ಘಜನಿ: ತನ್ನ ಕಣ್ಣೆದುರೇ ಅಪ್ಪ-ಅಮ್ಮನನ್ನು ಕೊಂದ ತಾಲಿಬಾನಿ ಉಗ್ರರನ್ನು ಬಾಲಕಿಯೋರ್ವಳು ಗುಂಡು ಹೊಡೆದು ಕೊಂದು, ಧೈರ್ಯ ಮೆರೆದಿದ್ದಾಳೆ.
ಈ ಶಾಲಾ ಬಾಲಕಿಯ ಗುಂಡೇಟಿಗೆ ಇಬ್ಬರು ತಾಲಿಬಾನಿ ಭಯೋತ್ಪಾದಕರು ಬಲಿಯಾಗಿದ್ದು, ಇನ್ನೂ ಹಲವರು ಗಾಯಗೊಂಡಿದ್ದಾರೆ.
ಬಾಲಕಿಯ ತಂದೆ ಸರ್ಕಾರದ ಬೆಂಬಲಿಗರಾಗಿದ್ದು, ಪ್ರಮುಖ ಸ್ಥಾನದಲ್ಲಿ ಇದ್ದವರು. ಇದೇ ಕಾರಣಕ್ಕೆ ತಾಲಿಬಾನ್ ಹೋರಾಟಗಾರರ ಕೆಂಗಣ್ಣಿಗೆ ಗುರಿಯಾಗಿದ್ದರು ಎಂದು ವರದಿಯಾಗಿದೆ.
ಘೋರ್ನ ಕೇಂದ್ರೀಯ ಪ್ರಾಂತ್ಯದಲ್ಲಿರುವ ಹಳ್ಳಿಯೊಂದರ ನಿವಾಸಿ ಈ ಬಾಲಕಿ. ಈಕೆಯ ಹೆಸರು ಕಮರ್ ಗುಲ್. ಕಳೆದ ವಾರ ಇವಳ ಮನೆಗೆ ನುಗ್ಗಿದ ನುಸುಳುಕೋರರು, ತಂದೆ-ತಾಯಿ ಇಬ್ಬರನ್ನೂ ಮನೆಯಿಂದ ಹೊರಗೆಳೆದುಕೊಂಡು ಹೋಗಿ, ಅಮಾನುಷವಾಗಿ ಹತ್ಯೆ ಮಾಡಿದ್ದಾರೆ. ಬಾಲಕಿಯ ತಂದೆ ಹಳ್ಳಿಯ ಮುಖ್ಯಸ್ಥನೂ ಆಗಿದ್ದವರಾಗಿದ್ದು, ಸರ್ಕಾರದ ಬೆಂಬಲಿಗರಾಗಿದ್ದರು ಎಂದು ಸ್ಥಳೀಯ ಪೊಲೀಸ್ ಅಧಿಕಾರಿ ಹಬೀಬುರಹ್ಮಾನ್ ಮಲೇಕ್ಝಾದಾ ತಿಳಿಸಿದ್ದಾರೆ.
ಹಳ್ಳಿಯ ಮುಖ್ಯಸ್ಥನನ್ನು ಕೊಲ್ಲಲು ಮುಂದಾದ ತಾಲಿಬಾನ್ ಉಗ್ರರನ್ನು ಅವರ ಪತ್ನಿ ತಡೆಯಲು ಪ್ರಯತ್ನಿಸಿದ್ದಾರೆ. ಆಗ ಅವರನ್ನೂ ಉಗ್ರರು ಹತ್ಯೆ ಮಾಡಿದ್ದಾರೆ.
ಅದೇ ವೇಳೆ ಬಾಲಕಿ ಕಮರ್ ಗುಲ್ ಮನೆಯೊಳಗೆ ಇದ್ದಳು. ಸ್ವಲ್ಪವೂ ತಡ ಮಾಡದೆ ಮನೆಲ್ಲಿ ಇದ್ದ ಎಕೆ 47 ಗನ್ ತೆಗೆದುಕೊಂಡು ಬಂದು ತಾಲಿಬಾನ್ ಉಗ್ರರ ಕಡೆಗೆ ಗುಂಡು ಹಾರಿಸಿದ್ದಾಳೆ. ತನ್ನ ತಂದೆ-ತಾಯಿಯನ್ನು ಕೊಂದ ಇಬ್ಬರನ್ನು ಹತ್ಯೆಗೈದಿದ್ದಾಳೆ. ಹಾಗೇ ನಾಲ್ಕೈದು ಉಗ್ರರು ತೀವ್ರ ಗಾಯಗೊಂಡಿದ್ದಾರೆ ಎಂದು ಪೊಲೀಸ್ ಮಾಹಿತಿ ನೀಡಿದ್ದಾರೆ. ಇದನ್ನೂ ಓದಿ: ಕರೊನಾ ಹೊತ್ತಲ್ಲಿ ಪುನೀತ್ ರಾಜಕುಮಾರ್ ‘ಏನು ಮಾಡೋದು ಸ್ವಾಮಿ..’ ಅಂತಿರೋದ್ಯಾಕೆ?
ಗಲ್ ಗೆ 14-16ವರ್ಷ ಆಗಿರಬಹುದು. ನಿಖರವಾದ ವಯಸ್ಸು ಗೊತ್ತಿಲ್ಲ. ಆಕೆ ಉಗ್ರರನ್ನು ಕೊಲ್ಲುತ್ತಿದ್ದಂತೆ ಇನ್ನಷ್ಟು ಜನ ಬಂದು ಅವಳ ಮನೆಯ ಮೇಲೆ ದಾಳಿ ಮಾಡಿದರು. ಆದರೆ ಅಷ್ಟರಲ್ಲಾಗಲೇ ಪೊಲೀಸ್, ಭದ್ರತಾ ಸಿಬ್ಬಂದಿಯೂ ಅಲರ್ಟ್ ಆಗಿದ್ದರು. ಬಾಲಕಿಯನ್ನು ರಕ್ಷಿಸಲಾಗಿದ ಎಂದು ಹೇಳಿದ್ದಾರೆ.
ಸದ್ಯ ಗಲ್ ಮತ್ತು ಆಕೆಯ ತಮ್ಮನನ್ನು ಸುರಕ್ಷಿತ ಜಾಗದಲ್ಲಿ ಇಡಲಾಗಿದೆ. ಈ ಸುದ್ದಿ ವೈರಲ್ ಆಗುತ್ತಿದ್ದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಬಾಲಕಿಯ ಬಗ್ಗೆ ಅಪಾರ ಪ್ರಶಂಸೆ ವ್ಯಕ್ತವಾಗಿದೆ. ಹಲವು ಗಣ್ಯರೂ ಅವಳನ್ನು ಹೊಗಳಿದ್ದಾರೆ ಎಂದು ತಿಳಿಸಿದ್ದಾರೆ. (ಏಜೆನ್ಸೀಸ್)