ವಿಶ್ವ ಕಿರಿಯರ ಅಥ್ಲೆಟಿಕ್ಸ್​: ಆಶಿಶ್​ ಯಾದವ್​ಗೆ ರಜತ ಹಾರ, ಫೈನಲ್​ಗೇರಿದ ಪೂಜಾ ಸಿಂಗ್

ಉತ್ತರ ಪ್ರದೇಶದ 19 ವರ್ಷದ ಆಶಿಶ್​ ಯಾದವ್​ ಮೂರನೇ ಎಸೆತದಲ್ಲಿ ಸರ್ವಾಧಿಕ 74.09 ಮೀ. ದೂರ ಜಾವೆಲಿನ್​ ಎಸೆದರು. ಸ್ಪರ್ಧೆಯಲ್ಲಿದ್ದ ಮತ್ತೋರ್ವ ಭಾರತೀಯ ಟಿ. ಧರಣೀಧರನ್​ 72.35 ಮೀ. ಎಸೆತದೊಂದಿಗೆ 6ನೇ ಸ್ಥಾನಕ್ಕೆ ತೃಪ್ತಿಪಟ್ಟರು.

74.49 ಮೀ. ಎಸೆತದ ವೈಯಕ್ತಿಕ ಶ್ರೇಷ್ಠ ದಾಖಲೆ ಹೊಂದಿರುವ ಆಶಿಶ್​, ಅದಕ್ಕಿಂತ 40 ಸೆಂಟಿ ಮೀಟರ್​ ಕಡಿಮೆ ದೂರ ಎಸೆದರು. ಈ ಸ್ಪರ್ಧೆಯ ಫೇವರಿಟ್​ ಎನಿಸಿದ್ದ ದ. ಆಫ್ರಿಕಾದ ಜಾನ್​ ಹೆಂಡ್ರಿಕ್​ ಹೇಮನ್ಸ್​ 80.50 ಮೀ. ದೂರದ ಎಸೆತದೊಂದಿಗೆ ನಿರೀಕ್ಷೆಯಂತೆಯೇ ಚಿನ್ನದ ಪದಕ ಬಾಚಿಕೊಂಡರೆ, ಡೊಮಿನಿಕಾದ ಆಡಿಸನ್​ ಜೇಮ್ಸ್​ 73.89 ಮೀ. ಎಸೆತದೊಂದಿಗೆ ಕಂಚು ಜಯಿಸಿದರು.

ಪುರುಷರ 400 ಮೀ. ಓಟದ ಹೀಟ್ಸ್​ನಲ್ಲಿ 20 ವಯೋಮಿತಿಯ ರಾಷ್ಟ್ರೀಯ ದಾಖಲೆ ಬರೆದಿದ್ದ ಕೇರಳದ ಮೊಹಮ್ಮದ್​ ಅಶ್ಫಕ್​ ಶುಕ್ರವಾರ ರಾತ್ರಿ ನಡೆದ ಫೈನಲ್​ನಲ್ಲಿ 46.20 ಸೆಕೆಂಡ್​ಗಳಲ್ಲಿ ಸ್ಪರ್ಧೆ ಮುಗಿಸಿ 8ನೇ ಸ್ಥಾನಕ್ಕೆ ತೃಪ್ತಿಪಟ್ಟರು. ಮಹಿಳೆಯರ ಜಾವೆಲಿನ್​ ಎಸೆತದಲ್ಲಿ ಪೂನಂ ಗರಿಷ್ಠ 48.81 ಮೀ. ಎಸೆತದೊಂದಿಗೆ ಫೈನಲ್​ ಪ್ರವೇಶಿಸಲು ವಿಫಲರಾಗಿ, 13ನೇ ಸ್ಥಾನಕ್ಕೆ ತೃಪ್ತಿಪಟ್ಟರು.

ರಾಷ್ಟ್ರೀಯ ಸೀನಿಯರ್​ ದಾಖಲೆ ಹೊಂದಿರುವ ಪೂಜಾ ಸಿಂಗ್​ ಮಹಿಳೆಯರ ಹೈಜಂಪ್​ ಸ್ಪರ್ಧೆಯಲ್ಲಿ ಫೈನಲ್​ ಪ್ರವೇಶಿಸಿದ್ದು, ಮತ್ತೊಂದು ಪದಕದ ನಿರೀಕ್ಷೆ ಮೂಡಿಸಿದ್ದಾರೆ. 19 ವರ್ಷದ ಪೂಜಾ 1.79 ಮೀ. ಎತ್ತರ ಜಿಗಿದರು. ಇದರಿಂದ ಅವರು ಫೈನಲ್​ಗೆ ನೇರಪ್ರವೇಶ ಪಡೆದರು. ಪೂಜಾ 1.93 ಮೀ. ಎತ್ತರ ಜಿಗಿತದ ರಾಷ್ಟ್ರೀಯ ದಾಖಲೆ ಹೊಂದಿದ್ದಾರೆ. ಪುರುಷರ ಲಾಂಗ್​ಜಂಪ್​ನಲ್ಲಿ ಶಹನ್​ವಾಜ್​ ಖಾನ್​ (7.73 ಮೀ) ಮತ್ತು ಜತಿನ್​ ಅರ್ಜುನ (7.57 ಮೀ.) ಕ್ರಮವಾಗಿ 5 ಮತ್ತು 12ನೇ ಸ್ಥಾನದೊಂದಿಗೆ ಫೈನಲ್​ ಪ್ರವೇಶಿಸಿದರು.