ಸ್ಪೇನ್: ಕರೊನಾ ವೈರಸ್ ಪೂರ್ತಿ ಪ್ರಪಂಚವನ್ನೇ ಆವರಿಸಿಕೊಳ್ಳುತ್ತಿದೆ. ಸೋಂಕಿತರ ಸಂಖ್ಯೆಯಲ್ಲಿ ದಿನದಿಂದ ದಿನಕ್ಕೆ ಹೆಚ್ಚಳ ಕಾಣುತ್ತಿದ್ದು, ಹಲವರು ವೈರಸ್ನಿಂದ ತಪ್ಪಿಸಿಕೊಳ್ಳುವುದಕ್ಕೆ ವಿಶೇಷ ಉಪಾಯಗಳನ್ನು ಮಾಡಲಾರಂಭಿಸಿದ್ದಾರೆ. ಸ್ಪೇನ್ನಲ್ಲಿ ವೈರಸ್ ಭೀತಿ ಹೆಚ್ಚಾದ ಹಿನ್ನೆಲೆ ಬಂದ್ ನಡೆಸಲಾಗುತ್ತಿದ್ದು, ವ್ಯಕ್ತಿಯೊಬ್ಬ ಡೈನೋಸರ್ ಆಗಿರುವ ವಿಡಿಯೋ ಇದೀಗ ವೈರಲ್ ಆಗಿದೆ.
ಸ್ಪೇನ್ನ ನಿವಾಸಿಯೊಬ್ಬ ಡೈನೋಸರ್ ಆಗಿ ರಸ್ತೆಯಲ್ಲಿ ಓಡಾಡಿದ್ದಾನೆ. ಅರೇ ಇದೇನಪ್ಪಾ, ಕರೊನಾದಂತಹ ಮಹಾಮಾರಿ ಕಾಡುತ್ತಿರುವ ಈ ಸಮಯದಲ್ಲಿ ಇದೆಂತ ಹುಚ್ಚಾಟ ಎಂದು ಯೋಚಿಸಬೇಡಿ. ಏಕೆಂದರೆ ಡೈನೋಸರ್ ವೇಷ ತೊಟ್ಟಿದ್ದು ಕೂಡ ಕರೊನಾ ಬಾರದಿರಲಿ ಎನ್ನುವ ಕಾರಣಕ್ಕೇ. ಮನೆಯಲ್ಲಿದ್ದ ಕಸವನ್ನು ಹೊರಗಿರುವ ಕಸದ ಬುಟ್ಟಿಗೆ ಹಾಕಬೇಕಿತ್ತಂತೆ. ಆದರೆ ಮಾಮೂಲಿಯಾಗಿ ಹೋದರೆ ಹೊರಗೆ ಕರೊನಾ ವೈರಸ್ ತಗಲುವ ಭಯವಿರುವುದರಿಂದ ಆತ ಡೈನೋಸರ್ ಬಟ್ಟೆಯನ್ನು ತೊಟ್ಟು ಹೋಗಿದ್ದಾನೆ. ಇದನ್ನು ಕಂಡ ಪೊಲೀಸರು ಆತನನ್ನು ನಿಲ್ಲಿಸಿ ಹೊರಗೆ ಬರಬೇಡ ಎಂದು ಹೇಳಿ ಮನೆಯೊಳಗೆ ಕಳುಹಿಸಿದ್ದಾರೆ.
ಈ ವಿಡಿಯೋವನ್ನು ಸ್ವತಃ ಸ್ಪೇನ್ನ ಪೊಲೀಸ್ ಇಲಾಖೆಯೇ ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿದೆ. ಕರೊನಾ ತಡೆಯುವುದಕ್ಕೆ ವಿಶೇಷ ಉಪಾಯ ಮಾಡಿದ ಈ ವ್ಯಕ್ತಿಗೆ ನೆಟ್ಟಿಗರು ಭಾರೀ ಮೆಚ್ಚುಗೆಯನ್ನು ವ್ಯಕ್ತಪಡಿಸುತ್ತಿದ್ದಾರೆ. ಸ್ಪೇನ್ನಲ್ಲಿ ಮಾತ್ರ ಡೈನೋಸರ್ಗಳು ಈ ರೀತಿ ರಸ್ತೆಗೆ ಬರಲು ಸಾಧ್ಯ ಎಂದು ಜನರು ಕಾಮೆಂಟ್ ಮಾಡಲಾರಂಭಿಸಿದ್ದಾರೆ. (ಏಜೆನ್ಸೀಸ್)