ಅಪೂರ್ವ್ ಕಾಂಬ್ಳೆ ‘ರೋಡ್ ಟು GCL’ ರ್ಯಾಪಿಡ್ ಚೆಸ್ ಟೂರ್ನಿಯಲ್ಲಿ ಚಾಂಪಿಯನ್: 80 ಮಂದಿಗೆ ಗ್ಲೋಬಲ್ ಚೆಸ್ ಲೀಗ್ ನೇರ ವೀಕ್ಷಣೆಯ ಪಾಸ್
ಬೆಂಗಳೂರು: 17 ವರ್ಷದ ಅಪೂರ್ವ್ ಕಾಂಬ್ಳೆ ಅವರು ಬೆಂಗಳೂರಿನ ಕೋರಮಂಗಲ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ‘ರೋಡ್ ಟು GCL’ FIDE-ರೇಟೆಡ್ ರ್ಯಾಪಿಡ್ ಚೆಸ್ ಟೂರ್ನಿಯಲ್ಲಿ 9 ಸುತ್ತುಗಳಿಂದ 8.5 ಅಂಕ ಗಳಿಸಿ ಪ್ರಶಸ್ತಿ ಗೆದ್ದರು. ಸಮ್ಮೇದ್ ಜಯಕುಮಾರ್ ಶೆಟ್ಟೆ ರನ್ನರ್-ಅಪ್ ಸ್ಥಾನ ಪಡೆದರೆ, ವೈದಾನಾಥನ್ ಕಣ್ಣನ್ ಮೂರನೇ ಸ್ಥಾನ ಗಳಿಸಿದರು.
700ಕ್ಕೂ ಹೆಚ್ಚು ಆಟಗಾರರು ಭಾಗವಹಿಸಿದ್ದ ಟೂರ್ನಿಯನ್ನು ಗ್ಲೋಬಲ್ ಚೆಸ್ ಲೀಗ್ ಸಹಯೋಗದಲ್ಲಿ CircleChess ಮೂಲಕ ಬೆಂಬಲಿತವಾಗಿ Golden Aura Trust ಆಯೋಜಿಸಿತ್ತು. ಸ್ವಿಸ್ ಮಾದರಿಯಲ್ಲಿ ನಡೆದ ಸ್ಪರ್ಧೆಯಲ್ಲಿ ಪ್ರತಿ ಆಟಕ್ಕೆ 10 ನಿಮಿಷಗಳ ಸಮಯದ ಜೊತೆಗೆ ಪ್ರತಿ ನಡೆಯ ನಂತರ 5 ಸೆಕೆಂಡ್ಗಳ ಇನ್ಕ್ರಿಮೆಂಟ್ ನೀಡಲಾಗಿತ್ತು. ಒಟ್ಟು ₹4 ಲಕ್ಷ ನಗದು ಬಹುಮಾನ ಮೊತ್ತವನ್ನು ಹೊಂದಿತ್ತು.
ಏಷ್ಯನ್ ಜೂನಿಯರ್ ಚಾಂಪಿಯನ್ಶಿಪ್ನಿಂದ ಹಿಂದಿರುಗಿದ ಬಳಿಕ ಕೊನೆಯ ಕ್ಷಣದಲ್ಲಿ ಟೂರ್ನಿಗೆ ನೋಂದಾಯಿಸಿಕೊಂಡಿದ್ದ ಅಪೂರ್ವ್, ಸಮ್ಮೇರ್ ಶೆಟ್ಟಿ ಮತ್ತು ಟಾಪ್ ಸೀಡ್ ವಿಷಕ್ ಎನ್ನಾ ವಿರುದ್ಧ ಪ್ರಮುಖ ಗೆಲುವುಗಳನ್ನು ದಾಖಲಿಸಿದರು.
“ಕೊನೆಯ ಕ್ಷಣದಲ್ಲಿ ನೋಂದಾಯಿಸಿಕೊಂಡಿದ್ದು ಉತ್ತಮ ನಿರ್ಧಾರವಾಗಿತ್ತು. 8.5 ಅಂಕಗಳೊಂದಿಗೆ ಗೆದ್ದಿರುವುದು ಹೆಚ್ಚಿನ ರೇಟಿಂಗ್ ಹೊಂದಿರುವ ಆಟಗಾರರನ್ನು ಎದುರಿಸಲು ಆತ್ಮವಿಶ್ವಾಸ ನೀಡಿದೆ,” ಎಂದು ಅಪೂರ್ವ್ ಹೇಳಿದರು.
ಹಾಲಿ ವಿಶ್ವ ಚಾಂಪಿಯನ್ ಗುಕೇಶ್ ಡಿ ಅವರ ಮಾಜಿ ಕೋಚ್ ಗ್ರ್ಯಾಂಡ್ಮಾಸ್ಟರ್ ವಿಷ್ಣು ಪ್ರಸನ್ನ ಕೂಡ ಟೂರ್ನಿಯಲ್ಲಿ ಭಾಗವಹಿಸಿದ್ದರು.ಈ ಉಪಕ್ರಮದ ಭಾಗವಾಗಿ 80 ಮಂದಿ ಭಾಗವಹಿಸುವವರು ಬೆಂಗಳೂರಿನಲ್ಲಿ ಸೆಪ್ಟೆಂಬರ್ 5ರಿಂದ 13ರವರೆಗೆ ನಡೆಯಲಿರುವ ಗ್ಲೋಬಲ್ ಚೆಸ್ ಲೀಗ್ ಸೀಸನ್ 4 ಅನ್ನು ನೇರವಾಗಿ ವೀಕ್ಷಿಸಲು ಪಾಸ್ಗಳನ್ನು ಗೆದ್ದರು.
ಗ್ಲೋಬಲ್ ಚೆಸ್ ಲೀಗ್ ಕಮಿಷನರ್ ಗೌರವ್ ರಕ್ಷಿತ್ ಐದನೇ ಸುತ್ತಿಗೂ ಮುನ್ನ ಬೋರ್ಡ್ ಒಂದರಲ್ಲಿ ಸಾಂಕೇತಿಕ ಮೊದಲ ನಡೆಯನ್ನು ಮಾಡಿದರು. “ರೋಡ್ ಟು GCL ಮೂಲಕ ಲೀಗ್ನ ಉತ್ಸಾಹವನ್ನು ಚೆಸ್ ಸಮುದಾಯದ ಹತ್ತಿರಕ್ಕೆ ತರುತ್ತಿದ್ದೇವೆ. ಬೆಂಗಳೂರಿನಲ್ಲಿ ದೊರೆತ ಪ್ರತಿಕ್ರಿಯೆ ಅತ್ಯಂತ ಉತ್ತೇಜನಕಾರಿಯಾಗಿದೆ,” ಎಂದರು.
ಟೆಕ್ ಮಹೀಂದ್ರಾ ಮತ್ತು FIDE ಜಂಟಿ ಸಹಭಾಗಿತ್ವದ ಗ್ಲೋಬಲ್ ಚೆಸ್ ಲೀಗ್ನಲ್ಲಿ ಮ್ಯಾಗ್ನಸ್ ಕಾರ್ಲ್ಸನ್, ವಿಶ್ವನಾಥನ್ ಆನಂದ್, ಅರ್ಜುನ್ ಎರಿಗೈಸಿ, ಇಯಾನ್ ನೆಪೊಮ್ನಿಯಾಚಿ, ಲೆವೊನ್ ಅರೋನಿಯನ್ ಸೇರಿದಂತೆ ಪ್ರಮುಖ ಆಟಗಾರರು ಭಾಗವಹಿಸಲಿದ್ದಾರೆ.