ಬೆಂಗಳೂರು: ಕರ್ನಾಟಕದ ರಾಜ್ಯಪಾಲ ಥಾವರಚಂದ್ ಗೆಹಲೋತ್ ಅವರು ಕನ್ನಡ ಕಲಿಯಲು ಮುಂದಡಿ ಇಟ್ಟಿದ್ದು, ಕನ್ನಡ ಕಲಿಕೆಗಾಗಿ ವಿವಿಧ ನಿಘಂಟುಗಳನ್ನು ತರಿಸಿಕೊಂಡಿದ್ದಾರೆ.
ಥಾವರಚಂದ್ ಗೆಹಲೋತ್ ಮಧ್ಯಪ್ರದೇಶದ ಮೂಲದವರು, ಕರ್ನಾಟಕ ರಾಜ್ಯದ ರಾಜ್ಯಪಾಲರಾಗಿ ಜುಲೈ 11 ರಂದು ಅಧಿಕಾರ ಸ್ವೀಕರಿಸಿದ ಗೆಹಲೋತ್ ಅವರು, ಆಗಿನಿಂದಲೂ ಸದ್ದಿಲ್ಲದೆ ಕನ್ನಡ ಕಲಿಕೆಯನ್ನು ಆರಂಭಿಸಿದ್ದಾರೆಂದು ರಾಜಭವನದ ಮೂಲಗಳು ಹೇಳಿವೆ.
ಹಿಂದಿನ ರಾಜ್ಯಪಾಲರಾದ ವಜೂಬಾಯಿ ವಾಲಾ ಅವರು ರಾಜಭವನವನ್ನು ಸಂಪೂರ್ಣ ಹಿಂದಿಮಯ ಮಾಡಿದ್ದರು. ಈ ಹಿಂದೆ ರಾಜ್ಯಪಾಲರಾಗಿದ್ದ ವಿ.ಎಸ್. ರಮಾದೇವಿ ಅವರು ಕನ್ನಡದಲ್ಲಿಯೇ ಮಾತನಾಡುತ್ತಿದ್ದರು. ಎಚ್.ಆರ್. ಭಾರದ್ವಾಜ್ ರಾಜ್ಯಪಾಲರಾಗಿ ಬಂದ ಆರಂಭದಲ್ಲಿ ಕನ್ನಡ ಕಲಿಯುವುದಾಗಿ ಹೇಳಿಕೊಂಡಿದ್ದರು. ಆದರೆ, ಆ ಪ್ರಯತ್ನ ಮಾಡಲಿಲ್ಲ. ಈಗ ಗೆಹಲೋತ್ ಅವರು ಕನ್ನಡ ಕಲಿಕೆಗಾಗಿ ವಿವಿಧ ನಿಘಂಟುಗಳನ್ನು ತರಿಸಿಕೊಂಡಿದ್ದಾರೆ.
ರಾಜಭವನದ ಅಧಿಕಾರಿ ಮತ್ತು ಸಿಬ್ಬಂದಿಯಿಂದ ಹೊಸಹೊಸ ಪದಗಳನ್ನು ಕೇಳಿ ತಿಳಿದುಕೊಂಡು ಕಲಿಯುವ ಪ್ರಯತ್ನ ಆರಂಭಿಸಿದ್ದಾರೆ. ರಾಜ್ಯದಲ್ಲಿನ ಸಭೆ, ಸಮಾರಂಭಗಳಲ್ಲಿ ಕನ್ನಡದಲ್ಲಿಯೇ ಮಾತನಾಡುವಂತಾಗಬೇಕು ಎಂಬುದು ರಾಜ್ಯಪಾಲರ ಆಸೆ ಎಂಬುದು ಮೂಲಗಳ ಮಾಹಿತಿ.