ವಾರ್ಷಿಕ ಅಮರನಾಥ ಯಾತ್ರೆ ಜುಲೈ 21ರಂದು ಆರಂಭವಾಗಲಿದೆ. ಯಾತ್ರೆ ಅವಧಿಯನ್ನು ಕೋವಿಡ್-19 ಹಿನ್ನೆಲೆಯಲ್ಲಿ 15 ದಿನಗಳಿಗೆ ಕಡಿತ ಮಾಡಲಾಗಿದ್ದು, ಭಕ್ತರ ಸಂಖ್ಯೆ ಮೇಲೆ ಕೂಡ ಮಿತಿ ಹೇರಲಾಗಿದೆ. ಕರೊನಾ ಸಂಬಂಧಿತ ಇನ್ನೂ ಹಲವು ನಿರ್ಬಂಧಗಳನ್ನೂ ಪಾಲಿಸಲಾಗುತ್ತದೆ ಎಂದು ಅಮರನಾಥ ದೇವಾಲಯ ಮಂಡಳಿ (ಎಸ್ಎಎಸ್ಬಿ) ಅಧಿಕಾರಿಗಳು ಪ್ರಕಟಿಸಿದ್ದಾರೆ. ಅಮರನಾಥ ಯಾತ್ರೆ ಸುಗಮವಾಗಿ ನಡೆಸುವ ಸಲುವಾಗಿ ಅನಂತನಾಗ್ ಜಿಲ್ಲಾಧಿಕಾರಿ ಕುಲದೀಪ್ ಕುಮಾರ್ ಸಿದ್ಧ ಅಧಿಕಾರಿಗಳ ಸರಣಿ ಸಭೆಗಳನ್ನು ನಡೆಸಿದ್ದಾರೆ. ಲೆಫ್ಟಿನೆಂಟ್ ಗವರ್ನರ್ರ ಸಲಹೆಗಾರರು ಕೂಡ ಸಭೆ ನಡೆಸಿ ಸಿದ್ಧತೆ ಪರಿಶೀಲಿಸಿದ್ದಾರೆ.
ಆರತಿ ನೇರ ಪ್ರಸಾರ: ಸಾಧುಗಳು ಹೊರತು ಪಡಿಸಿ ಉಳಿದವರು ಕಡ್ಡಾಯವಾಗಿ ಆನ್ಲೈನ್ ಮೂಲಕ ಹೆಸರು ನೋಂದಾಯಿಸಿಕೊಳ್ಳಬೇಕು. ಯಾತ್ರೆಯ ಎಲ್ಲ 15 ದಿನ ಆರತಿಯ ಕಾರ್ಯಕ್ರಮವನ್ನು ನೇರ ಪ್ರಸಾರ ಮಾಡಲು ಮಂಡಳಿ ನಿರ್ಧರಿಸಿದೆ.
ಹೆಲಿಕಾಪ್ಟರ್ ಬಳಕೆ: ಸ್ಥಳೀಯ ಕಾರ್ವಿುಕರು ಸಿಗದಿರುವುರಿಂದ, ಮೂಲ ಶಿಬಿರದಿಂದ ಗುಹಾಲಯದ ವರೆಗಿನ ರಸ್ತೆ ನಿರ್ವಹಣೆ ಕಷ್ಟವಾಗಿರುವುದರಿಂದ 2020ರ ಯಾತ್ರೆಯನ್ನು ಹೆಲಿಕಾಪ್ಟರ್ ಮೂಲಕ ನಡೆಸಲಾಗುತ್ತದೆ. ಹೀಗಾಗಿ ಯಾತ್ರಿಗಳ ಪ್ರಯಾಣಕ್ಕೆ ಗಂಡರ್ಬಾಲ್ ಜಿಲ್ಲೆಯ ಬಲ್ಟಾಲ್ ಮೂಲ ಶಿಬಿರದಿಂದ ಗುಹಾಲಯದ ವರೆಗೆ ಹೆಲಿಕಾಪ್ಟರ್ಗಳನ್ನು ಬಳಸಲಾಗುತ್ತದೆ. ಯಾತ್ರೆಯ ಮಾರ್ಗದಲ್ಲಿ ಕೂಡ ಬದಲಾವಣೆ ಮಾಡಲಾಗಿದೆ. ಉತ್ತರ ಕಾಶ್ಮೀರದ ಬಲ್ಟಾಲ್ ಮಾರ್ಗದ ಮೂಲಕ ಮಾತ್ರವೇ ಈ ಬಾರಿ ಯಾತ್ರೆ ಕೈಗೊಳ್ಳಲಾಗುತ್ತದೆ. ಸಾಂಪ್ರದಾಯಿಕ ಫಲ್ಗಾಮ್ ಮಾರ್ಗದ ಮೂಲಕ ಯಾತ್ರೆಗೆ ಅವಕಾಶ ನೀಡಲಾಗುವುದಿಲ್ಲ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ಎಲ್ಲಿದೆ?
ಕೋವಿಡ್ ನಿರ್ಬಂಧಗಳು
ಕರೊನಾ ಮಹಾಮಾರಿ ಹಿನ್ನೆಲೆಯಲ್ಲಿ ಈ ಬಾರಿ ಯಾತ್ರಿಗಳಿಗೆ ಹಲವು ನಿರ್ಬಂಧ ವಿಧಿಸಲಾಗಿದೆ.
* ಯಾತ್ರಿಗಳ ಸಂಖ್ಯೆಯನ್ನು 5000ಕ್ಕೆ ಸೀಮಿತಗೊಳಿಸಲಾಗಿದೆ. ಪ್ರತಿವರ್ಷ ಲಕ್ಷಾಂತರ ಭಕ್ತರು ಭೇಟಿ ಕೊಡುತ್ತಿದ್ದರು.
* ಸಾಧುಗಳನ್ನು ಹೊರತುಪಡಿಸಿ ಉಳಿದಂತೆ 55 ವರ್ಷ ಮೇಲ್ಪಟ್ಟ ಭಕ್ತರಿಗೆ ಯಾತ್ರೆ ಹೋಗಲು ಅವಕಾಶವಿಲ್ಲ.
* ಯಾತ್ರಿಗಳು ಕೋವಿಡ್ ನೆಗೆಟಿವ್ ವರದಿ ಪ್ರಮಾಣಪತ್ರ ಹೊಂದಿರುವುದು ಕಡ್ಡಾಯ.
* ಪ್ರಮಾಣಪತ್ರ ಇದ್ದರೂ ಜಮ್ಮು- ಕಾಶ್ಮೀರ ಪ್ರವೇಶಿಸಿದ ಕೂಡಲೇ ಭಕ್ತರನ್ನು ಮತ್ತೆ ಪರೀಕ್ಷೆಗೆ ಒಳಪಡಿಸಲಾಗುವುದು.