ನವದೆಹಲಿ: ದೆಹಲಿ ವಿಮಾನ ನಿಲ್ದಾಣ 2024ರಲ್ಲಿ 7.7 ಕೋಟಿಗಿಂತ ಹೆಚ್ಚು ಪ್ರಯಾಣಿಕರನ್ನು ನಿರ್ವಹಿಸಿ, ವಿಶ್ವದ 9ನೇ ಅತ್ಯಂತ ಜನನಿಬಿಡ ವಿಮಾನ ನಿಲ್ದಾಣ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. 2023ರಲ್ಲಿ ಇದು 10ನೇ ಸ್ಥಾನದಲ್ಲಿತ್ತು.
ಏರ್ಪೋರ್ಟ್ಸ್ ಕೌನ್ಸಿಲ್ ಇಂಟರ್ನ್ಯಾಷನಲ್ ವಿಶ್ವದ 20 ಅತ್ಯಂತ ಜನನಿಬಿಡ ವಿಮಾನ ನಿಲ್ದಾಣಗಳ ಪಟ್ಟಿ ಬಿಡುಗಡೆ ಮಾಡಿದ್ದು, ಅಮೆರಿಕದ ಅಟ್ಲಾಂಟಾ ವಿಮಾನ ನಿಲ್ದಾಣ 10.8 ಕೋಟಿ ಪ್ರಯಾಣಿಕರನ್ನು ನಿರ್ವಹಿಸಿ ಮೊದಲ ಸ್ಥಾನದಲ್ಲಿದೆ. ದುಬೈ 9.23 ಲಕ್ಷ ಪ್ರಯಾಣಿಕರು, ಅಮೆರಿಕದ ಡಲ್ಲಾಸ್/ಫೋರ್ಟ್ವರ್ಥ್ 8.78 ಲಕ್ಷ ಪ್ರಯಾಣಿಕರೊಂದಿಗೆ ಕ್ರಮವಾಗಿ 2 ಮತ್ತು 3ನೇ ಸ್ಥಾನದಲ್ಲಿವೆ.
2024ರಲ್ಲಿ ಜಾಗತಿಕ ಮಟ್ಟದಲ್ಲಿ ವಿಮಾನ ಪ್ರಯಾಣಿಕರ ಸಂಖ್ಯೆ 9.4 ಶತಕೋಟಿ ಆಗಿ ಹೊಸ ಗರಿಷ್ಠ ಮಟ್ಟ ತಲುಪಿದೆ. ಇದು 2023ಕ್ಕಿಂತ ಶೇ. 8.4ರಷ್ಟು ಹೆಚ್ಚಳ. ಕೋವಿಡ್ಪೂರ್ವ ಮಟ್ಟಕ್ಕಿಂತ (2019) ಶೇ. 2.7ರಷ್ಟು ಏರಿಕೆ. ಟಾಪ್ 20 ವಿಮಾನ ನಿಲ್ದಾಣಗಳ ಪಟ್ಟಿಯಲ್ಲಿ ಅಮೆರಿಕದ್ದೇ 6 ನಿಲ್ದಾಣಗಳಿವೆ. ಟಾಪ್ 10ನಲ್ಲಿರುವ ಇತರ ವಿಮಾನ ನಿಲ್ದಾಣಗಳೆಂದರೆ ಜಪಾನ್ನ ಹನೇಡಾ (4), ಲಂಡನ್ನ ಹೀಥ್ರೂ (5), ಅಮೆರಿಕದ ಡೆನ್ವರ್ (6), ಟರ್ಕಿಯ ಇಸ್ತಾಂಬುಲ್ (7), ಅಮೆರಿಕದ ಷಿಕಾಗೊ (8) ಮತ್ತು ಚೀನಾದ ಶಾಂಘೖ (10). ವಿಮಾನಗಳ ಸಂಚಾರದ ಸಂಖ್ಯೆ ದೃಷ್ಟಿಯಿಂದ, ದೆಹಲಿ 2023ರಲ್ಲಿ 13ನೇ ಸ್ಥಾನದಲ್ಲಿ ಇದ್ದದ್ದು 2024ರಲ್ಲಿ 15ನೇ ಸ್ಥಾನ ಪಡೆದಿದೆ.