ಕುಂದಾಪುರ: ಹನಿಮೂನ್ ಬದಲು ಕಡಲ ಕಿನಾರೆ ಸ್ವಚ್ಛ ಮಾಡಿದ ನವದಂಪತಿ ಪ್ರಧಾನಿ ನರೇಂದ್ರ ಮೋದಿ ಅವರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.
ಭಾನುವಾರ ನಡೆದ ವರ್ಷದ ಕೊನೆಯ ಮನ್ ಕೀ ಬಾತ್ ಕಾರ್ಯಕ್ರಮದಲ್ಲಿ ನವಜೋಡಿಯ ಕಾರ್ಯವನ್ನು ಶ್ಲಾಘಿಸಿದ ಮೋದಿ, ಇದು ಯುವ ಪೀಳಿಗೆಗೆ ದಾರಿದೀಪ ಎಂದು ಬಣ್ಣಿಸಿದ್ದಾರೆ. ಬೈಂದೂರು ಮೂಲದ ಅನುದೀಪ ಹೆಗ್ಡೆ ಹಾಗೂ ಮಿನುಷಾ ಕಾಂಚನ್ ಮದುವೆ ಬಳಿಕ ಜಿಲ್ಲೆಯ ಸೋಮೇಶ್ವರ ಬೀಚ್ ಸ್ವಚ್ಛ ಮಾಡಿದ್ದರು.
ಮದುವೆ ನಂತರ ವಿದೇಶ ಟೂರ್ ಅಥವಾ ಬೇರೆ ಕಡೆ ಸ್ವಚ್ಛತಾ ಕಾರ್ಯ ಮಾಡಬೇಕು ಎಂದು ನಿಶ್ಚಯಿಸಿದ್ದೆವು. ಕೋವಿಡ್ ನಮ್ಮ ಉದ್ದೇಶಕ್ಕೆ ಅಡ್ಡಿಯಾಯಿತು. ನಮ್ಮೂರಿನ ಕಡಲ ಕಿನಾರೆಯನ್ನೇ ಆಯ್ಕೆ ಮಾಡಿ ಸ್ವಚ್ಛ ಮಾಡುವ ನಿರ್ಧಾರಕ್ಕೆ ಬಂದೆವು. ಸ್ಥಳೀಯರು ಕೈ ಜೋಡಿಸಿದ್ದರಿಂದ ಸೋಮೇಶ್ವರ ಕಡಲ ತೀರ ಸ್ವಚ್ಛವಾಗಿದೆ. ನಮ್ಮ ಕೆಲಸವನ್ನು ಪ್ರಧಾನಿ ಕಾರ್ಯಾಲಯ ಗುರುತಿಸಿತು. ಪ್ರಧಾನಿ ಮೋದಿಯವರು ಮನ್ ಕೀ ಬಾತ್ನಲ್ಲಿ ಮೆಚ್ಚುಗೆ ವ್ಯಕ್ತಪಡಿಸಿರುವುದು ಖುಷಿ ತಂದಿದೆ.
| ಅನುದೀಪ ಹೆಗ್ಡೆ-ಮಿನುಷಾ ನವದಂಪತಿ