ಬೆತ್ಲಹೇಮ್: ಕ್ರಿಸ್ಮಸ್ ಹಬ್ಬ ಸಮೀಪದಲ್ಲಿದ್ದರೂ ಕರೊನಾ ವೈರಸ್ ಕಾರಣ ಹಬ್ಬದ ಆಚರಣೆಗಳಲ್ಲೂ ವ್ಯತ್ಯಾಸವಿದೆ. ಈ ಸಲ ಬೆತ್ಲಹೇಮ್ನಲ್ಲಿ ಕ್ರಿಸ್ಮಸ್ ಟ್ರೀ ಲೈಟಿಂಗ್ ಕಾರ್ಯಕ್ರಮದಲ್ಲಿ ಎಂದಿನಂತೆ ಸಾವಿರಾರು ಜನ ಭಾಗಿಯಾಗಿಲ್ಲ. ಬದಲಾಗಿ ಬೆರಳೆಣಿಕೆ ಜನರಷ್ಟೇ ಭಾಗಿಯಾಗಿದ್ದರು. ಶನಿವಾರ ರಾತ್ರಿ ಈ ಕಾರ್ಯಕ್ರಮ ನಡೆಯಿತು ಎಂದು ಅಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ.
ಕ್ರಿಸ್ತನ ಜನ್ಮಸ್ಥಳವೆಂದು ಕ್ರೈಸ್ತರು ನಂಬುವ ಚರ್ಚ್ ಆಫ್ ದ ನೇಟಿವಿಟಿಯ ಸಮೀಪವೇ ಇರುವ ಮ್ಯಾನೇಜರ್ ಸ್ಕ್ವೇರ್ನಲ್ಲಿ ಕ್ರಿಸ್ಮಸ್ ಟ್ರೀ ಲೈಟಿಂಗ್ ಕಾರ್ಯಕ್ರಮ ನಡೆಯಿತು. ಪ್ಯಾಲೆಸ್ತೈನ್ ಪ್ರಧಾನಿ ಮೊಹಮ್ಮದ್ ಶತಯ್ಯೇಹ್ ಮತ್ತು ಬೆತ್ಲಹೇಮ್ ಮೇಯರ್ ಆಂಟನ್ ಸಲ್ಮಾನ್ ಮತ್ತು ಕೆಲವು ಅಧಿಕಾರಿಗಳಷ್ಟೇ ಈ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು.
ಸಾಮಾನ್ಯವಾಗಿ ಈ ಕಾರ್ಯಕ್ರಮ ಅದ್ದೂರಿಯಾಗಿ ಆಚರಿಸಲ್ಪಡುತ್ತದೆ. ಸಾವಿರಾರು ಪ್ರವಾಸಿಗರು, ಕ್ರೈಸ್ತರು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಇಲ್ಲಿ ತುಂಬಿರುತ್ತಿದ್ದರು. ಸ್ಥಳೀಯ ವ್ಯಾಪಾರೋದ್ಯಮಗಳಿಗೂ ಇದು ಅನುಕೂಲವೇ ಆಗಿತ್ತು. ಆದರೆ, ಈ ಬಾರಿ ಇದೆಲ್ಲ ಮಿಸ್ಸಿಂಗ್ ಎಂದು ಅಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ. (ಏಜೆನ್ಸೀಸ್)