ಕಲರ್​ ಝೆರಾಕ್ಸ್ ನೋಟಿಗೆ ಕುರಿಯಾದ ರೈತ!

ಮಂಡ್ಯ: ಕಲರ್ ಝೆರಾಕ್ಸ್ ನೋಟುಗಳನ್ನು ಕರೆನ್ಸಿ ಎಂದು ನಂಬಿಸಿ ವೃದ್ಧ ರೈತ ರೊಬ್ಬರಿಂದ ಕುರಿ ಖರೀದಿಸಿ ವಂಚಿಸಿರುವ ಪ್ರಕರಣ ಮದ್ದೂರಿನ ಅಂಕನಾಥಪುರದಲ್ಲಿ ಬೆಳಕಿಗೆ ಬಂದಿದೆ. ಕುರಿಯ ಜತೆಗೆ ಹಣವನ್ನೂ ಕಳೆದುಕೊಂಡ ರೈತ ನ್ಯಾಯ ಕೋರಿ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದಾರೆ.

ಏನಿದು ಪ್ರಕರಣ: ಗ್ರಾಮದ ಮಂಚಯ್ಯ ವಾರದ ಹಿಂದೆ ಜಮೀನಿನಲ್ಲಿ 30ಕ್ಕೂ ಹೆಚ್ಚು ಕುರಿಗಳನ್ನು ಮೇಯಿಸುತ್ತಿದ್ದರು. ಈ ವೇಳೆ ವಾಹನವೊಂದರಲ್ಲಿ ಬಂದ ನಾಲ್ವರು ಒಂದು ಕುರಿಯನ್ನು 5 ಸಾವಿರ ರೂ.ಗೆ ಖರೀದಿ ಮಾಡಿ 500 ರೂ. ಮುಖಬೆಲೆಯ 10 ನೋಟು ಕೊಟ್ಟು ಕುರಿಯನ್ನು ತೆಗೆದುಕೊಂಡು ಹೋಗಿದ್ದರು.

ಕುರಿಗೆ 5 ಸಾವಿರ ರೂ. ಸಿಕ್ಕಿದ ಖುಷಿಯಿಂದ ನೋಟುಗಳನ್ನು ಜೇಬಲ್ಲಿಟ್ಟುಕೊಂಡು ಸಂಜೆ ಮನೆಗೆ ಬಂದಾಗ ನೋಟುಗಳ ಅಸಲಿಯತ್ತು ಬಯಲಾಗಿದೆ. ಝೆರಾಕ್ಸ್ ನೋಟುಗಳ ವಿಷಯವನ್ನು ಸಂಬಂಧಿಕರಿಗೆ ತಿಳಿಸಿದಾಗ ಕೆಲದಿನ ಸುತ್ತಮುತ್ತಲಿನ ಹಳ್ಳಿಗಳಲ್ಲಿ ವಂಚಕರನ್ನು ಹುಡುಕಿದ್ದರು. ಸೋಮವಾರ ಬೆಳಗ್ಗೆ ಮಂಚಯ್ಯ ಅವರ ಅಳಿಯ ರವಿ ಮನೆಗೆ ಬಂದಾಗ ಗ್ರಾಮಸ್ಥರು ವಂಚನೆ ವಿಷಯವನ್ನು ಮುಟ್ಟಿಸಿದ್ದರು. ಮಾವನಿಗಾದ ಮೋಸದ ಕುರಿತು ವಿಡಿಯೋ ಚಿತ್ರೀಕರಿಸಿದ ರವಿ, ರೈತರು-ವೃದ್ಧರು ಎಚ್ಚರದಿಂದ ಇರಬೇಕೆಂದು ವಿಡಿಯೋ ಸಂದೇಶ ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ಅಪ್​ಲೋಡ್ ಮಾಡಿದ್ದರು. ಈ ವಿಡಿಯೋ ಈಗ ವೈರಲ್ ಆಗಿದೆ. ಮಂಚಯ್ಯ ಸೋಮವಾರ ತಮ್ಮ ಸಂಬಂಧಿ ದಿಲೀಪ್ ಜತೆಗೂಡಿ ಕೆಸ್ತೂರಿನ ಪೊಲೀಸ್ ಠಾಣೆಗೆ ತೆರಳಿ ದೂರು ನೀಡಿದ್ದಾರೆ.