ದುಬೈ ರಾಜಕುಮಾರ ಶೇಖ್ ಹಮ್ದನ್ ಬಿನ್ ಮೊಹಮ್ಮದ್ ಬಿನ್ ರಶೀದ್ ಅಲ್ ಮಕ್ತೋಮ್ ಅವರು ಇದೀಗ ನೆಟ್ಟಿಗರ ಮನ ಗೆದ್ದಿದ್ದಾರೆ. ತಮ್ಮ ಕಾರಿನಲ್ಲಿ ಎರಡು ಹಕ್ಕಿಗಳು ಗೂಡು ಕಟ್ಟಿ, ಮೊಟ್ಟೆಯಿಟ್ಟಿದ್ದನ್ನು ನೋಡಿದ ಶೇಖ್ ಹಮ್ದನ್ ಅವರು ಆ ಐಷಾರಾಮಿ ಕಾರನ್ನು ಬಳಸುತ್ತಿಲ್ಲ. ಹಕ್ಕಿಗಳಿಗೆ ತೊಂದರೆಯಾಗಬಾರದು ಎಂಬ ಕಾರಣಕ್ಕೆ ಕಾರನ್ನೇ ಬದಿಗಿಟ್ಟಿದ್ದಾರೆ. ಅಷ್ಟೇ ಅಲ್ಲ, ಕಾರಿನ ಸುತ್ತಲೂ ಒಂದು ಕೆಂಪು ಟೇಪ್ ಕಟ್ಟಿದ್ದಾರೆ. ಅಲ್ಲಿಗೆ ಯಾರೂ ಹೋಗಬಾರದು. ಕಾರನ್ನು ತೆಗೆಯಬಾರದು ಎಂದು ಅವರು ಹಾಗೆ ಮಾಡಿದ್ದಾರೆ.
ಕಾರಿನಲ್ಲಿ ಕಟ್ಟಿರುವ ಗೂಡಿಗೆ ಹಕ್ಕಿಗಳು ಬರುವ, ಮೊಟ್ಟೆಯನ್ನು ಕಾಳಜಿ ಮಾಡುವ, ನಂತರ ಮೊಟ್ಟೆಯೊಡೆದು ಹೊರಬಂದ ಪುಟ್ಟ ಮರಿಗಳು, ಆ ಮರಿಗಳಿಗೆ ತಾಯಿ ಹಕ್ಕಿ ಆಹಾರ ತಿನ್ನಿಸುವ ದೃಶ್ಯಗಳನ್ನೊಳಗೊಂಡ ವಿಡಿಯೋವನ್ನು ಶೇಖ್ ಹಮ್ದನ್ ಅವರು ತಮ್ಮ ಇನ್ಸ್ಟಾಗ್ರಾಂನಲ್ಲಿ ಶೇರ್ ಮಾಡಿಕೊಂಡಿದ್ದಾರೆ.
ವಿಡಿಯೋ ನೋಡಿದ ನೆಟ್ಟಿಗರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಸಣ್ಣಸಣ್ಣ ಸಂಗತಿಗಳು ಕೆಲವೊಮ್ಮೆ ಬಹುದೊಡ್ಡ ಸಂತೋಷ ಹೊತ್ತು ತರುತ್ತವೆ ಎಂದು ಕಾಮೆಂಟ್ ಬರೆದಿದ್ದಾರೆ.