ಎನ್.ಆರ್.ಪುರ: ಮಕ್ಕಳಿಗೆ ಲೈಂಗಿಕ ಕಿರುಕುಳ ನೀಡಿದ ಪ್ರಕರಣದಡಿ ತಲೆಮರೆಸಿಕೊಂಡಿದ್ದ ಸರ್ಕಾರಿ ಶಾಲೆಯ ದೈಹಿಕ ಶಿಕ್ಷಣ ಶಿಕ್ಷಕರೊಬ್ಬರನ್ನ ಪೊಲೀಸರು ಬಂಧಿಸಿದ್ದಾರೆ. ಈ ಆರೋಪಿ ವಿರುದ್ಧ ದಾಖಲಾದ ಕೇಸ್ ಒಂದಲ್ಲ, ಎರಡಲ್ಲ ಬರೋಬ್ಬರಿ 11 ಪ್ರಕರಣ!
ಶಿಕ್ಷಕ ಪ್ರಭು ನಾಯ್ಕ ಬಂಧಿತ. ಈತನ ವಿರುದ್ಧ ಬಿಇಒ ದೂರು ನೀಡಿದ್ದರು. ಜ.16ರ ಬೆಳಗ್ಗೆಯಿಂದಲೇ ಶಾಲೆಗೆ ಎಎಸ್ಪಿ ಶ್ರುತಿ ನೇತೃತ್ವದ ತಂಡ ಭೇಟಿ ನೀಡಿ ತನಿಖೆ ನಡೆಸಿ ಮಾಹಿತಿ ಸಂಗ್ರಹಿಸಿತ್ತು. ಸಂಜೆ ವೇಳೆಗೆ ಶಾಲೆಗೆ ಎಸ್ಪಿ ಎಂ.ಎಚ್. ಅಕ್ಷಯ್ ಭೇಟಿ ನೀಡಿ ತನಿಖಾ ವರದಿ ಪರಿಶೀಲಿಸಿದ್ದರು. ನಂತರ ಶಿಕ್ಷಕನ ವಿರುದ್ಧ 11 ಎಫ್ಐಆರ್ಗಳು ದಾಖಲಾಗಿದ್ದವು. ಶಿಕ್ಷಕನ ಬಂಧನಕ್ಕೆ ಬಲೆ ಬೀಸಿದ್ದ ಪೊಲೀಸರು ಐದಾರು ದಿನಗಳಿಂದ ಜಿಲ್ಲೆ ಮತ್ತು ಹೊರ ಜಿಲ್ಲೆಗಳಲ್ಲಿ ಶೋಧ ಕಾರ್ಯ ನಡೆಸಿದ್ದರು. ಶುಕ್ರವಾರ ಖಚಿತ ಮಾಹಿತಿ ಮೇರೆಗೆ ಶಿಕ್ಷಕನನ್ನು ತರೀಕೆರೆಯಲ್ಲಿ ಬಂಧಿಸಿದರು.
ಶಿಕ್ಷಕನ ದೂರವಾಣಿ ಹಾಗೂ ಆತ ಎನ್.ಆರ್.ಪುರದಿಂದ ತೆರಳಿದ್ದ ಬಗ್ಗೆ ಪಟ್ಟಣದ ಹಲವು ಸಿಸಿ ಕ್ಯಾಮರಾಗಳಲ್ಲಿ ಪರಿಶೀಲಿಸಿದಾಗ ಆರೋಪಿಯು ವಾಹನದಲ್ಲಿ ಬೇರೊಬ್ಬರಿಂದ ಡ್ರಾಪ್ ತೆಗೆದುಕೊಂಡಿರುವ ಮಾಹಿತಿ ಲಭ್ಯವಾಯಿತು. ಇದನ್ನು ಆಧರಿಸಿ ಹೊರಟ ಪೊಲೀಸರು ತರೀಕೆರೆಯಲ್ಲಿ ಆರೋಪಿಯನ್ನ ಬಂಧಿಸಿದ್ದಾರೆ.