Delhi: ದೆಹಲಿ ಕಾರು ಸ್ಫೋಟದ ಸಂದರ್ಭದಲ್ಲಿನ ಪ್ರಧಾನಿ ನರೇಂದ್ರ ಮೋದಿ ಭೂತಾನ್ ಭೇಟಿಯನ್ನು ಟೀಕಿಸಿರುವ ಕಾಂಗ್ರೆಸ್ ರಾಷ್ಟ್ರೀಯ ವಕ್ತಾರೆ ಸುಪ್ರಿಯಾ ಶ್ರೀನಾಟೆ ಸೇರಿದಂತೆ ಇತರ ನಾಯಕರಿಗೆ ಬಿಜೆಪಿ ಐಟಿ ಸೆಲ್ ಮುಖ್ಯಸ್ಥ ಅಮಿತ್ ಮಾಳವೀಯ (Amit Malviya) ಮಂಗಳವಾರ ( ನ 11) ತಿರುಗೇಟು ನೀಡಿದ್ದಾರೆ.
ತಮ್ಮ ಎಕ್ಸ್ ಖಾತೆಯಲ್ಲಿ ಪೋಸ್ಟ್ ಹಂಚಿಕೊಂಡಿರುವ ಮಾಳವೀಯ, ದೆಹಲಿ ಸ್ಫೋಟದ ದಿನ ಲೋಕಸಭೆಯ ವಿಪಕ್ಷ ನಾಯಕ ರಾಹುಲ್ ಗಾಂಧಿ ಮತ್ತು ಸಂಸದೆ ಪ್ರಿಯಾಂಕಾ ವಾದ್ರಾ ಎಲ್ಲಿದ್ದಾರೆ ಎಂಬುದರ ಕುರಿತು ಔಪಚಾರಿಕ ಹೇಳಿಕೆ ನೀಡಬೇಕು, ಭಾರತ ಇಂತಹ ದಾಳಿಗೆ ಒಳಗಾದಾಗ ಕಾಂಗ್ರೆಸ್ನ ಇಬ್ಬರು ಪ್ರಮುಖ ನಿರ್ಧಾರ ತೆಗೆದುಕೊಳ್ಳುವ ನಾಯಕರು ಎಲ್ಲಿದ್ದರು ಎನ್ನುವುದನ್ನು ರಾಷ್ಟ್ರವು ತಿಳಿದುಕೊಳ್ಳಲು ಅರ್ಹವಾಗಿದೆ ಎಂದರು.
ಇದನ್ನೂ ಓದಿ:5 ಕುಟುಂಬದ ಆಧಾರ ಸ್ತಂಭವನ್ನೇ ಕೆಡವಿದ ದೆಹಲಿ ಸ್ಫೋಟ: ಇವರ ಕತೆ ಕೇಳಿದ್ರೆ ಕಣ್ತುಂಬಿ ಬರುತ್ತೆ! Delhi Blast
ತಮ್ಮ ಅಧಿಕೃತ ಎಕ್ಸ್ ಖಾತೆಯಲ್ಲಿ ಪೋಸ್ಟ್ ಹಂಚಿಕೊಂಡಿದ್ದ ಕಾಂಗ್ರೆಸ್ ವಕ್ತಾರೆ ಸುಪ್ರಿಯಾ ಶ್ರೀನಾಟೆ, ಫರಿದಾಬಾದ್ನಲ್ಲಿ ವಶಪಡಿಸಿಕೊಂಡಿರುವ 360 ಕೆಜಿ ಸ್ಫೋಟಕಗಳು ದೇಶವನ್ನು ಪ್ರವೇಶಿಸಿದ್ದು ಹೇಗೆ ಎನ್ನುವ ಪ್ರಶ್ನೆಯನ್ನು ದೇಶದ ಮುಂದಿಟ್ಟರು. ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ನಡೆದಿರುವ ಬಾಂಬ್ ಸ್ಫೋಟದಲ್ಲಿ ಹದಿಮೂರು ಜನರು ಸಾವನ್ನಪ್ಪಿದ್ದು, ನಿನ್ನೆಯಷ್ಟೇ ಫರಿದಾಬಾದ್ನಲ್ಲಿ 360 ಕೆಜಿ ಸ್ಫೋಟಕಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಅವರು ಅಲ್ಲಿಗೆ ಹೇಗೆ ತಲುಪಿದರು? ದೇಶದಲ್ಲಿ ಎಂತಹ ದೊಡ್ಡ ಅನಾಹುತ ಸಂಭವಿಸಬಹುದಿತ್ತು. ಕೇವಲ ಏಳು ತಿಂಗಳ ಹಿಂದೆ, ಪಹಲ್ಗಾಮ್ನಲ್ಲಿ ಭಯೋತ್ಪಾದಕ ದಾಳಿ ನಡೆದಿತ್ತು, ಈಗ ದೆಹಲಿಯಲ್ಲಿ ಕಾರು ಸ್ಫೋಟವಾಗಿದೆ, ಇದಕ್ಕೆ ಹೊಣೆ ಯಾರು..? ಕೇಂದ್ರ ಗೃಹ ಸಚಿವರು ಎಲ್ಲಿದ್ದಾರೆ? ಪ್ರಧಾನಿ ಎಲ್ಲಿದ್ದಾರೆ? ಎಂದು ಬರೆದುಕೊಂಡಿದ್ದಾರೆ.
ಭಾರತೀಯರನ್ನು ಅವರ ಮೂಗಿನ ನೇರಕ್ಕೆ ಕ್ರೂರವಾಗಿ ಕೊಲ್ಲಲಾಗುತ್ತಿದ್ದರೆ, ಅವರಿಬ್ಬರೂ ತಮ್ಮ ಚುನಾವಣಾ ಪ್ರಚಾರದ ವಾಕ್ಚಾತುರ್ಯದಿಂದ ಒಂದು ಕ್ಷಣವೂ ಬಿಡುವು ಮಾಡಿಕೊಳ್ಳುತ್ತಿಲ್ಲ. ಇಬ್ಬರಿಗೂ ಯಾವುದೇ ಹೊಣೆಗಾರಿಕೆ ಇಲ್ಲ. ಅಮಿತ್ ಷಾ ಗೃಹ ಸಚಿವರಾಗಿ ಸಂಪೂರ್ಣ ವಿಫಲರಾಗಿದ್ದು, ಏಳು ತಿಂಗಳಲ್ಲಿ 41 ಭಾರತೀಯರನ್ನು ಹತ್ಯೆಯಾಗಿದೆ ಎಂದರು. ದೆಹಲಿ ಪೊಲೀಸರು ಯಾರ ನಿಯಂತ್ರಣದಲ್ಲಿದ್ದಾರೆ? ಗಡಿಗಳನ್ನು ಸುರಕ್ಷಿತಗೊಳಿಸುವ ಜವಾಬ್ದಾರಿ ಯಾರದ್ದು? ಗುಪ್ತಚರ ಇಲಾಖೆ ಯಾರಿಗೆ ವರದಿ ಮಾಡುತ್ತದೆ? ಇಂತಹ ಪ್ರಮುಖ ಘಟನೆಯ ಬಳಿಕ ಮೋದಿಜಿ ಜವಾಬ್ದಾರಿಯಿಂದ ಮುಖ ತಿರುಗಿಸಿ ಭೂತಾನ್ಗೆ ತೆರಳಿದ್ದಾರೆ. ನಿಮ್ಮ ವೈಫಲ್ಯಗಳು ಮತ್ತು ಭದ್ರತೆಯಲ್ಲಿ ಪುನರಾವರ್ತನೆಯಾಗುತ್ತಿರುವ ಗಂಭೀರ ಲೋಪಗಳನ್ನು, ನಿಮ್ಮ ಭವ್ಯ ಭಾಷಣಗಳಿಂದ ಮರೆಮಾಡಲು ಸಾಧ್ಯವಿಲ್ಲ ಎಂದು ವಾಗ್ದಾಳಿ ನಡೆಸಿದರು.
ಈ ದೇಶವನ್ನು ಸುರಕ್ಷಿತವಾಗಿಡುವುದು, ಇಲ್ಲಿನ ಜನರನ್ನು ರಕ್ಷಿಸುವುದು ಸರ್ಕಾರದ ಜವಾಬ್ದಾರಿ. ಮುಗ್ಧ ಜೀವಗಳು ಸತ್ತರೆ, ಪ್ರಶ್ನೆಗಳನ್ನು ಎತ್ತಲೇಬೇಕಾಗುತ್ತದೆ, ಹೊಣೆಗಾರಿಕೆಯನ್ನು ಸರಿಪಡಿಸಲಾಗುತ್ತದೆ. ರಾಷ್ಟ್ರವು ಸುರಕ್ಷಿತ ಕೈಯಲ್ಲಿಲ್ಲ ಎಂದು ಹೇಳಿದರು.(ಏಜೆನ್ಸೀಸ್)