ತಂಜಾವೂರು: ತಮಿಳುನಾಡಿನ ( Tamil Nadu ) ಕಡಲೂರು ಜಿಲ್ಲೆಯಲ್ಲಿ ಸಾವಿರ ವರ್ಷಗಳಷ್ಟು ಹಳೆಯದಾದ ಶಿವಲಿಂಗ ( Shivalinga ) ಪತ್ತೆಯಾಗಿದೆ. ಕಡಲೂರಿನ ಶ್ರೀಮುಷ್ಣಂ ಸಮೀಪದ ಚೋಳಧರಂ ಗ್ರಾಮದಲ್ಲಿ ಶಿವಲಿಂಗ ಪತ್ತೆಯಾಗಿದೆ.
ಮರಗಳನ್ನು ಕಡಿಯುತ್ತಿದ್ದಾಗ ಎರಡು ಬೃಹತ್ ಮರಗಳ ನಡುವೆ ಮಣ್ಣಿನಲ್ಲಿ ಆಳವಾಗಿ ಹೂತು ಹೋಗಿದ್ದ ಶಿವಲಿಂಗ ಪತ್ತೆಯಾಗಿದೆ. ಮರಗಳ ಬೇರುಗಳು ಶಿವಲಿಂಗದ ಸುತ್ತಲೂ ಇದ್ದವು. ಮಾಹಿತಿ ಪಡೆದ ಅರಣ್ ಪಾನಿ ಟ್ರಸ್ಟ್ (ಪುಣ್ಯ ಸೇವಾ ಸೇವಾ ಪ್ರತಿಷ್ಠಾನ) ಸದಸ್ಯರು ಸಂಪೂರ್ಣ ಭದ್ರತೆಯೊಂದಿಗೆ ಶಿವಲಿಂಗವನ್ನು ಬೇರೆಡೆಗೆ ಸ್ಥಳಾಂತರಿಸಿದ್ದಾರೆ.
ಸಾವಿರಾರು ವರ್ಷ ಹಳೆಯದಾದ ಶಿವಲಿಂಗ ಪತ್ತೆಯಿಂದ ಸ್ಥಳೀಯರು ಅಚ್ಚರಿಗೊಂಡಿದ್ದಾರೆ. ಭೂಮಿಯ ಕೆಳಗೆ ಅಡಗಿದ್ದ ಈ ನಿಧಿಯ ಬಗ್ಗೆ ನಮಗೆ ತಿಳಿದಿರಲಿಲ್ಲ. ಈಗ ನಮ್ಮ ಸಾಂಸ್ಕೃತಿಕ ಮತ್ತು ಧಾರ್ಮಿಕ ಪರಂಪರೆಯ ಪ್ರಮುಖ ಭಾಗವು ಬಹಿರಂಗವಾಗಿದೆ ಎಂದು ಗ್ರಾಮಸ್ಥರು ಸಂತಸ ವ್ಯಕ್ತಪಡಿಸಿದ್ದಾರೆ. ಶಿವಲಿಂಗವನ್ನು ಮತ್ತೆ ಪ್ರತಿಷ್ಠಾಪನೆ ಮಾಡಿ ಅದರ ರಕ್ಷಣೆಗೆ ಮುಂದಾಗಿದ್ದೇವೆ ಎನ್ನುತ್ತಾರೆ ಸ್ಥಳೀಯರು.
ಅರಣ್ ಪಾನಿ ಟ್ರಸ್ಟ್ ತಮಿಳುನಾಡಿನಾದ್ಯಂತ ಪ್ರಾಚೀನ ಶಿವಲಿಂಗಗಳನ್ನು ಪುನರುಜ್ಜೀವನಗೊಳಿಸುವ ಮತ್ತು ಸಂರಕ್ಷಿಸುವ ಗುರಿಯನ್ನು ಹೊಂದಿದೆ. ಪ್ರಸ್ತುತ ಪತ್ತೆಯಾಗಿರುವ ಶಿವಲಿಂಗವನ್ನು ನೋಡಲು ಮತ್ತು ಪೂಜೆಗಳನ್ನು ಮಾಡಲು ಅಕ್ಕಪಕ್ಕದ ಗ್ರಾಮಗಳಿಂದಲೂ ತಂಡೋಪತಂಡವಾಗಿ ಜನರು ಬರುತ್ತಿದ್ದಾರೆ.
ಇತ್ತೀಚಿನ ವರ್ಷಗಳಲ್ಲಿ ತಮಿಳುನಾಡಿನಾದ್ಯಂತ ಇದೇ ರೀತಿ ಅನೇಕ ಶಿವಲಿಂಗಗಳು ಪತ್ತೆಯಾಗಿವೆ. ಎರಡು ವರ್ಷಗಳ ಹಿಂದೆ, ಕೊಡಕನಾರು ಮತ್ತು ಅಮರಾವತಿ ನದಿಗಳ ಸಂಗಮದ ಬಳಿಯ ಕೃಷಿ ಭೂಮಿಯಲ್ಲಿ 1000 ವರ್ಷಗಳಷ್ಟು ಹಳೆಯದಾದ ಶಿವಲಿಂಗ ಪತ್ತೆಯಾಗಿತ್ತು. ನಾಲ್ಕು ವರ್ಷಗಳ ಹಿಂದೆ ರಾಮೇಶ್ವರಂನ ರಾಮನಾಥಸ್ವಾಮಿ ದೇವಸ್ಥಾನದ ಪೂರ್ವ ತೀರದಲ್ಲಿ ಶಿವಲಿಂಗ ಪತ್ತೆಯಾಗಿತ್ತು. (ಏಜೆನ್ಸೀಸ್)