ನವದೆಹಲಿ: ಕರೊನಾ ವೈರಸ್ ಹಿನ್ನೆಲೆಯಲ್ಲಿ ದೆಹಲಿ ಸರ್ಕಾರ ಸೆಕ್ಷನ್ 144 ವಿಧಿಸಿ ನಿರ್ಬಂಧ ಹೇರಿದ್ದರೂ ಅದನ್ನು ಉಲ್ಲಂಘನೆ ಮಾಡಿ ಧಾರ್ಮಿಕ ಸಮಾವೇಶ ನಡೆಸಿದ್ದ ತಬ್ಲಿಘಿ ಜಮಾತ್ನ ಧರ್ಮಗುರು, ಪ್ರಮುಖ ಬೋಧಕ ಮೌಲಾನಾ ಸಾದ್ ಅವರು ಮಾತನಾಡಿದ್ದಾರೆನ್ನಲಾದ ಆಡಿಯೋವೊಂದು ವೈರಲ್ ಆಗಿದೆ.
ಮುಸ್ಲಿಮರ ಒಗ್ಗಟ್ಟನ್ನು ಮುರಿಯುವುದಕ್ಕೋಸ್ಕರ ಈ ಕರೊನಾ ವೈರಸ್ ಭಯ ಹುಟ್ಟಿಸಲಾಗಿದೆ. ಇದಕ್ಕೆಲ್ಲ ಹೆದರಬೇಡಿ. ಲಾಕ್ಡೌನ್ ಇದ್ದರೂ ಸರಿ, ನಿಜಾಮುದ್ದೀನ್ ಮರ್ಕಜ್ ಮಸೀದಿಯಲ್ಲಿ ನಡೆದಂತಹ ಧಾರ್ಮಿಕ ಸಭೆಗಳನ್ನು ಉಳಿದ ಕಡೆಗೂ ನಡೆಸಲಾಗುವುದು. ಅದರಲ್ಲೂ ಎಲ್ಲರೂ ಪಾಲ್ಗೊಳ್ಳಿ ಎಂದು ಮೌಲಾನಾ ಹೇಳಿದ್ದನ್ನು ಈ ಆಡಿಯೋದಲ್ಲಿ ಕೇಳಬಹುದು ಎನ್ನಲಾಗಿದೆ.
ಸರ್ಕಾರಿ ಆದೇಶ ಉಲ್ಲಂಘನೆ ಮಾಡಿ ಸಭೆ ನಡೆಸಿ, ಕರೊನಾ ವೈರಸ್ ಹರಡಲು ಕಾರಣವಾಗಿರುವ ತಬ್ಲಿಘಿ ಜಮಾತ್ ಮತ್ತು ಅದರ ಪ್ರಮುಖ ಧರ್ಮಗುರು ಮೌಲಾನಾ ಸಾದ್ ವಿರುದ್ಧ ಸಾಂಕ್ರಾಮಿಕ ಕಾಯಿಲೆ ಕಾಯ್ದೆಯಡಿ ಪೊಲೀಸರು ಈಗಾಗಲೇ ಎಫ್ಐಆರ್ ದಾಖಲಿಸಿದ್ದಾರೆ. ಆದರೆ ಮೌಲಾನಾ ನಾಪತ್ತೆಯಾಗಿದ್ದಾನೆ. ಟ್ರೇಸ್ ಮಾಡುವ ಪ್ರಯತ್ನ ಪೊಲೀಸರಿಂದ ನಡೆಯುತ್ತಿದೆ.
ಏನಿದೆ ಆಡಿಯೋ ಟೇಪ್ನಲ್ಲಿ:
'ಮುಸ್ಲಿಮರ ಏಕತೆಯನ್ನು ಒಡೆಯಲು ಮತ್ತು ನಮ್ಮ ಧರ್ಮಾಚರಣೆಯನ್ನು ನಿಲ್ಲಿಸುವ ಪ್ರಯತ್ನ ನಡೆಯುತ್ತಿದೆ. ಹಾಗಾಗಿ ನಮ್ಮ ಬಳಿ ಗುಂಪುಗೂಡಬೇಡಿ, ಒಟ್ಟಾಗಿ ನಮಾಜ್ ಮಾಡಬೇಡಿ, ಸಭೆ ನಡೆಸಬೇಡಿ ಎನ್ನುತ್ತಾರೆ. ಅದಕ್ಕೆ ಕರೊನಾ ಸೋಂಕಿನ ನೆಪ ಹೇಳುತ್ತಾರೆ. ಮುಸ್ಲಿಂ ಸಮುದಾಯದವರು ಒಗ್ಗಟ್ಟಾಗಿರುವುದು ಇಷ್ಟವಿಲ್ಲ. ನಾವೇನಾದರೂ ಕರೊನಾ ವೈರಸ್ಗೆ ಹೆದರಿ ನಮ್ಮ ಒಗ್ಗಟ್ಟನ್ನು ಮುರಿದುಕೊಂಡರೆ ನಮಗೆ ನಷ್ಟ. ಸಾಂಕ್ರಾಮಿಕ ಕಾಯಿಲೆ ಕಡಿಮೆಯಾಗಬಹುದು. ಆದರೆ ಮುಸ್ಲಿಮರ ಸಂಕಷ್ಟ ಕೊನೆಯಾಗುವುದಿಲ್ಲ.
ಕಾಯಿಲೆಗೆ ಹೆದರಿ ಭೇಟಿಯಾಗುವುದನ್ನು ನಿಲ್ಲಿಸಿದರೆ ನಮ್ಮ ಮಧ್ಯೆ ಆತ್ಮೀಯತೆ ನಶಿಸುತ್ತದೆ. ಒಂದೇ ತಟ್ಟೆಯಲ್ಲಿ ಊಟ ಮಾಡುವ ಸ್ನೇಹ ಕಳಚುತ್ತದೆ. ಕರೊನಾ ವೈರಸ್ ಹೆಸರಲ್ಲಿ ನಮ್ಮನ್ನು ನಿರ್ಬಂಧಿಸುವುದೇ ಉದ್ದೇಶ..' ಎಂಬ ಸಾರಾಂಶವನ್ನು ಈ ಆಡಿಯೋ ಒಳಗೊಂಡಿದೆ.
ಮೌಲಾನಾ ಪತ್ತೆ ಕಾರ್ಯ ನಡೆಯುತ್ತಿದ್ದು, ಅದರೊಂದಿಗೆ ಮಸೀದಿಯ ಧಾರ್ಮಿಕ ಸಭೆಯಲ್ಲಿ ಪಾಲ್ಗೊಂಡ ದೇಶದೊಳಗಿನ, ವಿದೇಶಿ ಪ್ರಜೆಗಳನ್ನೂ ಹುಡುಕಲಾಗುತ್ತಿದೆ. (ಏಜೆನ್ಸೀಸ್)