ನವದೆಹಲಿ: ಉದ್ಯೋಗಿಗಳ ಸಾಲು ಸಾಲು ರಾಜೀನಾಮೆ ನಡುವೆಯೇ ಟ್ವಿಟರ್ನ ನೂತನ ಮಾಲೀಕ ಎಲಾನ್ ಮಸ್ಕ್, ಹೊಸ ಟ್ವಿಟರ್ ನೀತಿಯನ್ನು ಘೋಷಣೆ ಮಾಡಿದ್ದಾರೆ.
ಹೊಸ ನೀತಿಯಲ್ಲಿ ವಾಕ್ ಸ್ವಾತಂತ್ರ್ಯ ಇರುತ್ತದೆ ಹೊರತು, ತಲುಪುವ ಸ್ವಾತಂತ್ರ್ಯ ಇರುವುದಿಲ್ಲ ಎನ್ನುವ ಮೂಲಕ ದ್ವೇಷಪೂರಿತ ಟ್ವೀಟ್ಗಳಿಗೆ ಕಡಿವಾಣ ಹಾಕಲು ಮಸ್ಕ್ ಮುಂದಾಗಿದ್ದಾರೆ. ನಿನ್ನೆಯಷ್ಟೇ ನೂರಾರು ಉದ್ಯೋಗಿಗಳು ರಾಜೀನಾಮೆ ನೀಡಿದ್ದಾರೆ. ಕಠಿಣ ಕೆಲಸದ ನೀತಿ ಹಿನ್ನೆಲೆಯಲ್ಲಿ ಉದ್ಯೋಗಿಗಳು ಟ್ವಿಟರ್ನಿಂದ ಹೊರ ಬಂದಿದ್ದಾರೆ. ಈಗಾಗಲೇ ಕಂಪನಿಯ ಒಟ್ಟು ಉದ್ಯೋಗಿಗಳಲ್ಲಿ ಅರ್ಧದಷ್ಟು ಕಡಿತಗೊಳಿಸಲಾಗಿದೆ.
ಹೊಸ ಟ್ವಿಟರ್ ನೀತಿಯ ಪ್ರಕಾರ ದ್ವೇಷದ ಟ್ವೀಟ್ಗಳನ್ನು ಡಿಬೂಸ್ಟ್ ಮತ್ತು ಡಿಮಾನಿಟೈಸ್ ಮಾಡಲಾಗುತ್ತದೆಯಂತೆ. ಇಲ್ಲಿ ವಾಕ್ ಸ್ವಾತಂತ್ರ್ಯ ಇರುತ್ತದೆ. ಆದರೆ, ತಲುಪುವ ಸ್ವಾತಂತ್ರ್ಯ (ದ್ವೇಷದ ಟ್ವೀಟ್ಗಳು) ಇರುವುದಿಲ್ಲ. ನೆಗಿಟಿವ್ ಮತ್ತು ದ್ವೇಷದ ಟ್ವೀಟ್ಗಳನ್ನು ಡಿಬೂಸ್ಟ್ ಮತ್ತು ಡಿಮಾನಿಟೈಸ್ ಮಾಡಲಾಗುವುದು. ಜಾಹೀರಾತು ಮತ್ತು ಇತರೆ ಆದಾಯಗಳನ್ನು ತಡೆಹಿಡಿಯಲಾಗುವುದು. ನೀವು ನಿರ್ದಿಷ್ಟವಾಗಿ ಅದನ್ನು ಹುಡುಕದ ಹೊರತು ನಿಮ್ಮ ಟ್ವೀಟ್ ಅನ್ನು ಕಂಡುಹಿಡಿಯಲಾಗುವುದಿಲ್ಲನ ಮತ್ತು ಇಂಟರ್ನೆಟ್ನ ಉಳಿದ ಭಾಗಗಳಿಗಿಂತ ಇದು ಭಿನ್ನವಾಗಿರುವುದಿಲ್ಲ ಎಂದು ಮಸ್ಕ್ ಅವರು ಟ್ವೀಟ್ ಮಾಡಿದ್ದಾರೆ.
ಈ ನಿಯಮ ವೈಯಕ್ತಿಕ ಟ್ವೀಟ್ಗೆ ಮಾತ್ರ ಅನ್ವಯಿಸುತ್ತದೆ ಹೊರತು ಸಂಪೂರ್ಣ ಖಾತೆಗೆ ಅಲ್ಲ ಎಂದು ಮಸ್ಕ್ ಸ್ಪಷ್ಟಪಡಿಸಿದ್ದಾರೆ.
ಕಳೆದ ವರ್ಷ ಕ್ಯಾಪಿಟಲ್ ಹಿಂಸಾಚಾರದ ನಂತರ ಅಮೆರಿಕ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಖಾತೆಯನ್ನು ನಿಷೇಧ ಮಾಡಲಾಗಿತ್ತು. ಇದೀಗ ಆ ಖಾತೆಯನ್ನು ಹಿಂತೆಗೆದುಕೊಳ್ಳುವ ಭರವಸೆ ನೀಡಿದ ತಿಂಗಳುಗಳ ನಂತರ, ಟ್ರಂಪ್ ಅವರ ಖಾತೆಯನ್ನು ಮರುಸ್ಥಾಪಿಸಬೇಕೆ ಎಂಬುದರ ಕುರಿತು ಮಸ್ಕ್ ಟ್ವಿಟರ್ ಸಮೀಕ್ಷೆಯನ್ನು ಪೋಸ್ಟ್ ಮಾಡಿದ್ದಾರೆ. (ಏಜೆನ್ಸೀಸ್)