ಅಬುಜಾ: ಅಮೆರಿಕ ಮೂಲದ ಟ್ವಿಟ್ಟರ್ ಇದೀಗ ಹಲವು ರಾಷ್ಟ್ರಗಳೊಂದಿಗೆ ವಾದ ವಿವಾದಗಳನ್ನು ಮಾಡಿಕೊಳ್ಳುತ್ತಿದೆ. ನೈಜೀರಿಯಾದ ಅಧ್ಯಕ್ಷ ಮುಹಮ್ಮದು ಬುಹಾರಿ ಅವರ ಟ್ವೀಟ್ ಅನ್ನೇ ಡಿಲೀಟ್ ಮಾಡಿದ ನಂತರ ಸಿಟ್ಟಿಗೆದ್ದ ರಾಷ್ಟ್ರ ತಮ್ಮ ದೇಶದಲ್ಲಿ ಟ್ವಿಟ್ಟರ್ನ್ನೇ ಬ್ಯಾನ್ ಮಾಡಿತ್ತು. ಇದೀಗ ಆ ರಾಷ್ಟ್ರದಲ್ಲಿ ಟ್ವಿಟ್ಟರ್ ಬದಲು ಬೆಂಗಳೂರಿನ ಕೂ ಬಳಕೆ ಆರಂಭವಾಗಿದೆ.
ಹೌದು. ನೈಜೀರಿಯಾದಲ್ಲಿ ಕಳೆದ ವಾರವೇ ಟ್ವಿಟ್ಟರ್ನ್ನು ಬ್ಯಾನ್ ಮಾಡಲಾಗಿದೆ. ದೇಶದಲ್ಲಿ ಕಚೇರಿ ಆರಂಭಿಸಿ, ಅಲ್ಲಿನ ನಿಯಮಗಳಿಗೆ ಒಪ್ಪಿಕೋಮಡು ನಡೆಯುವುದಾದರೆ ಮಾತ್ರವೇ ಟ್ವಿಟ್ಟರ್ಗೆ ಸ್ಥಾನ ಕೊಡಲಾಗುವುದು ಎಂದು ಹೇಳಲಾಗಿದೆ. ಇದೀಗ ಅದರ ಬೆನ್ನಲ್ಲೇ ನೈಜೀರಿಯಾ ಕೂ ಆ್ಯಪ್ನಲ್ಲಿ ಖಾತೆ ತೆರೆದಿದೆ. ಟ್ವಿಟ್ಟರ್ನ ರೀತಿಯಲ್ಲೇ ಬಳಕೆಯಾಗುವ ಕೂಗೆ ಜೈ ಎಂದಿದೆ.
ಈ ವಿಚಾರವನ್ನು ಸ್ವತಃ ಕೂ ಸಂಸ್ಥೆಯ ಸಹ ಸಂಸ್ಥಾಪಕ ಆರ್ ಅಪ್ರಮೇಯ ತಿಳಿಸಿದ್ದಾರೆ. ಕೂ ಆ್ಯಪ್ನ್ನು ಬೆಂಗಳೂರಿನ ಜಯಗರದಲ್ಲಿರುವ ವೋಕಲ್ (ಬಾಂಬಿನೇಟ್ ಟೆಕ್ನಾಲಜೀಸ್) ಸಂಸ್ಥೆ ತಯಾರಿಸಿದೆ. ಟ್ವಿಟ್ಟರ್ನ ಕೆಲ ಲೋಪದೋಷಗಳು ಕಾಣಿಸಿಕೊಳ್ಳುತ್ತಿದ್ದಂತೆಯೇ ಕೂ ಆ್ಯಪ್ಗೆ ಎಲ್ಲಿಲ್ಲದ ಬೇಡಿಕೆ ಬಂದಿದೆ. ಬಾಲಿವುಡ್ ನಟಿ ಕಂಗನಾ ರಣಾವತ್ ಇಂದ ಹಿಡಿದು ಅನೇಕ ಸೆಲೆಬ್ರಿಟಿಗಳೂ ಈ ಆ್ಯಪ್ ಬಳಕೆ ಮಾಡಲಾರಂಭಿಸಿದ್ದಾರೆ. ಭಾರತ ಮತ್ತು ಟ್ವಿಟ್ಟರ್ ಸಂಸ್ಥೆಯ ನಡುವೆಯೂ ಕೆಲ ಭಿನ್ನಾಭಿಪ್ರಾಯಗಳು ಇರುವುದರಿಂದಾಗಿ ಕೂ ಗೆ ಹೆಚ್ಚಿನ ಮನ್ನಣೆ ಸಿಗುವಂತಾಗಿದೆ. (ಏಜೆನ್ಸೀಸ್)