ನವದೆಹಲಿ: ಚಿತ್ರ ನಿರ್ಮಾಪಕ ಜೇಮ್ಸ್ ಕ್ಯಾಮರೂನ್, 2009ರ 'ಅವತಾರ್' ಚಿತ್ರದಲ್ಲಿ ಸಾರ್ವಕಾಲಿಕವಾಗಿ ಅತಿ ಹೆಚ್ಚು ಗಳಿಕೆಯ ದಾಖಲೆ ಬರೆದಿದ್ದರು. ಇದೀಗ ಅವತಾರ್-2 ಬಿಡುಗಡೆ ಆಗುತ್ತಿರುವುದು ಗೊತ್ತೇ ಇದೆ. ಈ ಚಿತ್ರವನ್ನು ನೋಡಲು ಜಗತ್ತಿನಾದ್ಯಂತ ಜನರು ಕಾತುರದಿಂದ ಕಾಯುತ್ತಿದ್ದಾರೆ. ಈ ಚಿತ್ರ ಹಾಕಿದ್ದ ಬಂಡವಾಳ ತಂದು ಕೊಡುವುದರಲ್ಲಿ ಯಾವುದೇ ಸಂಶಯಗಳು ಉಳಿದಿಲ್ಲ ಎನ್ನುವುದು ಟ್ರೇಲರ್ ನೋಡಿದ ಎಲ್ಲರಿಗೂ ಸ್ಪಷ್ಟವಾಗಿದೆ.
ಇವರು ಅವತಾರ್-2 ಮೂಲಕ ಪ್ರೇಕ್ಷಕರನ್ನು ಹೊಸ ಜಗತ್ತು ಪಂಡೋರಕ್ಕೆ ಕರೆದೊಯ್ಯುತ್ತಿದ್ದಾರೆ. ಅವತಾರ್: ದ ವೇ ಆಫ್ ವಾಟರ್ಗಾಗಿ ಇದುವರೆಗೆ 350 ಮಿಲಿಯನ್ ಡಾಲರ್ಗಿಂತಲೂ ಹೆಚ್ಚು ವೆಚ್ಚವಾಗಿದೆ. ಈ ಚಿತ್ರ 13 ವರ್ಷಗಳ ನಂತರ ಬರುತ್ತಿರುವುದರಿಂದ ಎಲ್ಲರಲ್ಲೂ ಕುತೂಹಲ; ಹುಟ್ಟಿಸಿದೆ. ಆದರೂ ಜೇಮ್ಸ್ ಕ್ಯಾಮರೂನ್ಗೆ ಪುಕ-ಪುಕವಂತೆ!
ಸಂದರ್ಶನ ಒಂದರಲ್ಲಿ ಮಾತನಾಡಿದ ಕ್ಯಾಮರೂನ್ 'ಇಂದು (ಡಿ.8) ಅವತಾರ್-2ನ ಪ್ರೀಮಿಯಂ ಶೋಗಳು ಶುರುವಾಗಿವೆ. ಎಲ್ಲಾ ಸಿನಿ ವಿಮರ್ಶಕರೂ ಮೆಚ್ಚುಗೆಯನ್ನೇ ವ್ಯಕ್ತಪಡಿಸುತ್ತಿದ್ದರೆ. ಆದರೆ ನನಗೆ ಚಿಂತೆ ಏನೆಂದರೆ ಈಗ ಓಟಿಟಿ ಪ್ರೇಮಿಗಳು ಹೆಚ್ಚಾಗಿದ್ದಾರೆ. ಇದರ ಜೊತೆಗೆ ಕರೊನದ ಡಬಲ್ ಹೊಡೆತದಿಂದಾಗಿ ಥಿಯೇಟರ್ಗೆ ಹೋಗಿ ಸಿನಿಮಾ ವೀಕ್ಷಿಸುವ ಜನ ಕಡಿಮೆಯಾಗಿದ್ದಾರೆ. ಈಗ ಬದಲಾಗಿರುವ ಮಾರುಕಟ್ಟೆಯಲ್ಲಿ ನಾವು ಲಾಭ ಗಳಿಸಬಹುದೇ? ಈ ಚಿಂತೆ ನನಗೆ ಕಾಡುತ್ತಿದೆ' ಎಂದು ತಮ್ಮ ಭಯವನ್ನು ಜಗತ್ತಿನೆದುರು ಬಿಚ್ಚಿಟ್ಟರು. (ಏಜೆನ್ಸೀಸ್)