ವಾರಾಣಸಿ: ಹೆಣ್ಣು ಅಬಲೆ.. ಒಬ್ಬಳೇ ಬರುತ್ತಿದ್ದಾಳೆ.. ಜತೆಗೆ ಯಾರೂ ಇಲ್ಲ, ಕೈಯಲ್ಲಿ ಆಯುಧದಂಥದ್ದು ಏನೂ ಇಲ್ಲ.. ಎಂದುಕೊಂಡು ಮೈಮೇಲೆ ಎರಗುವವರು, ಆಭರಣಗಳನ್ನು ಎಗರಿಸುವವರು ಇನ್ನು ಹಾಗೇ ಬಚಾವಾಗುವುದು ಅಷ್ಟು ಸುಲಭವಲ್ಲ!
ಏಕೆಂದರೆ ಇಂಥ ಸಂದರ್ಭಗಳನ್ನು ಎದುರಿಸಲೆಂದೇ ಈಗ ವಿಶೇಷವಾದ ಆಯುಧವೊಂದು ಸಿದ್ಧವಾಗಿದೆ. ವಿಶೇಷವೆಂದರೆ ಇದನ್ನು ಯುವತಿಯರೇ ವಿನ್ಯಾಸ ಮಾಡಿದ್ದಾರೆ. ವಾರಾಣಸಿಯ ಅಶೋಕ ಇನ್ಸ್ಟಿಟ್ಯೂಟ್ ಆಫ್ ಕಂಪ್ಯೂಟರ್ ಸೈನ್ಸ್ನ ಶಾಲಿನಿ ಹಾಗೂ ದೀಕ್ಷಾ ಎಂಬ ವಿದ್ಯಾರ್ಥಿನಿಯರಿಬ್ಬರು ಇದನ್ನು ರೂಪಿಸಿದ್ದಾರೆ.
'ಸ್ಮಾರ್ಟ್ ನೈಫ್' ಎಂದು ಹೆಸರಿಡಲಾಗಿರುವ ಇದು ನೋಡಲು ಆಭರಣದಂತೆ ಕಂಡರೂ ಸಣ್ಣ ಚಾಕುವೊಂದನ್ನು ಒಳಗೊಂಡಿರುತ್ತದೆ. ಮಾತ್ರವಲ್ಲ ಇದರೊಳಗೊಂದು ಸಿಮ್ ಕೂಡ ಅಡಕವಾಗಿರುತ್ತದೆ. ಮಹಿಳೆಯರ ಮೇಲಿನ ದೌರ್ಜನ್ಯ ಹಾಗೂ ಅತ್ಯಾಚಾರದಂಥ ಪ್ರಕರಣಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಇವರು ಈ ಸ್ಮಾರ್ಟ್ ನೈಫ್ ತಯಾರಿಸಿದ್ದಾರೆ.
ನೆಕ್ಲೇಸ್ನಂಥ ಆಭರಣದೊಳಗೆ 70 ಗ್ರಾಂ ತೂಕದ ಸಣ್ಣ ಚಾಕುವೊಂದನ್ನು ಅಳವಡಿಸಲಾಗಿರುತ್ತದೆ. ಮಹಿಳೆ ಈ ಆಭರಣದಿಂದ ಚಾಕುವನ್ನು ತೆಗೆಯುತ್ತಿದ್ದಂತೆ ಮೊದಲೇ ಫೀಡ್ ಮಾಡಲಾಗಿರುವ ಮೂರು ಮೊಬೈಲ್ಫೋನ್ ನಂಬರ್ಗಳಿಗೆ ಆ ಕ್ಷಣದಲ್ಲಿ ಆಕೆ ಇರುವ ಸ್ಥಳದ ಮಾಹಿತಿ ಸಹಿತ ಸಂದೇಶ ರವಾನೆ ಆಗುತ್ತದೆ. ಆಗ ಸಂಬಂಧಿತರು ಹಾಗೂ ಪೊಲೀಸರು ರಕ್ಷಣೆಗೆ ಧಾವಿಸಬಹುದು. ಯಾರಾದರೂ ಕದಿಯಲು ಮುಂದಾದಾಗ, 'ಇರು.. ನನಗೇನೂ ಮಾಡಬೇಡ, ಸರ ತಾನೇ? ನಾನೇ ಬಿಚ್ಚಿ ಕೊಡುತ್ತೇನೆ' ಎಂದು ಅಥವಾ ಯಾರಾದರೂ ಲೈಂಗಿಕ ಶೋಷಣೆಗೆ ಮುಂದಾದಲ್ಲಿ ಸರದ ಆಮಿಷ ತೋರಿ, ಚಾಕು ತೆಗೆದರೆ ಸಾಕು.. ಬಚಾವಾಗಬಹುದು. ರೇಡಿಯೊ ತರಂಗಾಂತರ ಹಾಗೂ ಬ್ಲೂಟೂತ್ ತಂತ್ರಜ್ಞಾನದ ಮೂಲಕ ಇದು ಕಾರ್ಯನಿರ್ವಹಿಸುತ್ತದೆ. 1500 ರೂಪಾಯಿಯಲ್ಲಿ ಸಿಗಬಹುದಾದ ಈ ಸ್ಮಾರ್ಟ್ ನೈಫ್ ವಿನ್ಯಾಸಕ್ಕೆ ಒಂದು ತಿಂಗಳ ಕಾಲ ತಗುಲಿತು ಎನ್ನುತ್ತಾರೆ ಶಾಲಿನಿ, ದೀಕ್ಷಾ. (ಏಜೆನ್ಸೀಸ್)