ಮೃತದೇಹವನ್ನು ಸುಡುವುದರಿಂದ ಸಾಕಷ್ಟು ತೊಂದರೆಗಳು ಇವೆ. ಮೊದಲನೆಯದಾಗಿ ವಾಯು ಮಾಲಿನ್ಯವಾಗುತ್ತದೆ. ಏಕೆಂದರೆ ಒಂದು ಹೆಣ ಸುಡುವುದಕ್ಕೆ ಅಂದಾಜು 500 ರಿಂದ 800 ಕೆ.ಜಿ. ಸೌದೆ ಬೇಕು. ನಮ್ಮ ದೇಶದಲ್ಲಿ ವರ್ಷಕ್ಕೆ ಅಂದಾಜು ಎಪ್ಪತ್ತು ಲಕ್ಷ ಜನ ಸಾಯುತ್ತಾರೆ, ಎಲ್ಲ ಹೆಣಗಳನ್ನು ಸುಡಲು ಅಂದಾಜು ಐವತ್ತು ಲಕ್ಷ ಟನ್ ಸೌದೆ ಬೇಕಾಗುತ್ತದೆ. ಲಕ್ಷಾಂತರ ಟನ್ ಇಂಗಾಲದ ಡೈಆಕ್ಸೈಡ್, ಇಂಗಾಲದ ಮೋನಾಕ್ಸೈಡ್ ಉತ್ಪತ್ತಿಯಾಗಿ ವಾತಾವರಣ ಸೇರುತ್ತದೆ. ಎರಡನೇ ಅಡ್ಡ ಪರಿಣಾಮ ಎಂದರೆ, ಮೃತದೇಹ ಸುಟ್ಟ ಜಾಗದಲ್ಲಿ ನೆಲ ಕಪ್ಪಾಗಿರುತ್ತದೆ. ಅಂದರೆ ಅಲ್ಲಿ ಭೂಮಿಯೂ ಸುಟ್ಟಿರುತ್ತದೆ. ಇದರಿಂದ ಮಣ್ಣಿನಲ್ಲಿರುವ ಜೀವಿಗಳನ್ನೂ ಸುಟ್ಟಂತೆ ಆಗುತ್ತದೆ. ಇದರಿಂದ ಮೃತದೇಹ ಸುಟ್ಟ ಸ್ಥಳದ ಸುತ್ತಲೂ ಜೀವಿಗಳ ಚಲನವಲನ ಇಲ್ಲದೇ ಅಲ್ಲಿನ ಜೀವವೈವಿಧ್ಯ ಏರು ಪೇರಾಗುತ್ತದೆ. ಇದರಿಂದ ಈ ಸ್ಥಳದಲ್ಲಿನ ಮರ-ಗಿಡಗಳಿಗೂ ಸ್ವಲ್ಪಮಟ್ಟದಲ್ಲಿ ತೊಂದರೆ ಆಗುತ್ತದೆ. ಸುಟ್ಟ ನೆಲದಲ್ಲಿ ಮತ್ತೆ ಜೀವಿಗಳು ಕಾರ್ಯಾರಂಭ ಮಾಡಬೇಕೆಂದರೆ 3-6 ತಿಂಗಳುಗಳೇ ಬೇಕಾಗುತ್ತದೆ.