ನವದೆಹಲಿ: ಸಾಮಾಜಿಕ ಜಾಲತಾಣದಲ್ಲಿ ಸದಾ ಸಕ್ರಿಯರಾಗಿರುವ ಭಾರತೀಯ ಅರಣ್ಯಾಧಿಕಾರಿ ಸುಶಾಂತ್ ನಂದಾ ಅವರು ಆಗಾಗ ಜೀವ ಸಂಕುಲದ ಅದ್ಭುತ ಫೋಟೋ ಅಥವಾ ವಿಡಿಯೋಗಳನ್ನು ಹರಿಬಿಡುತ್ತಿರುತ್ತಾರೆ.
ಅದೇ ರೀತಿಯಾಗಿ ಇಂದು ಕೂಡ ತಮ್ಮ ಟ್ವಿಟರ್ ಬತ್ತಳಿಕೆಗೆ ಮತ್ತೊಂದು ವಿಡಿಯೋ ಶೇರ್ ಮಾಡಿಕೊಂಡಿದ್ದು, ಎಂದಿನಂತೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ವಿಡಿಯೋದಲ್ಲಿ ಏನಿದೆ?: ಕೇವಲ 11 ಸೆಕೆಂಡಿನ ವಿಡಿಯೋದಲ್ಲಿ ನೆಲದ ಮೇಲೆ ಹರಿದಾಡುವ ಬಿಳಿ ಬಣ್ಣದ ಕೀಟವನ್ನು ಮಣ್ಣಿನಡಿಯಿಂದಲೇ ಅಪರೂಪದ ಎಂಟು ಕಾಲಿನ ಆಫ್ರಿಕನ್ ರೆಡ್ ಟ್ರ್ಯಾಪ್ಡೋರ್ ಜೇಡ ಹೊಂಚು ಹಾಕಿ ಬೇಟೆಯಾಡುವ ಅದ್ಭುತ ದೃಶ್ಯವಿದೆ.
ಅಂದಹಾಗೇ ಈ ವಿಡಿಯೋವನ್ನು ಮೊದಲ ಲ್ಯಾಟ್ ಬೈಬಲ್(LADbible) ಎಂಬ ಫೇಸ್ಬುಕ್ ಪೇಜ್ನಲ್ಲಿ ಅಪ್ಲೋಡ್ ಮಾಡಲಾಗಿದೆ. ಈ ವಿಡಿಯೋವನ್ನು ಅಮೆರಿಕದಲ್ಲಿ ಚಿತ್ರೀಕರಿಸಲಾಗಿದೆ. ಇದನ್ನು ಅಮೆರಿಕದ ನ್ಯಾಶ್ವಿಲ್ಲೆ ನಿವಾಸಿ ಆ್ಯಂಡ್ರಿಯಾ ವ್ಯಾನ್ ವೆಗ್ಗೆಲ್ ಎಂಬುವರು ಚಿತ್ರೀಕರಿಸಿದ್ದಾರೆ. ಈಗಾಗಲೇ ಈ ವಿಡಿಯೋವನ್ನು 2 ಲಕ್ಷಕ್ಕೂ ಹೆಚ್ಚು ಮಂದಿ ವೀಕ್ಷಣೆ ಮಾಡಿದ್ದಾರೆ.
ಅಂದಹಾಗೆ ಆಫ್ರಿಕನ್ ರೆಡ್ ಟ್ರ್ಯಾಪ್ಡೋರ್ ಭೂಮಿಯ ಒಳಗಡೆಯೇ ಬಲೆಯನ್ನು ನಿರ್ಮಿಸುತ್ತವೆ. ತನ್ನ ಜೀವಾತವಧಿಯಲ್ಲಿ ಹೆಚ್ಚು ಕಾಲ ಮಣ್ಣಿನಡಿಯಲ್ಲೇ ವಾಸಿಸುತ್ತವೆ. ಕೀಟ ಮತ್ತು ಹಾವು, ಇಲಿ ಹಾಗೂ ಪಕ್ಷಿಗಳ ಮರಿಗಳನ್ನು ತಿಂದು ಬದುಕುತ್ತವೆ. (ಏಜೆನ್ಸೀಸ್)