ನ್ಯೂಯಾರ್ಕ್: 51 ನೇ ಅಂತಾರಾಷ್ಟ್ರೀಯ ಎಮ್ಮಿ ಪ್ರಶಸ್ತಿ ಸಮಾರಂಭ ಸೋಮವಾರ ರಾತ್ರಿ ನ್ಯೂಯಾರ್ಕ್ ನಗರದಲ್ಲಿ ಅದ್ದೂರಿಯಾಗಿ ನಡೆದಿದ್ದು, ಭಾರತೀಯ ಚಿತ್ರರಂಗದ ಪ್ರಸಿದ್ಧ ನಿರ್ಮಾಪಕಿ ಹಾಗೂ ನಿರ್ದೇಶಕಿಯೂ ಆದ ಏಕ್ತಾ ಕಪೂರ್ ಅವರು ಎಮ್ಮಿ ಅವಾರ್ಡ್ ಸ್ವೀಕರಿಸುವ ಮೂಲಕ ಇತಿಹಾಸವೊಂದನ್ನು ಸೃಷ್ಟಿಸಿದ್ದು, ಇದೀಗ ಅಪಾರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.
ಎಮ್ಮಿ ಅವಾರ್ಡ್ಸ್ 2023ರ ಸಮಾರಂಭದಲ್ಲಿ ಪ್ರಶಸ್ತಿ ಗೆದ್ದು ಬೀಗಿದ ನಿರ್ದೇಶಕಿ ಏಕ್ತಾ ಕಪೂರ್ ಅವರಿಗೆ ದೇಶವ್ಯಾಪಿ ಶ್ಲಾಘನೆ, ಅಭಿನಂದನೆಗಳ ಮಹಾಪೂರವೇ ಹರಿದುಬರುತ್ತಿದೆ. ಮನರಂಜನಾ ಉದ್ಯಮಕ್ಕೆ ನೀಡಿದ ಮಹತ್ವದ ಕೊಡುಗೆಗಳಿಗಾಗಿ ಬಾಲಿವುಡ್ ನಿರ್ಮಾಪಕಿಗೆ ಅಂತಾರಾಷ್ಟ್ರೀಯ ಎಮ್ಮಿ ನಿರ್ದೇಶನಾಲಯ ಪ್ರಶಸ್ತಿಯನ್ನು ನೀಡಿ ಗೌರವಿಸಿದೆ.
ಖ್ಯಾತ ಲೇಖಕ ಮತ್ತು ನಟ ದೀಪಕ್ ಚೋಪ್ರಾ ಅವರಿಂದ ಪ್ರಶಸ್ತಿ ಸ್ವೀಕರಿಸಿದ ಏಕ್ತಾ ಕಪೂರ್, ಈ ಪ್ರತಿಷ್ಠಿತ ಗೌರವವನ್ನು ಸಾಧಿಸಿದ ಮೊದಲ ಮಹಿಳಾ ಭಾರತೀಯ ಚಲನಚಿತ್ರ ನಿರ್ಮಾಪಕಿಯಾಗಿ ಹೊರಹೊಮ್ಮಿದ್ದಾರೆ. ಸದ್ಯ ಈ ವಿಷಯ ಇದೀಗ ಟ್ರೇಡಿಂಗ್ ಆಗುತ್ತಿದ್ದು, ಏಕ್ತಾ ಜತೆಗೆ ವೀರ್ ದಾಸ್ ಅವರು ಅತ್ಯುತ್ತಮ ಹಾಸ್ಯಕ್ಕಾಗಿ ಅಂತಾರಾಷ್ಟ್ರೀಯ ಎಮ್ಮಿ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು.
ನೆಟ್ಫ್ಲಿಕ್ಸ್ ಚಿತ್ರವಾದ ವೀರ್ ದಾಸ್: ಲ್ಯಾಂಡಿಂಗ್ ಸಿನಿಮಾದಲ್ಲಿನ ಅತ್ಯುತ್ತಮ ಹಾಸ್ಯ ನಟನೆಗೆ ವೀರ್ ಪ್ರಶಸ್ತಿಯನ್ನು ಪಡೆದುಕೊಂಡರು. ಈ ಗೌರವವನ್ನು ಸಾಧಿಸಿದ ಮೊದಲ ಭಾರತೀಯ ಹಾಸ್ಯನಟ ಎಂಬ ಹೆಗ್ಗಳಿಕೆಗೆ ಇದೀಗ ದಾಸ್ ಪಾತ್ರರಾಗಿದ್ದಾರೆ,(ಏಜೆನ್ಸೀಸ್).