ಬೆಂಗಳೂರು: ಕಳೆದ ವಾರ ಬಿಗ್ ಬಾಸ್ ಸೀಸನ್ 11ರ (BBK11) ಎಂಟನೇ ವಾರದಲ್ಲಿ ಬಿಗ್ ಮನೆಯಿಂದ ಕ್ಯಾಡ್ಬರೀಸ್, ನಟ ಧರ್ಮ ಕೀರ್ತಿರಾಜ್ ಎಲಿಮಿನೇಟ್ ಆಗಿ ಹೊರಬಂದ ಬೆನ್ನಲ್ಲೇ ಬಿಗ್ ಮನೆಯಲ್ಲಿ ನಾಮಿನೇಷನ್ ಬಿಸಿ ತಟ್ಟಿದೆ. ಈ ವಾರ ಯಾರನ್ನು ಮನೆಯಿಂದ ಹೊರಗೆ ಕಳಿಸಲು ನೀವು ಇಚ್ಛಿಸುತ್ತೀರಿ? ಎಂಬ ಬಿಗ್ ಬಾಸ್ ಪ್ರಶ್ನೆಗೆ ಇದೀಗ ಸ್ಪರ್ಧಿಗಳಿಂದ ಕಿಡಿ ಹಚ್ಚುವ ಉತ್ತರಗಳೇ ಬಂದಿವೆ.
9ನೇ ವಾರಕ್ಕೆ ಮನೆಯ ಕ್ಯಾಪ್ಟನ್ ಆಗಿ ಅಧಿಕಾರ ಪಡೆದಿರುವ ಉಗ್ರಂ ಮಂಜು, ಬಿಗ್ ಬಾಸ್ನಿಂದ ಉತ್ತಮ ಸವಲತ್ತನ್ನೇ ಸ್ವೀಕರಿಸಿದ್ದಾರೆ. ಈ ವಾರದಲ್ಲಿ ಮನೆಯ ರಾಜನಾಗಿ ಸಿಂಹಾಸನದ ಮೇಲೆ ತನ್ನ ದರ್ಬಾರ್ ನಡೆಸುತ್ತಿರುವ ಮಂಜು, ಸ್ಪರ್ಧಿಗಳು ತನ್ನ ಮಾತನ್ನು ಮೀರದಂತೆ ಇರಲು ಆದೇಶಿಸಿದ್ದಾರೆ. ಇದೊಂದು ರೀತಿ ಮನೆಯವರ ಸಿಡಿಮಿಡಿಗೆ ಕಾರಣವಾಗಿದ್ದರೂ ನೋಡುಗರಿಗೆ ಖುಷಿ ನೀಡಿದೆ. ಈ ಮಧ್ಯೆ ನಡೆದ ನಾಮಿನೇಷನ್ ಪ್ರಕ್ರಿಯೆಯಲ್ಲಿ ಚೈತ್ರಾ ಮತ್ತು ರಜತ್ ನಡುವೆ ದೊಡ್ಡ ಮಾತಿನ ಸಮರವೇ ನಡೆದುಹೋಗಿದೆ.
ನನಗೆ ರಜತ್ ಪ್ರತಿಬಾರಿ 'ಬಾಸ್ ಎಂದು ಉಲ್ಲೇಖಿಸಿ ಕರೆಯುವುದು ಇಷ್ಟವಿಲ್ಲ. ಅದರಲ್ಲಿ ವ್ಯಂಗ್ಯ ಅಡಗಿದೆ ಎಂದು ಕಾರಣ ಕೊಟ್ಟಿದ್ದಾರೆ. ಈ ಮಾತಿಗೆ ಸಿಟ್ಟಿಗೆದ್ದ ರಜತ್, ನಗುನಗುತ್ತಲೇ ಬಾಸ್ ಇದೇ ಕಾರಣಕ್ಕೆ ನೀವು ನನ್ನ ಮನೆಗೆ ಕಳಿಸಲು ಇಚ್ಛಿಸುತ್ತೀರಾ? ನಿಮ್ಮನ್ನು ಈ ಮನೆಯಿಂದ ಹೊರಗೆ ಕಳಿಸುವವರೆಗೂ ನಾನು ಇಲ್ಲಿಂದ ಹೋಗುವುದಿಲ್ಲ ಎಂದು ಜೋರು ಧ್ವನಿಯಲ್ಲಿ ಹೇಳಿದ್ದಾರೆ. ಸದ್ಯ ಇವರಿಬ್ಬರ ಮಾತಿನ ಜಟಾಪಟಿಯ ಪ್ರೋಮೋ ಹೊರಬಿದ್ದಿದ್ದು, ವೀಕ್ಷಕರ ಕುತೂಹಲವನ್ನು ಮತ್ತಷ್ಟು ಹೆಚ್ಚಿಸಿದೆ.