Commonwealth Games: ಭಾರತದ 39 ಪದಕ ವಿಜೇತರ ವಿವರ ಹೀಗಿದೆ...

ಗ್ಲಾಸ್ಗೋ: ಭಾರತ ತಂಡ ಗ್ಲಾಸ್ಗೋ ಕಾಮನ್ವೆಲ್ತ್​ ಗೇಮ್ಸ್​ನಲ್ಲಿ (Commonwealth Games) ತನ್ನ ಪ್ರಾಬಲ್ಯದ ಪ್ರಮುಖ ಕ್ರೀಡೆಗಳ ಗೈರಿನಲ್ಲೂ ಭರ್ಜರಿ ಪದಕ ಬೇಟೆಯಾಡಿದೆ. ಭಾನುವಾರ ವರ್ಣರಂಜಿತ ಸಮಾರಂಭದೊಂದಿಗೆ ಮುಕ್ತಾಯಗೊಂಡ 23ನೇ ಆವೃತ್ತಿಯಲ್ಲಿ ಭಾರತ ತಂಡ 13 ಚಿನ್ನ, 17 ಬೆಳ್ಳಿ, 9 ಕಂಚಿನ ಸಹಿತ ಒಟ್ಟು 39 ಪದಕಗಳನ್ನು ಒಲಿಸಿಕೊಳ್ಳುವ ಮೂಲಕ ಪದಕಪಟ್ಟಿಯಲ್ಲಿ ಆತಿಥೇಯ ಸ್ಕಾಟ್ಲೆಂಡ್​ (13 ಚಿನ್ನ, 9 ಬೆಳ್ಳಿ, 17 ಕಂಚು, ಒಟ್ಟು 39) ತಂಡವನ್ನು ಹಿಂದಿಕ್ಕಿ 4ನೇ ಸ್ಥಾನ ಗಳಿಸಿತು. ಶೂಟಿಂಗ್​, ಬ್ಯಾಡ್ಮಿಂಟನ್​, ಕುಸ್ತಿ, ಟೇಬಲ್​ ಟೆನಿಸ್​, ಹಾಕಿ, ಟಿ20 ಕ್ರಿಕೆಟ್​ ಮುಂತಾದ ತನ್ನ ನೆಚ್ಚಿನ ಕ್ರೀಡೆಗಳ ಗೈರಿನಲ್ಲೂ ಭಾರತ ತಂಡ ಬಾಕ್ಸಿಂಗ್​, ಅಥ್ಲೆಟಿಕ್ಸ್​, ವೇಯ್ಟ್​ಲಿಫ್ಟಿಂಗ್​, ಜುಡೋದಲ್ಲಿ ತನ್ನ ನಿರೀೆಗೂ ಮೀರಿದ ಭರ್ಜರಿ ನಿರ್ವಹಣೆ ಪ್ರದರ್ಶಿಸಿತು. ಈ ಮೂಲಕ 2030ರಲ್ಲಿ ತವರಿನಲ್ಲೇ ನಡೆಯಲಿರುವ ಕಾಮನ್ವೆಲ್ತ್​ ಗೇಮ್ಸ್​ಗೆ ಭಾರತ ಆತ್ಮವಿಶ್ವಾಸ ವೃದ್ಧಿಸಿಕೊಂಡಿದೆ.

ಪ್ರಮುಖ ಕ್ರೀಡೆಗಳ ಗೈರಿನಲ್ಲೂ ಪದಕ ಪಟ್ಟಿಯಲ್ಲಿ ಅಗ್ರ 5ರೊಳಗೆ ಸ್ಥಾನ ಸಂಪಾದಿಸುವ ತನ್ನ ಗುರಿ ಈಡೇರಿಸಿಕೊಳ್ಳುವಲ್ಲಿ ಭಾರತ ಯಶಸ್ವಿಯಾಯಿತು. ಭಾರತ ಕಳೆದ 2022ರ ಆವೃತ್ತಿಯ ಪದಕಪಟ್ಟಿಯಲ್ಲೂ 4ನೇ ಸ್ಥಾನ ಗಳಿಸಿತ್ತು. ಒಟ್ಟು ಚಿನ್ನ ಮತ್ತು ಪದಕ ಗಳಿಕೆಯ ಲೆಕ್ಕದಲ್ಲಿ ಇದು 1998ರ ಆವೃತ್ತಿಯ ಬಳಿಕ ಭಾರತದ ಕನಿಷ್ಠ ಪದಕ ಗಳಿಕೆಯಾಗಿದೆ. ಆದರೆ ಕಳೆದ 6 ಆವೃತ್ತಿಗಳಿಂದ ಭಾರತಕ್ಕೆ ಹೆಚ್ಚು ಪದಕ ಗೆದ್ದುಕೊಡುತ್ತಿದ್ದ ಶೂಟಿಂಗ್​, ಕುಸ್ತಿ, ಬ್ಯಾಡ್ಮಿಂಟನ್​, ಟೇಬಲ್​ ಟೆನಿಸ್​ ಕ್ರೀಡೆಗಳ ಗೈರಿನಿಂದಾಗಿ ಇದು ಹಿನ್ನಡೆಯಲ್ಲ, ಬದಲಾಗಿ ಉತ್ತಮ ನಿರ್ವಹಣೆಯೇ ಆಗಿದೆ.