Doomscrolling: ಮೊಬೈಲ್ ತಗೊಂಡು ಒಂದೆರಡು ಸುದ್ದಿ ನೋಡೋಣ ಅಂತ ಓಪನ್ ಮಾಡ್ತೀರಾ? ಆದ್ರೆ ಒಂದರ ಹಿಂದೆ ಒಂದರಂತೆ ಅಪಘಾತ, ಅಪರಾಧ, ಯುದ್ಧ, ದುರಂತದ ಸುದ್ದಿಗಳನ್ನ ನೋಡ್ತಾನೇ ಇರ್ತೀರಾ. ನೋಡನೋಡ್ತಿದ್ದಂತೆ ಸಮಯ ಹೋಗಿದ್ದೇ ಗೊತ್ತಾಗಲ್ಲ. ಕೊನೆಗೆ ಮನಸ್ಸಿಗೆ ಟೆನ್ಷನ್, ಬೇಸರ, ಆತಂಕ ಶುರುವಾಗುತ್ತೆ. ಹೀಗೆ ಕೆಟ್ಟ ಸುದ್ದಿಗಳನ್ನೇ ಮತ್ತೆ ಮತ್ತೆ ಸ್ಕ್ರೋಲ್ ಮಾಡ್ತಾ ಇರೋ ಅಭ್ಯಾಸಕ್ಕೆ ಡೂಮ್ಸ್ಕ್ರೋಲಿಂಗ್ (Doomscrolling) ಅಂತ ಕರೀತಾರೆ.
ತಜ್ಞರೊಬ್ಬರ ಪ್ರಕಾರ ಕೆಟ್ಟ ಸುದ್ದಿಗಳತ್ತ ಪದೇಪದೆ ಗಮನ ಹರಿಸುವುದರ ಹಿಂದೆ ಮಾನವನ ಮನಸ್ಸಿನ ಸಹಜ ಪ್ರವೃತ್ತಿ ಮತ್ತು ಅನಿಶ್ಚಿತತೆಯ ಭಯ ಪ್ರಮುಖ ಪಾತ್ರ ವಹಿಸುತ್ತವೆ.
ಒಳ್ಳೆಯ ಸುದ್ದಿಗಿಂತ ಭಯ ಹುಟ್ಟಿಸುವ ಸುದ್ದಿಗಳೇ ಬೇಗ ಗಮನ ಸೆಳೆಯುತ್ತವೆ. ಇದಕ್ಕೆ ಮನೋವಿಜ್ಞಾನದಲ್ಲಿ ‘ನಕಾರಾತ್ಮಕತೆಯೆಡೆಗಿನ ಒಲವು’ (Negativity Bias) ಅಂತ ಕರೀತಾರೆ. ಅಪಾಯದಿಂದ ದೂರವಿರಲು ಮೆದುಳು ನಕಾರಾತ್ಮಕ ಸುದ್ದಿಗಳತ್ತ ಹೆಚ್ಚು ಗಮನ ಕೊಡುತ್ತದೆ. ಹೀಗಾಗಿ, ಸುದ್ದಿ ತಿಳಿದುಕೊಳ್ಳಲು ಮೊಬೈಲ್ ತೆರೆದರೂ, ಮತ್ತೇನಾಗಿದೆ ಅಂತ ತಿಳಿಯೋ ಕುತೂಹಲಕ್ಕೆ ಮತ್ತೆ ಮತ್ತೆ ಸ್ಕ್ರೋಲ್ ಮಾಡ್ತಾ ಇರ್ತೀವಿ.
ಏನಾದ್ರೂ ಅನಿರೀಕ್ಷಿತ ಘಟನೆ ನಡೆದಾಗ, ಅದರ ಬಗ್ಗೆ ಇನ್ನಷ್ಟು ತಿಳ್ಕೋಬೇಕು, ಮುಂದೆ ಏನಾಗಬಹುದು ಅಂತ ತಿಳಿಯಬೇಕು ಅನ್ನಿಸುತ್ತೆ. ಹೆಚ್ಚು ಮಾಹಿತಿ ಸಿಕ್ಕರೆ ಪರಿಸ್ಥಿತಿ ನಮ್ಮ ಕೈಯಲ್ಲಿದೆ ಅನ್ನೋ ಭಾವನೆ ಬರಬಹುದು. ಆದ್ರೆ ಪ್ರತಿ ಹೊಸ ಸುದ್ದಿಯೂ ಆತಂಕಕ್ಕೆ ಉತ್ತರ ಕೊಡಲ್ಲ. ಬದಲಿಗೆ, ಇನ್ನಷ್ಟು ಟೆನ್ಷನ್ ಹೆಚ್ಚಿಸಬಹುದು. ಹೀಗೆ ಆತಂಕ ಕಡಿಮೆ ಮಾಡಿಕೊಳ್ಳೋಕೆ ಮತ್ತೆ ಮತ್ತೆ ಸುದ್ದಿ ನೋಡೋದು, ಕೊನೆಗೆ ಆತಂಕವನ್ನೇ ಹೆಚ್ಚಿಸುವ ಚಟವಾಗಬಹುದು.
ಒಂದು ಸುದ್ದಿ ನೋಡಿದ ಮೇಲೆ ಅದಕ್ಕೆ ಸಂಬಂಧಿಸಿದ ವಿಡಿಯೊ, ಕಾಮೆಂಟ್‌, ಚರ್ಚೆಗಳನ್ನ ನೋಡ್ತಾ ಹೋದ್ರೆ ಸಮಯ ಹೋಗಿದ್ದೇ ಗೊತ್ತಾಗಲ್ಲ. ಸೋಷಿಯಲ್ ಮೀಡಿಯಾದಲ್ಲಿ ಒಂದರ ಹಿಂದೆ ಒಂದರಂತೆ ಹೊಸ ವಿಷಯಗಳು ಬರೋದ್ರಿಂದ ಸ್ಕ್ರೋಲಿಂಗ್ ನಿಲ್ಲಿಸೋದು ಕಷ್ಟವಾಗುತ್ತೆ. ಇದರಿಂದ ಟೆನ್ಷನ್, ಕಿರಿಕಿರಿ, ಮಾನಸಿಕ ದಣಿವು ಉಂಟಾಗಬಹುದು. ರಾತ್ರಿ ಮಲಗೋ ಮುನ್ನ ಮೊಬೈಲ್ ನೋಡ್ತಾ ಇದ್ರೆ ನಿದ್ದೆ ತಡವಾಗಬಹುದು, ಓದಿದ ಸುದ್ದಿಗಳ ಬಗ್ಗೆಯೇ ಯೋಚನೆ ಮಾಡ್ತಾ ನಿದ್ದೆ ಕೂಡ ಹಾಳಾಗಬಹುದು.
ಸುದ್ದಿ ಓದೋದು ತಪ್ಪಲ್ಲ. ಆದ್ರೆ ಬೇಸರವಾದಾಗ, ಆತಂಕವಾದಾಗಲೆಲ್ಲ ಮೊಬೈಲ್ ತೆಗೆದು ಸುದ್ದಿ ನೋಡೋ ಅಭ್ಯಾಸ ಬೆಳೆದರೆ ಎಚ್ಚರ ವಹಿಸಬೇಕು. ಸುದ್ದಿ ಓದಿದ ಮೇಲೆ ಮನಸ್ಸು ನಿರಾಳವಾಗುತ್ತಿದೆಯಾ ಅಥವಾ ಟೆನ್ಷನ್ ಹೆಚ್ಚಾಗುತ್ತಿದೆಯಾ ಅಂತ ಗಮನಿಸಿ. ಇದರಿಂದ ನಿದ್ದೆ ಹಾಳಾಗ್ತಿದ್ರೆ, ಕೆಲಸದ ಮೇಲೆ ಗಮನ ಕೊಡೋಕೆ ಆಗ್ತಿಲ್ಲ ಅಂದ್ರೆ ಮೊಬೈಲ್ ಬಳಕೆಯ ಅಭ್ಯಾಸ ಬದಲಾಯಿಸೋದು ಒಳ್ಳೆಯದು.
- ಸುದ್ದಿಗೆ ಸಮಯ ಫಿಕ್ಸ್ ಮಾಡಿ: ದಿನವಿಡೀ ಮೊಬೈಲ್ ನೋಡೋ ಬದಲು, ಸುದ್ದಿ ಓದಲು ನಿರ್ದಿಷ್ಟ ಸಮಯ ಇಟ್ಕೊಳ್ಳಿ.
- ಒಳ್ಳೆಯ ಸುದ್ದಿ ಮೂಲ ಆಯ್ಕೆ ಮಾಡಿ: ಒಂದೇ ಸುದ್ದಿಯನ್ನ ಮತ್ತೆ ಮತ್ತೆ ಓದೋ ಬದಲು, ಮುಖ್ಯ ಮಾಹಿತಿಗೆ ಗಮನ ಕೊಡಿ.
- ಅನಗತ್ಯ ನೋಟಿಫಿಕೇಶನ್ ಆಫ್ ಮಾಡಿ: ಪ್ರತಿ ಅಲರ್ಟ್‌ಗೂ ತಕ್ಷಣ ಮೊಬೈಲ್ ನೋಡಬೇಕಿಲ್ಲ.
- ಮಲಗೋ ಮುನ್ನ ಮೊಬೈಲ್ ದೂರವಿಡಿ: ರಾತ್ರಿ ಸ್ಕ್ರೋಲ್ ಮಾಡೋ ಬದಲು ಆರಾಮವಾಗಿ ನಿದ್ದೆ ಮಾಡಲು ಸಮಯ ಕೊಡಿ.
- ನಿಮ್ಮ ಮನಸ್ಥಿತಿ ಗಮನಿಸಿ: ಟೆನ್ಷನ್ ಅಥವಾ ಒಂಟಿತನದಿಂದ ಮೊಬೈಲ್ ನೋಡ್ತಿದ್ದರೆ, ಸ್ವಲ್ಪ ಬ್ರೇಕ್ ತಗೊಂಡು ವಾಕ್ ಮಾಡೋದು ಅಥವಾ ಆಪ್ತರ ಜೊತೆ ಮಾತಾಡೋದು ಒಳ್ಳೆಯದು.
ಜಗತ್ತಿನಲ್ಲಿ ಏನಾಗ್ತಿದೆ ಅಂತ ತಿಳ್ಕೊಳ್ಳೋದು ಮುಖ್ಯ. ಆದ್ರೆ ಪ್ರತಿ ಸುದ್ದಿಯನ್ನೂ ತಕ್ಷಣ ತಿಳ್ಕೊಳ್ಳಲೇಬೇಕು ಅನ್ನೋ ಒತ್ತಡ ಬೇಡ. ಕೆಟ್ಟ ಸುದ್ದಿಗಳನ್ನ ಪದೇಪದೆ ಓದೋದ್ರಿಂದ ಸಿದ್ಧತೆ ಹೆಚ್ಚಾಗೋ ಬದಲು ಟೆನ್ಷನ್ ಹೆಚ್ಚಾಗಬಹುದು. ಹಾಗಾಗಿ, ಎಷ್ಟು ಸುದ್ದಿ ಓದಬೇಕು, ಎಲ್ಲಿ ನಿಲ್ಲಿಸಬೇಕು ಅನ್ನೋದು ಗೊತ್ತಿರಲಿ. ಜಗತ್ತಿನ ಆಗುಹೋಗುಗಳ ಬಗ್ಗೆ ತಿಳ್ಕೊಳ್ಳಿ, ಜೊತೆಗೆ ನಿಮ್ಮ ಮನಸ್ಸಿನ ನೆಮ್ಮದಿಗೂ ಆದ್ಯತೆ ಕೊಡಿ.