ನವದೆಹಲಿ: ರಾಷ್ಟ್ರಪತಿ, ಉಪರಾಷ್ಟ್ರಪತಿ, ಪ್ರಧಾನಮಂತ್ರಿಯವರ ಪ್ರಯಾಣಕ್ಕಾಗಿ ವಿಶೇಷವಾಗಿ ಸಿದ್ಧಪಡಿಸಿದ B777 ವಿಮಾನ ಏರ್ ಇಂಡಿಯಾ ಒನ್ ಅಮೆರಿಕದಿಂದ ಹೊರಟು ದೆಹಲಿಯ ಇಂದಿರಾಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಗುರುವಾರ ಲ್ಯಾಂಡ್ ಆಗಿದೆ. ಈ ವಿಮಾನ ಜುಲೈನಲ್ಲೇ ಭಾರತಕ್ಕೆ ಆಗಮಿಸಬೇಕಾಗಿತ್ತು. ಆದರೆ, ತಾಂತ್ರಿಕ ಕಾರಣಗಳಿಂದಾಗಿ ಹಸ್ತಾಂತರ ಎರಡು ಬಾರಿ ಮುಂದೂಡಲ್ಪಟ್ಟಿತ್ತು.
ಗುರುವಾರ ಅಪರಾಹ್ನ 3 ಗಂಟೆಗೆ ಏರ್ ಇಂಡಿಯಾ ಒನ್ ಲ್ಯಾಂಡ್ ಆಗಿದೆ. ಇನ್ನೊಂದು ವಿಮಾನ ಮುಂದಿನ ಕೆಲವೇ ದಿನಗಳಲ್ಲಿ ಭಾರತಕ್ಕೆ ಹಸ್ತಾಂತರಗೊಳ್ಳಲಿದೆ. ಅಮೆರಿಕದ ಬೋಯಿಂಗ್ ನಿರ್ಮಿತ ವಿಮಾನಗಳಿವು. 2018ರಲ್ಲಿ ಏರ್ಇಂಡಿಯಾ ಈ ಎರಡು ವಿಮಾನಗಳನ್ನು ಗಣ್ಯರ ಪ್ರಯಾಣಕ್ಕೆ ಮರುವಿನ್ಯಾಸಗೊಳಿಸುವುದಕ್ಕೆ ಅಮೆರಿಕದ ಬೋಯಿಂಗ್ ಕಂಪನಿಗೆ ರವಾನಿಸಿತ್ತು. ಈ ಮರುವಿನ್ಯಾಸಕ್ಕೆ 8.400 ಕೋಟಿ ರೂಪಾಯಿ ಅಂದಾಜಿಸಲಾಗಿತ್ತು.
ಗಣ್ಯರನ್ನು ಕರೆದೊಯ್ಯುವ B777 ವಿಮಾನಗಳು ಕ್ಷಿಪಣಿ ನಿರೋಧಕ ವ್ಯವಸ್ಥೆ - ಲಾರ್ಜ್ ಏರ್ಕ್ರಾಫ್ಟ್ ಇನ್ಫ್ರಾರೆಡ್ ಕೌಂಟರ್ಮೆಷರ್ಸ್ ಆ್ಯಂಡ್ ಸೆಲ್ಫ್ ಪ್ರೊಟೆಕ್ಷನ್ ಸ್ಯೂಟ್ಸ್ ಅನ್ನು ಹೊಂದಿರುತ್ತವೆ. ಫೆಬ್ರವರಿ ತಿಂಗಳಲ್ಲಿ ಅಂತಹ ಎರಡು ಸಿಸ್ಟಮ್ ಅನ್ನು ಭಾರತಕ್ಕೆ 190 ದಶಲಕ್ಷ ಡಾಲರ್ಗೆ ಮಾರಾಟ ಮಾಡಲು ಅಮೆರಿಕ ಒಪ್ಪಿಗೆ ನೀಡಿತ್ತು. ಏರ್ಇಂಡಿಯಾ ಒನ್ ವಿಮಾನಗಳನ್ನು ಭಾರತೀಯ ವಾಯುಪಡೆಯ ಪೈಲಟ್ಗಳೇ ಮುನ್ನಡೆಸಲಿದ್ದಾರೆ.
ಪ್ರಸ್ತುತ ರಾಷ್ಟ್ರಪತಿ, ಉಪರಾಷ್ಟ್ರಪತಿ, ಪ್ರಧಾನಿಯವರು ಏರ್ ಇಂಡಿಯಾದ B747 ವಿಮಾನವನ್ನು ಪ್ರಯಾಣಕ್ಕೆ ಬಳಸುತ್ತಿದ್ದಾರೆ. ಈ ವಿಮಾನಗಳ ನಿರ್ವಹಣೆಯನ್ನು ಏರ್ ಇಂಡಿಯಾ ಇಂಜಿನಿಯರಿಂಗ್ ಸರ್ವೀಸಸ್ ಲಿಮಿಟೆಡ್ ನೋಡಿಕೊಳ್ಳುತ್ತಿದೆ. ಹೊಸ ವಿಮಾನ ಬಳಕೆ ಶುರುವಾದ ಬಳಿಕ B747 ವಿಮಾನಗಳು ವಾಣಿಜ್ಯ ಬಳಕೆ ಆಗಲಿವೆ ಎಂದು ಮೂಲಗಳು ತಿಳಿಸಿವೆ. (ಏಜೆನ್ಸೀಸ್)