ಪಾಟ್ನಾ: ಮಾಜಿ ಮುಖ್ಯಮಂತ್ರಿ, ರಾಷ್ಟ್ರೀಯ ಜನತಾ ದಳ ಮುಖ್ಯಸ್ಥರಾದ ಲಾಲು ಪ್ರಸಾದ್ ಯಾದವ್ (Lalu Prasad Yadav) ನೀಡಿರುವ ಹೇಳಿಕೆ ಇದೀಗ ಬಿಹಾರ ರಾಜ್ಯ ರಾಜಕೀಯದಲ್ಲಿ ದೊಡ್ಡ ಸಂಚಲನವನ್ನೇ ಹುಟ್ಟುಹಾಕಿದೆ.
ಆರ್ಜೆಡಿ ಮುಖ್ಯಸ್ಥ ಲಾಲು ಪ್ರಸಾದ್ ಯಾದವ್, "ನಮ್ಮ ಬಾಗಿಲು ತೆರೆದಿದೆ. ನಿತೀಶ್ ತಾವು ಹಾಕಿಕೊಂಡಿರುವ ಬೋಲ್ಟ್ ತೆಗೆದು ಬರಬೇಕು ಅಷ್ಟೇ" ಎಂದು ಮೈತ್ರಿ ಮಾಡಿಕೊಳ್ಳುವ ಆಫರ್ ನೀಡಿದ್ದಾರೆ. ಸದ್ಯ ಈ ಹೇಳಿಕೆ ತೀವ್ರ ಚರ್ಚೆಗೆ ಗ್ರಾಸವಾಗಿದ್ದು, ಪ್ರತಿಪಕ್ಷ ನಾಯಕನ ಆಹ್ವಾನದ ಮೇರೆಗೆ ಮತ್ತೆ ಆರ್ಜೆಡಿ ಜತೆ ನಿತೀಶ್ ಕೈಜೋಡಿಸಲಿದ್ದಾರೆಯೇ ಎಂಬ ಪ್ರಶ್ನೆಗಳು ಭುಗಿಲೆದ್ದಿವೆ. ಲಾಲು ಹೇಳಿಕೆಯನ್ನು ಮುಂದಿಟ್ಟ ಪತ್ರಕರ್ತರಿಗೆ ಉತ್ತರಿಸಿದ ಸಿಎಂ, "ಏನು ಹೇಳುತ್ತಿದ್ದೀರಿ ನೀವು" ಎಂದು ಪ್ರತಿಕ್ರಿಯಿಸಿದ್ದಾರೆ.
ಲಾಲು ಪ್ರಸಾದ್ ಹೇಳಿಕೆಗೆ ಹೆಚ್ಚು ತುಟಿ ಬಿಚ್ಚದ ನಿತೀಶ್ ಕುಮಾರ್, ಕೇವಲ ಮೂರೇ ಮೂರು ಪದಗಳಲ್ಲಿ ಉತ್ತರಿಸಿ, ಸ್ಥಳದಿಂದ ಹೊರಟು ಹೋಗಿದ್ದಾರೆ. ಒಂದೆಡೆ ಲಾಲು ಪ್ರಸಾದ್ ಯಾದವ್ ನೀಡಿರುವ ಆಹ್ವಾನ ಬಿಹಾರದಲ್ಲಿ ಹೊಸ ಸರ್ಕಾರ ಸೃಷ್ಟಿಯಾಗುವ ಮುನ್ಸೂಚನೆ ನೀಡಿದೆಯೇ? ಲಾಲು-ನಿತೀಶ್ರ ಮೈತ್ರಿಗೆ ಚಾಲನೆ ಸಿಗಲಿದೆಯೇ? ಎಂಬುದು ಸದ್ಯ ಅನೇಕರಲ್ಲಿ ಬೆಂಬಿಡದೆ ಕಾಡುತ್ತಿರುವ ಪ್ರಶ್ನೆಯಾಗಿದೆ,(ಏಜೆನ್ಸೀಸ್).