ಬೆಂಗಳೂರು: ಕನ್ನಡದ ಬಿಗ್ ಬಾಸ್ ಸೀಸನ್ 10 ಇದೀಗ ಏಳನೇ ವಾರಕ್ಕೆ ಕಾಲಿಟ್ಟಿದ್ದು, ಡಬಲ್ ಎಲಿಮಿನೇಷನ್ ಬಳಿಕ ಸ್ಪರ್ಧಿಗಳ ನಡುವೆ ಭಾರೀ ಪೈಪೋಟಿ ಎದುರಾಗಿದೆ.
ತಂಡಗಳಾಗಿ ಇದ್ದವರು ಇದೀಗ ಬೇರ್ಪಟ್ದಿದ್ದಾರೆ. ಒಂದೇ ದೇಹ ಎಂಬಂತೆ ಇದ್ದ ಸ್ನೇಹಿತರು ಸದ್ಯ ಆ ಜನ್ಮದ ವೈರಿಗಳಂತೆ ನಡೆದುಕೊಳ್ಳುತ್ತಿದ್ದಾರೆ. ಈ ಬಿಸಿ ಬಿಸಿ ವಾತಾವರಣದ ಮಧ್ಯೆಯೇ ಬಿಗ್ ಬಾಸ್ ಕೊಟ್ಟ ವಾರದ ಮೊದಲ ಸವಾಲು ಸ್ವೀಕರಿಸುವಂತ ಟಾಸ್ಕ್ ಈಗ ಎರಡು ತಂಡಗಳ ಮಧ್ಯೆ ಭಾರೀ ಕಿಚ್ಚನ್ನು ಹಚ್ಚಿಸಿದೆ.
ಈ ಸವಾಲಿನ ಟಾಸ್ಕ್ನಲ್ಲಿ ಎರಡು ತಂಡಗಳಾಗಿ ವಿಂಗಡನೆಯಾಗಿರುವ 'ಗಜಕೇಸರಿ' ಹಾಗೂ 'ಸಂಪತ್ತಿಗೆ ಸವಾಲ್' ಟೀಮ್ನ ಸದಸ್ಯರು ಸಿಕ್ಕಾಪಟ್ಟೆ ಜಿದ್ದಾಜಿದ್ದಿಗೆ ಇಳಿದಿದ್ದು, ಮಾತಿನ ತೀವ್ರತೆ, ಪದಬಳಕೆ ಮಿತಿ ಮೀರಿದೆ. ಏಕವಚನದ ದಾಳಿ ಶುರುವಾಗಲು ಸಂಗೀತಾ ಕೊಟ್ಟ ಸವಾಲೇ ಕಾರಣವಾಗಿದೆ.
ತುಕಾಲಿ ಸಂತೋಷ್ ಮತ್ತು ಕಾರ್ತಿಕ್ ಇಬ್ಬರು ಕೂಡ ತಮ್ಮ ತಲೆಯನ್ನು ಬೋಳಿಸಿಕೊಳ್ಳಬೇಕು ಎಂದು ಸಂಗೀತಾ ಸವಾಲು ಎಸೆದರು. ಇದಕ್ಕೆ ವಿರೋಧ ವ್ಯಕ್ತಪಡಿಸಿದ ತನಿಶಾ, ಇಬ್ಬರ ಬದಲಿಗೆ ಒಬ್ಬರನ್ನು ಪರಿಗಣಿಸಬಹುದಲ್ವಾ ಎಂದು ಕೇಳಿದ್ದಾರೆ.
ಈ ವೇಳೆ ತನಿಶಾ ಮತ್ತು ನಮ್ರತಾ ಮಧ್ಯೆ ಏಕವಚನದ ಮಾತುಗಳು ಮತ್ತೊಮ್ಮೆ ಮನೆಯಲ್ಲಿ ಸದ್ದು ಮಾಡಿದೆ. ಈ ವಿಚಾರ ಸ್ಪರ್ಧಿಗಳಲ್ಲಿ ಗೊಂದಲ ಮೂಡಿಸಿದ್ದು, ಏನಾಗುತ್ತಿದೆ ಎಂದು ಅಚ್ಚರಿಯಿಂದ ಪರಸ್ಪರ ನೋಡಿಕೊಳ್ಳುವಂತೆ ಮಾಡಿದೆ. ಈ ವಾಗ್ವಾದ ಯಾವ ಹಂತವನ್ನು ತಲುಪಿದೆ ಎಂಬುದನ್ನು ಇಂದಿನ ಸಂಚಿಕೆಯಲ್ಲಿ ತಿಳಿಯಬೇಕಿದೆ.
ಇದನ್ನೂ ಓದಿ: ಉತ್ತರಕಾಶಿ ಸುರಂಗದಲ್ಲಿ ಸಿಲುಕಿದ ಕಾರ್ಮಿಕರ ಮೊದಲ ವಿಡಿಯೋ ಬಿಡುಗಡೆ; ವಾಕಿಟಾಕಿ ಮೂಲಕ ಹುರಿದುಂಬಿಸುತ್ತಿರುವ ರಕ್ಷಣಾ ತಂಡ
ದಿನದ 24 ಗಂಟೆಗಳ ಲೈವ್ ಸ್ಟ್ರೀಮಿಂಗ್ ಜಿಯೋ ಸಿನಿಮಾದಲ್ಲಿ ಪ್ರಸಾರವಾಗುತ್ತಿದೆ.