ಹೈದರಾಬಾದ್: 'ಎವೆರಿ ಡಾಗ್ ಹ್ಯಾಸ್ ಇಟ್ಸ್ ಓನ್ ಡೇ..' ಎಂದು ಇಂಗ್ಲಿಷ್ನಲ್ಲಿ ಒಂದು ಮಾತಿದೆ. ಅದು ಅಕ್ಷರಶಃ ಸತ್ಯ ಎನಿಸುವಂಥ ಸಮಾರಂಭವೊಂದು ಇತ್ತೀಚೆಗೆ ನಡೆದಿದೆ. ಅದೇನೆಂದರೆ, ಇಲ್ಲೊಂದು ದಂಪತಿ ನಾಯಿಗೂ ಸೀಮಂತ ಮಾಡಿಸಿ, ತಮ್ಮ ನೆಂಟರಿಷ್ಟರಿಗೆಲ್ಲ ಆಹ್ವಾನ ನೀಡಿ ಊಟ ಹಾಕಿಸಿ ಕಳುಹಿಸಿದ್ದಾರೆ.
ಅಂದಹಾಗೆ ಆ ಅದೃಷ್ಟವಂತ ನಾಯಿಯ ಹೆಸರು ಸ್ಟೆಫಿ. ಒಂದೂವರೆ ವರ್ಷದ ಈ ಹೆಣ್ಣುನಾಯಿಗೆ ತೆಲುಗರ ಸಂಪ್ರದಾಯದಂತೆ ಸೀಮಂತ ಮಾಡಲಾಗಿದೆ. ತೆಲಂಗಾಣದ ನವಕುಮಾರ್-ಆಶಾ ದಂಪತಿ ಈ ನಾಯಿಯನ್ನು ಸಾಕಿದ್ದು, ಕಳೆದ ವಾರ ಅವರು ಹಾಗೂ ಅವರ ಪತ್ನಿ ಜೊತೆಯಾಗಿ ನಾಯಿಗೆ ಸೀಮಂತ ಏರ್ಪಡಿಸಿ, ಸಂಭ್ರಮ ಪಟ್ಟಿದ್ದಾರೆ.
ಸ್ಟೆಫಿ ನಮಗೆ ಮಗಳ ಥರ ಎನ್ನುವ ಈ ದಂಪತಿ, ಈ ನಾಯಿಯ ಮೊದಲ ಜನ್ಮದಿನವನ್ನೂ ಹೀಗೇ ಮನುಷ್ಯರ ಜನ್ಮದಿನವನ್ನು ಆಚರಿಸುವಂತೆಯೇ ಆಚರಣೆ ಮಾಡಿದ್ದಾಗಿಯೂ ಹೇಳಿದ್ದಾರೆ. ಕಳೆದ ಅಕ್ಟೋಬರ್ನಲ್ಲಿ ನಾವು ಸ್ಟೆಫಿಯ ಮೊದಲ ಬರ್ತ್ಡೇ ಆಚರಿಸಿ ನೆಂಟರಿಷ್ಟರಿಗೆಲ್ಲ ಊಟ ಹಾಕಿಸಿದ್ದೆವು. ಈ ಸಲ ಸ್ಟೆಫಿ ಗರ್ಭವತಿ ಆದಾಗ ಯಾಕೆ ಅದೇರೀತಿ ಅವಳ ಸೀಮಂತ ಮಾಡಬಾರದು? ಸ್ಟೆಫಿಯೂ ಒಂದು ರೀತಿಯಲ್ಲಿ ನಮ್ಮ ಮನೆಯ ಸದಸ್ಯಳಂತೆಯೇ ಆಗಿರುವುದರಿಂದ ಈ ಸೀಮಂತ ಮಾಡಿದ್ದಾಗಿ ಆ ದಂಪತಿ ಹೇಳಿಕೊಂಡಿದ್ದಾರೆ. (ಏಜೆನ್ಸೀಸ್)