ನ್ಯೂಯಾರ್ಕ್: ಅಮೆರಿಕ ಮೂಲದ 64 ವರ್ಷದ ಮಹಿಳೆಯೊಬ್ಬರು ಸ್ವಿಟ್ಜರ್ಲೆಂಡ್ನಲ್ಲಿ (Switzerland) ಸೂಸೈಡ್ ಪಾಡ್ (Suicide Pod) ಬಳಸಿ ಸಾವಿಗೆ ಶರಣಾಗಿದ್ದಾರೆ. ಈ ಯಂತ್ರವನ್ನು ಬಳಸಿ ಮೃತಪಟ್ಟ ಮೊದಲ ಪ್ರಕರಣ ಇದಾಗಿದ್ದು, ಆತ್ಮಹತ್ಯೆಗೆ ಪ್ರಚೋದನೆ ನೀಡಿದ ಆರೋಪದ ಮೇಲೆ ಹಲವರನ್ನು ಬಂಧಿಸಲಾಗಿದೆ.
ಅಂದಹಾಗೆ ಈ ಸೂಸೈಡ್ ಪಾಡ್ (Sarco pod) ಅಥವಾ ಆತ್ಮಹತ್ಯೆ ಕ್ಯಾಪ್ಸುಲ್ ಅನ್ನು ಹಿಂದೆಂದೂ ಕೂಡ ಬಳಸಿಲ್ಲ. ಮೂಲಗಳ ಪ್ರಕಾರ ಸೋಮವಾರ (ಸೆ.24) ಈ ಸೂಸೈಡ್ ಪಾಡ್ ಅನ್ನು ಮೊದಲ ಬಾರಿಗೆ ಬಳಸಲಾಗಿದೆ. ಈ ಪ್ರಕರಣದಲ್ಲಿ ಹಲವರನ್ನು ವಶಕ್ಕೆ ಪಡೆಯಲಾಗಿದ್ದು, ಮಹಿಳೆಯ ಆತ್ಮಹತ್ಯೆಗೆ ಸಹಕರಿಸಿರುವ ಆರೋಪ ಕೇಳಿಬಂದಿದೆ. ಸದ್ಯ ಪೊಲೀಸರು ತನಿಖೆಯನ್ನು ಮುಂದುವರಿಸಿದ್ದಾರೆ.
ಸಾರ್ಕೋ ಪಾಡ್ ಒಂದು ವಿವಾದಾತ್ಮಕ ಸೂಸೈಡ್ ಪಾಡ್ ಆಗಿದೆ. ಇದನ್ನು ಆತ್ಮಹತ್ಯೆ ಕ್ಯಾಪ್ಸುಲ್ ಅಂತಾನೂ ಕರೆಯುಲಾಗುತ್ತದೆ. ಇದರೊಳಗೆ ಒಬ್ಬರು ಪ್ರವೇಶಿಸಿ ಬಟನ್ ಒತ್ತಿದ ತಕ್ಷಣ ಸಾವು ಸಂಭವಿಸುತ್ತದೆ. ಸ್ವಿಸ್-ಜರ್ಮನ್ ಗಡಿಯ ಸಮೀಪದಲ್ಲಿರುವ ಮೆರಿಚೌಸೆನ್ ಪ್ರದೇಶದ ಅರಣ್ಯ ಪ್ರದೇಶದಲ್ಲಿ ಸೋಮವಾರ ಈ ಸೂಸೈಡ್ ಪಾಡ್ ಬಳಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸ್ವಿಟ್ಜರ್ಲೆಂಡ್ನಲ್ಲಿ ಅಸಿಸ್ಟೆಡ್ ಡೈಯಿಂಗ್ ದಶಕಗಳಿಂದ ಕಾನೂನುಬದ್ಧವಾಗಿದೆ. ಆದಾಗ್ಯೂ, ಇದನ್ನು ಕಟ್ಟುನಿಟ್ಟಾಗಿ ನಿಯಂತ್ರಿಸಲಾಗುತ್ತದೆ. ಆದರೆ, ದಯಾಮರಣ ವಿರೋಧಿಗಳು ಈ ಯಂತ್ರಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಈ ಪಾಡ್ ಒಳಗಿರುವ ಬಟನ್ ಬಳಸಿ ಆಪರೇಟ್ ಮಾಡಬಹುದು. ಯಾವುದೇ ವೈದ್ಯಕೀಯ ಮೇಲ್ವಿಚಾರಣೆಯಿಲ್ಲದೆ ತಮ್ಮ ಜೀವನವನ್ನು ಕೊನೆಗೊಳಿಸಲು ಇದು ಅನುಮತಿಸುತ್ತದೆ.
ಅಸಿಸ್ಟೆಡ್ ಡೈಯಿಂಗ್ ಗ್ರೂಪ್ ದಿ ಲಾಸ್ಟ್ ರೆಸಾರ್ಟ್ ಸಂಸ್ಥೆಯು ಜುಲೈನಲ್ಲಿ ಜ್ಯೂರಿಚ್ನಲ್ಲಿ ಸಾರ್ಕೋ ಪಾಡ್ ಅನ್ನು ಪ್ರಸ್ತುತಪಡಿಸಿತು. ಈ ಕ್ಯಾಪ್ಸೂಲ್ನಲ್ಲಿ ಆಮ್ಲಜನಕ ಮಟ್ಟ ತೀರಾ ಕಡಿಮೆಯಾಗಿ ಹೈಪೋಕ್ಸಿಯಾ (ಜೀವಕೋಶಕ್ಕೆ ಆಮ್ಲಜನಕ ಲಭ್ಯತೆ ಕುಸಿಯುವುದು) ಮೂಲಕ ಸಾವು ಬರುತ್ತದೆ. ದಯಾ ಮರಣ ಬಯಸಿದವರು ಇಚ್ಛಿಸಿದ ಜಾಗಕ್ಕೆ ಕ್ಯಾಪ್ಸೂಲ್ ಒಯ್ಯಲಾಗುತ್ತದೆ ಎಂದು ಈ ಕ್ಯಾಪ್ಸೂಲ್ ತಯಾರಿಸಿರುವ ಕಂಪನಿ ಹೇಳಿದೆ. ಜೈವಿಕವಿಘಟನೆಯ (ಬಯೋಡಿಗ್ರೆಡೇಬಲ್) ಕ್ಯಾಪ್ಸೂಲ್ ಅನ್ನು ಶವಪೆಟ್ಟಿಗೆಯಾಗಿ ಕಾರ್ಯ ನಿರ್ವಹಿಸುವಂತಾಗಲು ಅದನ್ನು ಬೇಸ್ನಿಂದ ಬೇರ್ಪಡಿಸಲಾಗುತ್ತದೆ.
‘ಡಾಕ್ಟರ್ ಡೆತ್’: ಆತ್ಮಹತ್ಯೆ ಕೋಶ (ಸೂಸೈಡ್ ಪಾಡ್) ‘ಡಾಕ್ಟರ್ ಡೆತ್’ ಎಂದೇ ಕುಖ್ಯಾತನಾಗಿರುವ ಫಿಲಿಪ್ ನಿಶ್ಚೆಕ್ ಈ ಚಿಂತನೆಯ ಕೂಸು ಈ ಕ್ಯಾಪ್ಸೂಲ್ ಎಂದು ಹೇಳಲಾಗಿದೆ. ನ್ಯೂಜಿಲೆಂಡ್ನಲ್ಲಿ ಅಸಿಸ್ಟೆಡ್ ಸೂಸೈಡ್ ಕಾನೂನುಬದ್ಧ ವಾಗಿದ್ದು ಕಳೆದ ವರ್ಷ ಸುಮಾರು 1,300 ಜನರು ದಯಾಮರಣ ಸಂಸ್ಥೆಗಳ ಸೇವೆಯನ್ನು ಬಳಸಿಕೊಂಡಿದ್ದಾರೆ. (ಏಜೆನ್ಸೀಸ್)