಟೋ ವೈರಲ್ ಆಗಿದೆ. ಫೋಟೋದಲ್ಲಿರುವ ವ್ಯಕ್ತಿ ತಾಲಿವಾನ್ ಸೂಸೈಡ್ ಬಾಂಬರ್. ಆತನನ್ನು ಆಫ್ಘಾನ್ ಭದ್ರತಾ ಪಡೆ ಫರಾಹಾ ಪ್ರಾಂತ್ಯದಲ್ಲಿ ಬಂಧಿಸಿತ್ತು.
ಪೋಸ್ಟ್ ಉಲ್ಲೇಖಿಸಿರುವ ದೆಹಲಿಯ ಸೀಲಾಂಪುರ ಮತ್ತು ಯುಪಿಯ ಅಮ್ರೋಹದಲ್ಲಿ ಎನ್ಐಎ ದಾಳಿಯ ಬಗ್ಗೆ ಜಾಲತಾಣದಲ್ಲಿ ಹುಡುಕಾಡಿದಾಗ ಇದಕ್ಕೆ ಸಂಬಂಧಿಸಿದ್ದ ಸುದ್ದಿ 2018ರಲ್ಲಿ ಅನೇಕ ವೆಬ್ಸೈಟ್ನಲ್ಲಿ ಪ್ರಕಟವಾಗಿರುವುದು ಪತ್ತೆಯಾಗಿದೆ. ಅದರ ಪ್ರಕಾರ ದೆಹಲಿ ಮತ್ತು ಯುಪಿ ಪ್ರದೇಶಗಳಲ್ಲಿ ಪೊಲೀಸರು ದಾಳಿ ಮಾಡಿ ಐಸಿಸ್ಗೆ ಸಬಂಧಿಸಿದ 10 ಮಂದಿಯನ್ನು ಬಂಧಿಸಿದ್ದರು ಎಂದು ವರದಿಯಾಗಿದೆ.
ಹೀಗಾಗಿ ಸದ್ಯದ ದೆಹಲಿ ಗಲಭೆಯೂ ಫೇಸ್ಬುಕ್ನಲ್ಲಿ ವೈರಲ್ ಆಗಿರುವ ಪೋಸ್ಟ್ಗೂ ಯಾವುದೇ ಸಂಬಂಧವಿಲ್ಲ ಎಂದು ಫ್ಯಾಕ್ಟ್ಚೆಕ್ ಮೂಲಕ ತಿಳಿದುಬಂದಿದೆ. (ಏಜೆನ್ಸೀಸ್)