Cindy Singh: ಅಮೆರಿಕಾದ ಟಾಪ್ 10 ಮೋಸ್ಟ್ ವಾಂಟೆಡ್ ಕ್ರಿಮಿನಲ್ಗಳ ಪಟ್ಟಿಯಲ್ಲಿದ್ದ ಸಿಂಡಿ ರೊಡ್ರಿಗಸ್ ಸಿಂಗ್ ಇದೀಗ ಕಡೆಗೂ ಎಫ್ಬಿಐ ಅಧಿಕಾರಿಗಳಿಗೆ ಸಿಕ್ಕಿಬಿದ್ದಿದ್ದು, ಭಾರತದಲ್ಲಿ ಬಂಧನವಾಗಿದ್ದಾಳೆ.
ಅಮೆರಿಕದ ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ನ (ಎಫ್ಬಿಐ) ಭಾರತದ ಟೆನ್ ಮೋಸ್ಟ್ ವಾಂಟೆಡ್ ಕ್ರಿಮಿನಲ್ ಪಟ್ಟಿಯಲ್ಲಿ ಒಬ್ಬಳಾಗಿದ್ದ ಸಿಂಡಿ ರೊಡ್ರಿಗಸ್ ಸಿಂಗ್ನ ಭಾರತದಲ್ಲಿ ಬಂಧಿಸುವಲ್ಲಿ ಕೊನೆಗೂ ಯಶಸ್ವಿಯಾಗಿದೆ. 40 ವರ್ಷ ವಯಸ್ಸಿನ ಮಹಿಳೆ ಸಿಂಗ್, 2022ರಲ್ಲಿ ತನ್ನ ಮಗ ನೋಯೆಲ್ ರೊಡ್ರಿಗಸ್ ಅಲ್ವಾರೆಜ್ನನ್ನು (6) ಬರ್ಬರವಾಗಿ ಕೊಲೆಗೈದಿದ್ದಳು. ತಾನೇ ಜನ್ಮಕೊಟ್ಟ ಮಗುವಿನ ಕೊಲೆಗೆ ಸಂಬಂಧಿಸಿದಂತೆ ಆರೋಪಗಳನ್ನು ಹೊತ್ತುಕೊಳ್ಳಲು ಮತ್ತು ಶಿಕ್ಷೆಯಿಂದ ತಪ್ಪಿಸಿಕೊಳ್ಳುವ ಸಲುವಾಗಿ ಆಕೆ 2023ರ ಮಾರ್ಚ್ನಲ್ಲಿ ಅಮೆರಿಕದಿಂದ ನಾಪತ್ತೆಯಾಗಿದ್ದಳು.
ತನ್ನ ಭಾರತೀಯ ಮೂಲದ ಪತಿ ಅರ್ಶ್ದೀಪ್ ಸಿಂಗ್ ಮತ್ತು ಆರು ಮಕ್ಕಳೊಂದಿಗೆ ಸಿಂಡಿ, ಕೊನೆಯ ಬಾರಿಗೆ 2023ರ ಮಾರ್ಚ್ 22ರಂದು ಭಾರತಕ್ಕೆ ತೆರಳುತ್ತಿದ್ದ ವಿಮಾನದಲ್ಲಿ ಕಾಣಿಸಿಕೊಂಡಿರುವುದು ವರದಿಯಾಗಿದೆ. ಈ ವೇಳೆ ಆಕೆಯೊಂದಿಗೆ ಕೊಲೆಯಾದ ಮಗ ನೋಯೆಲ್ ರೊಡ್ರಿಗಸ್ ಸುಳಿವು ಸಿಕ್ಕಿಲ್ಲ. ಏರ್ಪೋರ್ಟ್ ದಾಖಲೆಯಲ್ಲೂ ಆತನ ಬಗ್ಗೆ ಮಾಹಿತಿ ಲಭಿಸಿಲ್ಲ. ಈ ವಿಷಯ ಪೊಲೀಸರ ತನಿಖೆಯನ್ನು ಮತ್ತಷ್ಟು ಚುರುಕುಗೊಳಿಸಿತು.
"10 ಮೋಸ್ಟ್ ವಾಂಟೆಡ್ ಕ್ರಿಮಿನಲ್ ಪಟ್ಟಿಯಲ್ಲಿದ್ದ ಕೊಲೆ ಆರೋಪಿ ಸಿಂಡಿಯನ್ನು ಬಂಧಿಸುವಲ್ಲಿ ಎಫ್ಬಿಐ ಕಡೆಗೂ ಯಶಸ್ವಿಯಾಗಿದೆ. ಇದಕ್ಕೆ ನಾವು ಟ್ರಂಪ್ ಆಡಳಿತಕ್ಕೆ ಧನ್ಯವಾದ ತಿಳಿಸಲು ಬಯಸುತ್ತೇವೆ. ಕಳೆದ 7 ತಿಂಗಳಲ್ಲಿ 4ನೇ ಮೋಸ್ಟ್ ವಾಂಟೆಡ್ ಆರೋಪಿಯನ್ನು ಬಂಧಿಸಲಾಗಿದೆ. ಸಿಂಡಿ ಸಿಂಗ್ ಕಾನೂನುಬಾಹಿರ ಹಾರಾಟ ಮತ್ತು ಮರಣದಂಡನೆ ಶಿಕ್ಷೆಯಿಂದ ತಪ್ಪಿಸಿಕೊಳ್ಳಲು ಈ ಪ್ರಯತ್ನಗಳನ್ನು ಮಾಡಿದ್ದಾಳೆ. ಆಕೆಯ ಬಂಧನ ಇತರ ಅಪರಾಧಿಗಳಿಗೆ ಎಚ್ಚರಿಕೆ ಸಂದೇಶ. ಶೀಘ್ರವೇ ನಿಮ್ಮನ್ನೂ ಸೆರೆಹಿಡಿಯಲಾಗುತ್ತದೆ ಮತ್ತು ಕಠಿಣ ಶಿಕ್ಷೆಗೆ ಒಳಪಡಿಸಲಾಗುತ್ತದೆ" ಎಂದು ಅಮೆರಿಕದ ಶ್ವೇತಭವನ ಟ್ವೀಟ್ ಮಾಡಿದೆ.
ಅಕ್ಟೋಬರ್ 2024ರಲ್ಲಿ, ಇಂಟರ್ಪೋಲ್ ಆಕೆಯ ವಿರುದ್ಧ ರೆಡ್ ನೋಟಿಸ್ ಹೊರಡಿಸಿತು. ಫೆಡರಲ್ ತನಿಖಾ ಸಂಸ್ಥೆಯು ಆರೋಪಿಯ ಬಂಧನಕ್ಕೆ ಸಹಾಯ ಮಾಡುವವರಿಗೆ ಅಥವಾ ಖಚಿತ ಮಾಹಿತಿ ನೀಡುವವರಿಗೆ 25,000ರಿಂದ 2,50,000 ಡಾಲರ್ ಬಹುಮಾನ ಘೋಷಿಸಿತ್ತು. ಇದರ ಬೆನ್ನಲ್ಲೇ ಆಕೆಯ ಹೆಸರನ್ನು ಎಫ್ಬಿಐ, ಮೋಸ್ಟ್ ವಾಂಟೆಡ್ ಕ್ರಿಮಿನಲ್ಗಳ ಪಟ್ಟಿಗೆ ಸೇರಿಸಿತು. ಭಾರತೀಯ ಅಧಿಕಾರಿಗಳು ಮತ್ತು ಇಂಟರ್ಪೋಲ್ ಜತೆಗಿನ ನಿಕಟ ಸಂಪರ್ಕದೊಂದಿಗೆ ಸಿಂಡಿಯನ್ನು ಎಫ್ಬಿಐ ಅಧಿಕಾರಿಗಳು ಭಾರತದಲ್ಲಿ ಬಂಧಿಸಿದ್ದಾರೆ. ಫಾಕ್ಸ್ ನ್ಯೂಸ್ ವರದಿಯ ಪ್ರಕಾರ, ಆಕೆಯನ್ನು ಟೆಕ್ಸಾಸ್ ಅಧಿಕಾರಿಗಳಿಗೆ ಹಸ್ತಾಂತರಿಸಲು ಸೂಚಿಸಲಾಗಿದೆ.
ತನ್ನ ಸ್ವಂತ ಮಗನನ್ನೇ ಬರ್ಬರವಾಗಿ ಕೊಂದ ಆರೋಪ ಹೊತ್ತಿರುವ ಎಫ್ಬಿಐನ ಹತ್ತು ಮೋಸ್ಟ್ ವಾಂಟೆಡ್ ಕ್ರಿಮಿನಲ್ ಪಟ್ಟಿಯಲ್ಲಿ ಸ್ಥಾನ ಪಡೆದ ಮಹಿಳಾ ಕ್ರಿಮಿನಲ್ ಈ ಸಿಂಡಿ ಸಿಂಗ್. ಪಟ್ಟಿಯಲ್ಲಿ ಆಕೆಯನ್ನು 4ನೇ ಸ್ಥಾನದಲ್ಲಿ ಇರಿಸಲಾಗಿತ್ತು ಎಂದು ವರದಿಯಾಗಿದೆ. ಸಿಂಗ್ ತನ್ನ ಮಗು ಭೂತದ ಸ್ವರೂಪ! ಆತ ನಮಗೆ ಮತ್ತು ಅವಳ-ಜವಳಿ ಮಕ್ಕಳಿಗೆ ತೊಂದರೆ ಎಂದು ಮೂಢನಂಬಿಕೆಗಳಲ್ಲಿ ಮುಳುಗಿದ್ದಳು. ಮೃತ ಮಗುವಿಗೆ ದೀರ್ಘಕಾಲದ ಶ್ವಾಸಕೋಶದ ಕಾಯಿಲೆಯಿತ್ತು. ನೋಯೆಲ್ ಆಮ್ಲಜನಕದ ಸಹಾಯದಿಂದ ಬದುಕುತ್ತಿದ್ದ. ಈ ಮಗುವನ್ನು ನಿಂದಿಸಿದ್ದಲ್ಲದೇ, ಹಸಿವಿನಿಂದ ನರಳಾಡಿಸಿ, ನೀರನ್ನು ಸಹ ಕೊಡಲು ಸಿಂಡಿ ನಿರಾಕರಿಸಿದ್ದಾಗಿ ತನಿಖಾ ಸಂಸ್ಥೆಗಳು ತಮ್ಮ ವರದಿಯಲ್ಲಿ ತಿಳಿಸಿವೆ.
2023ರ ಅಕ್ಟೋಬರ್ 31ರಂದು ಟೆಕ್ಸಾಸ್ನ ಟ್ಯಾರಂಟ್ ಕೌಂಟಿಯಲ್ಲಿ ಸಿಂಡಿ ಸಿಂಗ್ಗೆ ಮರಣದಂಡನೆ ಶಿಕ್ಷೆ ವಿಧಿಸಲಾಯಿತು. ಈ ಮೊಕದ್ದಮೆ ಮತ್ತು ಕಠಿಣ ಶಿಕ್ಷೆಯಿಂದ ತಪ್ಪಿಸಿಕೊಂಡ ಆಕೆಯನ್ನು ಬಂಧಿಸಲು ಎಫ್ಬಿಐ ಫೆಡರಲ್ ವಾರೆಂಟ್ ಜಾರಿ ಮಾಡಿತ್ತು. ಆ ನಂತರ ರೆಡ್ ನೋಟಿಸ್ ಕೂಡ ಹೊರಡಿಸಿ, ಟಾಪ್ 10 ಮೋಸ್ಟ್ ವಾಂಟೆಡ್ ಕ್ರಿಮಿನಲ್ ಪಟ್ಟಿಗೆ ಸೇರಿಸಿತು,(ಏಜೆನ್ಸೀಸ್).