ಬಂಗಾರಪೇಟೆ ಗ್ರಾಮಾಂತರ: ಅತ್ತಿಗಿರಿ ಗ್ರಾಮದ ಬೃಹದಾಕಾರದ ಚೆಕ್ ಡ್ಯಾಂ ಕಟ್ಟೆ ಒಡೆದು ಸುಮಾರು 10 ದಿನಗಳಿಂದ ನೀರು ವ್ಯರ್ಥವಾಗಿ ಹರಿಯುತ್ತಿದ್ದು ಕಟ್ಟೆಸರಿಪಡಿಸಲು ಅಧಿಕಾರಿಗಳು ವಿಫಲರಾಗಿದ್ದಾರೆ.
ಬಂಗಾರ್ಪೇಟೆ ತಾಲೂಕಿನ ಮಾಗೊಂದಿ ಗ್ರಾಪಂ ವ್ಯಾಪ್ತಿಯ ಅತ್ತಿಗಿರಿ ಗ್ರಾಮದ ಬಳಿ ಸುಮಾರು 2 ದಶಕಗಳ ಹಿಂದೆ ಸುಮಾರು 2 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾಗಿರುವ ಚೆಕ್ ಡ್ಯಾಂಗೆ ಹಲವು ಕೆರೆಕುಂಟೆಗಳಿಂದ ನೀರು ಹರಿಯುತ್ತಿದೆ. ಇತ್ತೀಚೆಗೆ ಸುರಿದ ಮಳೆ ಹಾಗೂ ವಾಯುಭಾರ ಕುಸಿತದಿಂದ ಸುರಿದ ಮಳೆಯಿಂದ ಚಕ್ ಡ್ಯಾಂನಲ್ಲಿ ಯಥೇಚ್ಚವಾಗಿ ನೀರು ಶೇಖರಣೆಯಾಗಿದೆ.
ಚೆಕ್ಡ್ಯಾಂನ ಕಟ್ಟೆಯು ಶಿಥಿಲಗೊಂಡು ನೀರು ಹೆಚ್ಚಾಗಿ ಶೇಖರಣೆಯಾದ ಪರಿಣಾಮ ಕಳೆದ ಹಲವು ದಿನಗಳಿಂದ ಸಣ್ಣ ಪ್ರಮಾಣದಲ್ಲಿ ಕೋಡಿಯ ಮೇಲೆ ನೀರು ಹೋಗುತ್ತಿತ್ತು. ಇದೀಗ ಕಟ್ಟೆಯ ಒಂದು ಭಾಗ ಕಿತ್ತು ಹೋಗಿ 10 ದಿನಗಳಿಂದ ಚೆಕ್ ಡ್ಯಾಂನಿಂದ ನೀರು ವ್ಯರ್ಥವಾಗಿ ರೈತರ ಜಮೀನು ಸೇರಿದಂತೆ ವಿವಿಧ ಕಡೆ ವ್ಯರ್ಥವಾಗಿ ಹರಿಯುತ್ತಿದೆ.
ಚೆಕ್ ಡ್ಯಾಂ ಅನ್ನು ಸರಿಪಡಿಸುವಂತೆ ಪಂಚಾಯತಿ ಪಿಡಿಒ ಸೇರಿದಂತೆ ವಿವಿಧ ಇಲಾಖೆಗಳ ಅಧಿಕಾರಿಗಳಿಗೆ ಮನವಿ ಮಾಡಿದರು ಯಾವುದೇ ಪ್ರಯೋಜನ ಆಗಿಲ್ಲ. ಇದೇ ರೀತಿ ಇನ್ನೂ ಕೆಲವು ದಿನಗಳು ನೀರು ವ್ಯರ್ಥವಾಗಿ ಹರಿದರೆ ಚೆಕ್ ಡ್ಯಾಂನಲ್ಲಿನ ನೀರು ಖಾಲಿಯಾಗುವುದರಲ್ಲಿ ಯಾವುದೇ ಅನುಮಾನವಿಲ್ಲ. ಆದ್ದರಿಂದ ಆದಷ್ಟು ಬೇಗ ನೀರು ವ್ಯರ್ಥವಾಗದಂತೆ ಚೆಕ್ ಡ್ಯಾಂ ಅನ್ನು ಸರಿಪಡಿಸಬೇಕೆಂದು ಗ್ರಾಮಸ್ಥರು ಒತ್ತಾಯ ಮಾಡಿದ್ದಾರೆ.
ಚೆಕ್ ಡ್ಯಾಂ ನಿರ್ಮಿಸಿ ಸುಮಾರು ಎರಡು ದಶಕಗಳೇ ಕಳೆದಿದ್ದು ಡ್ಯಾಂಗೆ ಯಥೇಚ್ಛವಾಗಿ ನೀರು ಹರಿಯುತ್ತಿರುವ ಕಾರಣ ಡ್ಯಾಂನ ಒಂದು ಭಾಗದಲ್ಲಿ ಕಟ್ಟೆ ಒಡೆದು ನೀರು ಹೊರಗಡೆ ಹರಿಯುತ್ತಿದೆ. ಚೆಕ್ಡ್ಯಾಂನಲ್ಲಿ ನೀರು ಇರುವಾಗ ರಿಪೇರಿ ಕಾರ್ಯ ಸಾಧ್ಯವಿಲ್ಲ. ಆದ್ದರಿಂದ ಚೆಕ್ ಡ್ಯಾಂನಲ್ಲಿ ನೀರು ಖಾಲಿಯಾದ ಬಳಿಕ ರಿಪೇರಿ ಮಾಡಲಾಗುತ್ತದೆ. | ಕುಪೇಂದ್ರ ಕುಮಾರ್, ಉಪಾಧ್ಯಕ್ಷ, ಮಾಗೊಂದಿ ಗ್ರಾ.ಪಂ