"ಧುರಂಧರ್' ಸರಣಿಯ ಅದ್ಭುತ ಯಶಸ್ಸಿನ ಬಳಿಕ ಆದಿತ್ಯ ಧರ್, ಬಾಲಿವುಡ್ನ ಬಹುಬೇಡಿಕೆಯ ನಿರ್ದೇಶಕ ಎನಿಸಿಕೊಂಡಿದ್ದಾರೆ. ಹಲವು ಹೊಸ ಪ್ರಾಜೆಕ್ಟ್ಗಳನ್ನು ನಿರ್ದೇಶಿಸಲು ಅವಕಾಶ ಬರುತ್ತಿದ್ದರೂ, ಆದಿತ್ಯ ಅತ್ಯಂತ ಎಚ್ಚರಿಕೆಯಿಂದ ಹೊಸ ಕಥೆಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಿದ್ದಾರೆ. ಹೀಗಾಗಿಯೇ "ಧುರಂಧರ್ 2' ತೆರೆಗೆ ಬಂದು ಒಂದು ವರ್ಷದ ಬಳಿಕ ಅರ್ಥಾತ್ 2027ರ ಮಾರ್ಚ್ನಲ್ಲಿ ಅವರ ಹೊಸ ಸಿನಿಮಾ ಸೆಟ್ಟೇರಲಿದೆ ಎನ್ನಲಾಗಿದೆ. ಅದರ ನಡುವೆಯೇ ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವ ಸರ್ಮಾ, ಮಹಾರಾಜ ಲಚಿತ್ ಬೊುರ್ಕನ್ ಸಿನಿಮಾ ಮಾಡಲು ಆದಿತ್ಯ ಧರ್ಗೆ ಆಫರ್ ನೀಡಿದ್ದಾರೆ. ಕೆಲ ದಿನಗಳ ಹಿಂದಷ್ಟೇ ಖುದ್ದು ಅವರೇ ಈ ಬಗ್ಗೆ ಬಹಿರಂಗಪಡಿಸಿದ್ದು, "ನಮ್ಮ ಸರ್ಕಾರದ ವತಿಯಿಂದಲೇ ಲಚಿತ್ ಬೊುರ್ಕನ್ ಅವರ ಸಾಹಸಗಾಥೆಯ ಕುರಿತು ಸಿನಿಮಾ ಮಾಡುವ ಕುರಿತು ಚರ್ಚಿಸುತ್ತಿದ್ದೇವೆ. ಅವರಂತಹ ವೀರಸೇನಾನಿಯ ಕಥೆಯನ್ನು ವಿಶ್ವದ ಮುಂದಿಡುವುದು ಕೂಡ ಸಾಧನೆಯೇ ಸರಿ. ಹಾಗೇನಾದರೂ ಆದಿತ್ಯ ಧರ್ ಅವರು ಈ ಸಿನಿಮಾ ಮಾಡಲು ಸಾಧ್ಯವಾಗದಿದ್ದರೆ, ಬೇರೆ ನಿರ್ದೇಶಕರನ್ನು ಸಂಪರ್ಕಿಸಲಿದ್ದೇವೆ. ಲಚಿತ್ ಬೊುರ್ಕನ್ ಅವರ ಜೀವನದ ಕುರಿತು ಒಂದೊಳ್ಳೆ ಸಿನಿಮಾ ಮಾಡುವುದಷ್ಟೇ ನಮ್ಮ ಉದ್ದೇಶ' ಎಂದು ಹೇಳಿಕೊಂಡಿದ್ದಾರೆ. ಅಲ್ಲದೇ ಈಗಾಗಲೇ ಆದಿತ್ಯ ಧರ್ ಜತೆ ಹಿಮಂತಾ ಒಂದು ಸುತ್ತಿನ ಮಾತುಕತೆ ಮುಗಿಸಿದ್ದು, ಆಗಸ್ಟ್ನಲ್ಲಿ ನಿರ್ದೇಶಕನನ್ನು ಭೇಟಿಯಾಗಲಿದ್ದಾರೆ ಎನ್ನಲಾಗಿದೆ.
ಲಚಿತ್ ಬೊರ್ಫುಕನ್ ಅಸ್ಸಾಂನ ಅಹೋಂ ಸಾಮ್ರಾಜ್ಯದ ಸೇನಾಧಿಪತಿಯಾಗಿದ್ದರು. 1662ರಲ್ಲಿ ಮೊಘಲ್ ದೊರೆ ಔರಂಗಜೇಬನು ಅಸ್ಸಾಂ ಮೇಲೆ ದಾಳಿ ಮಾಡಿ, ಗುವಾಹಟಿ ವಶಪಡಿಸಿಕೊಂಡನು. ಆತನಿಂದ ಗುವಾಹಟಿಯನ್ನು ಮರುವಶಪಡಿಸಿಕೊಂಡಿದ್ದಲ್ಲದೇ, ಹಲವು ಬಾರಿ ದಂಡೆತ್ತಿ ಬಂದ ತಮಗಿಂತ ಹಲವು ಪಟ್ಟು ದೊಡ್ಡ ಸೈನ್ಯ ಹೊಂದಿದ್ದ ಮೊಘಲರನ್ನು ಸದೆಬಡಿದ ಹೆಗ್ಗಳಿಕೆ ಸೇನಾಧಿಪತಿ ಲಚಿತ್ ಬೊರ್ಫುಕನ್ ಗೆ ಸಲ್ಲುತ್ತದೆ. 1671ರಲ್ಲಿ ಮೊಘಲರ ವಿರುದ್ಧ ನಡೆದ ಸರೈಘಾಟ್ ಯುದ್ಧದಲ್ಲಿ ಅನಾರೋಗ್ಯದ ನಡುವೆಯೂ ಹೋರಾಡಿದ ಬೊರ್ಫುಕನ್ ಸಾಹಸಗಾಥೆ ಈಗಲೂ ಅಸ್ಸಾಂನ ಮನೆಮನೆಯಲ್ಲೂ ಜನಜನಿತವಾಗಿದೆ.