ಹೈದರಾಬಾದ್: ಆಗಸ್ಟ್ 19ರಂದು ಫೇಸ್ಬುಕ್ ಬಳಕೆದಾರರೊಬ್ಬರು ಅಪ್ಲೋಡ್ ಮಾಡಿದ ವಿಡಿಯೋವೊಂದರಲ್ಲಿ ವ್ಯಕ್ತಿಯೊಬ್ಬ ವಧುವಿನ ಕೆನ್ನೆಗೆ ಚುಂಬಿಸುತ್ತಿರುವ ದೃಶ್ಯವಿದೆ. ವಿಡಿಯೋ ಕುರಿತು ಮೌಲ್ವಿ ಒಬ್ಬರು ವಧುವಿಗೆ ಮುತ್ತಿಟ್ಟರೆಂದು ಅಡಿಬರಹ ಬರೆದು ವೈರಲ್ ಮಾಡಿದ್ದಾರೆ. ಆದರೆ, ಇದು ಅಕ್ಷರಶಃ ಸುಳ್ಳು ಎಂಬುದು ಫ್ಯಾಕ್ಟ್ಚೆಕ್ನಿಂದ ಬಯಲಾಗಿದೆ.
ಇದೇ ವಿಡಿಯೋವನ್ನು ಆಗಸ್ಟ್ 23ರಂದು ಎಬಿಪಿ ನ್ಯೂಸ್ ಜರ್ನಲಿಸ್ಟ್ ಅಸ್ಥ ಕೌಸಿಕ್ ಎಂಬಾತ ತಮ್ಮ ಟ್ವಿಟರ್ನಲ್ಲಿ ಪೋಸ್ಟ್ ಮಾಡಿದ್ದರು. ವಧುವಿನ ತಾಯಿ ಮತ್ತು ಫ್ರೆಂಡ್ಸ್ ಸಹ ಈ ರೀತಿಯಲ್ಲಿ ತಮ್ಮ ಪ್ರೀತಿಯನ್ನು ತೋರಿಸಿಕೊಳ್ಳುವುದಿಲ್ಲ. ಹಿರಿಯರು ಆಶೀರ್ವಾದದ ಮೂಲಕ ತಮ್ಮ ಪ್ರೀತಿಯನ್ನು ತೋರಿಸುತ್ತಾರೆಂದು ವಿಡಿಯೋ ಕುರಿತು ಬರೆದುಕೊಂಡಿದ್ದಾರೆ. ಅದೇ ಟ್ವೀಟ್ 2100 ಕ್ಕೂ ಹೆಚ್ಚು ಬಾರಿ ರೀಟ್ವೀಟ್ ಆಗಿದ್ದು, ವಿಡಿಯೋವನ್ನು 93 ಸಾವಿರಕ್ಕೂ ಹೆಚ್ಚು ಮಂದಿ ವೀಕ್ಷಣೆ ಮಾಡಿದ್ದಾರೆ. ಸುಮಾರು 7 ಸಾವಿರಕ್ಕೂ ಹೆಚ್ಚು ಲೈಕ್ಸ್ಗಳು ಬಂದಿವೆ.
ಆಗಸ್ಟ್ 24ರಂದು ಇದೇ ವಿಡಿಯೋವನ್ನು ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷದ್ (ಎಬಿವಿಪಿ) ಜಂಟಿ ಕಾರ್ಯದರ್ಶಿ ಅನಿಮಾ ಸೋಂಕಾ ಸಹ ಈ ವಿಡಿಯೋವನ್ನು ಶೇರ್ ಮಾಡಿಕೊಂಡಿದ್ದಾರೆ. ಇದಕ್ಕೆ ಕುರಾನ್ನಲ್ಲಿ ಏನನ್ನಬೇಕೋ ಕಾಣೆ? ಮೌಲ್ವಿಯೊಬ್ಬರು ಈ ರೀತಿಯ ವಿಶೇಷ ಆಶೀರ್ವಾದ ನೀಡುವುದು ಸರಿಯೇ? ಪ್ರಖ್ಯಾತ ಟಿವಿ ಕಾರ್ಯಕ್ರಮ ಸತ್ಯಮೇವ ಜಯತೆ ಕಾರ್ಯಕ್ರಮದಲ್ಲೂ ಮಿಸ್ಟರ್ ಜ್ಯಾತ್ಯಾತೀತ ಅಮೀರ್ ಖಾನ್ ಸಹ ಇಸ್ಲಾಮಿಕ್ ಸಮಾಜದಲ್ಲಿರುವ ಸಾಮಾಜಿಕ ವಿರೋಧಿ ಆಚರಣೆಗಳನ್ನು ತೋರಿಸುವುದಿಲ್ಲ ಎಂದು ಬರೆದುಕೊಂಡಿದ್ದಾರೆ.
ಫ್ಯಾಕ್ಟ್ಚೆಕ್ನಲ್ಲಿ ಅಸಲಿಯತ್ತು ಬಹಿರಂಗ!
ಕೆಲವರು ಹೇಳುವಂತೆ ಹಾಗೂ ಬಹುತೇಕರು ನಂಬಿರುವಂತೆ ವೈರಲ್ ವಿಡಿಯೋದಲ್ಲಿರುವುದು ಮೌಲ್ವಿಯಲ್ಲ ಎಂಬುದು ನ್ಯೂಸ್ ಮೀಟರ್ ವೆಬ್ಸೈಟ್ ನಡೆಸಿದ ಫ್ಯಾಕ್ಟ್ಚೆಕ್ನಲ್ಲಿ ಬಹಿರಂಗವಾಗಿದೆ. ವಧುವಿನ ಕೆನ್ನೆಗೆ ಮುತ್ತಿಡುತ್ತಿರುವ ವ್ಯಕ್ತಿ ಆಕೆಯ ತಂದೆ ಎನ್ನುವುದೇ ಸತ್ಯ. ಆಗಸ್ಟ್ 19ರಂದು ಇಸ್ಲಮಾಬಾದ್ ಸ್ಟೈಲ್ ಐಕಾನ್ ಎಂಬ ಫೇಸ್ಬುಕ್ ಪೇಜ್ನಲ್ಲಿ ಇದೇ ವಿಡಿಯೋವನ್ನು ಅಪ್ಲೋಡ್ ಮಾಡಲಾಗಿದೆ. ನನ್ನ ಮಗಳು ಹೊಸ ಜೀವನವನ್ನು ಪ್ರಾರಂಭಿಸುತ್ತಿದ್ದಾಳೆ. ಅವಳ ಪರವಾಗಿ ಆಕೆಯ ತಂದೆ ಯಾವಾಗಲು ಜತೆಗಿರುತ್ತಾನೆಂದು ಅವಳಿಗೆ ತಿಳಿಯಬೇಕೆಂದು ಬಯಸುತ್ತೇನೆಂದು ವಿಡಿಯೋ ಕುರಿತು ಬರೆಯಲಾಗಿದೆ.
ವಧುವಿನ ಫೋಟೋಗ್ರಫಿ ಮಾಡಿದ ಪಾಕಿಸ್ತಾನ ಮೂಲದ zamalsamanphotography ಎಂಬ ಕಂಪನಿಯು ತನ್ನ ಇನ್ಸ್ಟಾಗ್ರಾಂ ಪೇಜ್ನಲ್ಲಿಯೂ ಇದೇ ವಿಡಿಯೋವನ್ನು ಪೋಸ್ಟ್ ಮಾಡಿದೆ. ಆದರೂ ವಿಡಿಯೋ ಮಾತ್ರ ತಪ್ಪು ಸಂದೇಶದೊಂದಿಗೆ ವೈರಲ್ ಆಗಿದ್ದು, ಇದೀಗ ಇನ್ಸ್ಟಾಗ್ರಾಂ ಪೇಜ್ನಿಂದ ವಿಡಿಯೋ ತೆಗೆಯುವಂತೆ ಒತ್ತಾಯಿಸಲಾಗುತ್ತಿದೆ. ಅಲ್ಲದೆ, ಜಾಲತಾಣದಲ್ಲಿ ವೈರಲ್ ಆಗಿರುವ ವಿಡಿಯೋ ಕುರಿತು ಹರಿದಾಡುತ್ತಿರುವ ಸುದ್ದಿ ಸುಳ್ಳೆಂದು ಸಹ ಇನ್ಸ್ಟಾಗ್ರಾಂನಲ್ಲಿ ಪೇಜ್ನಲ್ಲಿ ಸ್ಪಷ್ಟನೆಯನ್ನು ನೀಡಲಾಗಿದೆ.
ಇನ್ನು ವಿಡಿಯೋ ಪೋಸ್ಟ್ ಮಾಡಿದ ಫೇಸ್ಬುಕ್ ಬಳಕೆದಾರನಿಗೆ ತಾನು ಮಾಡಿದ ತಪ್ಪಿನ ಅರಿವಾಗಿ ಇದೀಗ ವಿಡಿಯೋವನ್ನು ಡಿಲೀಟ್ ಮಾಡಿದ್ದಾರೆ. ಅಲ್ಲದೆ, ತನ್ನ ತಪ್ಪಿಗೆ ಕ್ಷಮೆಯನ್ನು ಯಾಚಿಸಿದ್ದಾರೆ. ವಧುವಿನ ತಂದೆ ಎಂದು ನನಗೆ ತಿಳಿದಿರಲಿಲ್ಲ ಎಂದು ಸ್ಪಷ್ಟನೆ ನೀಡಿದ್ದಾರೆ. ಆದರೆ, ವಿಡಿಯೋ ಅದಾಗಲೇ ವೈರಲ್ ಆಗಿ, 251ಕ್ಕೂ ಹೆಚ್ಚು ಬಾರಿ ಶೇರ್ ಆಗಿ, 450 ಕ್ಕೂ ಹೆಚ್ಚು ಕಮೆಂಟ್ಗಳನ್ನು ಪಡೆದುಕೊಂಡಿದೆ. ಆದರೆ, ಸುದ್ದಿ ನಕಲಿ ಎಂಬುದು ಫ್ಯಾಕ್ಟ್ಚೆಕ್ ಬಹಿರಂಗ ಪಡಿಸಿದೆ. (ಏಜೆನ್ಸೀಸ್)