ಲಂಡನ್: ಇಂಗ್ಲೆಂಡ್ ತಂಡದ ವಿಕೆಟ್ ಕೀಪರ್-ಬ್ಯಾಟ್ಸ್ಮನ್ ಜೋಸ್ ಬಟ್ಲರ್ 2019ರ ವಿಶ್ವಕಪ್ ಫೈನಲ್ ಗೆಲುವಿನ ವೇಳೆ ಧರಿಸಿದ್ದ ಜೆರ್ಸಿಯ ಹರಾಜಿನಿಂದ 60 ಲಕ್ಷ ರೂ. (65 ಸಾವಿರ ಪೌಂಡ್) ಗಳಿಸಿದ್ದು, ಇದನ್ನು ಕೋವಿಡ್-19ರ ವಿರುದ್ಧದ ಹೋರಾಟಕ್ಕೆ ಆಸ್ಪತ್ರೆಗಳಿಗೆ ದೇಣಿಗೆಯಾಗಿ ನೀಡಲಿದ್ದಾರೆ.
ಜೆರ್ಸಿಗೆ ಬಿಡ್ ಪ್ರಕ್ರಿಯೆ ಮಂಗಳವಾರ ಮುಕ್ತಾಯಗೊಂಡಿದ್ದು, ಒಟ್ಟು 82 ಬಿಡ್ಗಳು ಬಂದಿದ್ದವು. ‘ನನಗಿದು ವಿಶೇಷ ಶರ್ಟ್ ಆಗಿದೆ. ಆದರೆ ಈಗಿನ ತುರ್ತು ಸ್ಥಿತಿಯಲ್ಲಿ ನಾನು ಇದರಿಂದ ಯಾರಿಗಾದರೂ ಸಹಾಯ ಮಾಡಿದರೆ ಇದಕ್ಕೆ ಇನ್ನಷ್ಟು ವಿಶೇಷತೆ ಬರುತ್ತದೆ’ ಎಂದು ಬಟ್ಲರ್ ಹೇಳಿದ್ದಾರೆ.