ಗಜೇಂದ್ರಗಡ: 3 ತಿಂಗಳ ಮಗು ಹಾಗೂ ಪತ್ನಿಗೆ ನೇಣುಬಿಗಿದು ಬಳಿಕ ಗಂಡನೂ ನೇಣಿಗೆ ಕೊರಳೊಡ್ಡಿ ಮೃತಪಟ್ಟ ಧಾರುಣ ಘಟನೆ ಗದಗ ಜಿಲ್ಲೆ ಗಜೇಂದ್ರಗಡ ತಾಲೂಕಿನ ನಾಗೇಂದ್ರಗಡ ಗ್ರಾಮದಲ್ಲಿ ಬುಧವಾರ ರಾತ್ರಿ ನಡೆದಿದೆ.
ಗ್ರಾಮದ ಮಲ್ಲಪ್ಪ ಗಡಾದ(30), ಇವರ ಪತ್ನಿ ಸುಧಾ(24) ಹಾಗೂ 3 ತಿಂಗಳ ಮಗು ರೂಪಾಶ್ರೀ ಮೃತ ದುರ್ದೈವಿಗಳು. ಜಮೀನನಲ್ಲಿದ್ದ ಮನೆಯಲ್ಲಿ ಮೂವರ ಶವಗಳು ನೇತಾಡುತ್ತಿದ್ದ ದೃಶ್ಯ ಕಂಡ ಸ್ಥಳೀಯರು ಬೆಚ್ಚಿಬಿದ್ದಿದ್ದಾರೆ. ದೀಪಾವಳಿ ಹಬ್ಬದ ರಾತ್ರಿಯೇ ನಡೆದ ಈ ದುರಂತ ಗ್ರಾಮವನ್ನೇ ಬೆಚ್ಚಿಬೀಳಿಸಿದೆ.
2 ವರ್ಷದ ಹಿಂದೆ ಮಲ್ಲಪ್ಪ ಮತ್ತು ಸುಧಾ ಮದುವೆಯಾಗಿದ್ದರು. ದಂಪತಿಗೆ 3 ತಿಂಗಳ ಹೆಣ್ಣು ಮಗು ಕೂಡ ಇತ್ತು. ಬೆಡ್ ರೂಮ್ನಲ್ಲಿ ಸುಧಾ ಮತ್ತು ಮಗು ಶವ ನೇಣುಬಿಗಿದ ಸ್ಥಿತಿಯಲ್ಲಿ ಇದ್ದರೆ, ಮಲ್ಲಪ್ಪನ ಶವ ಮನೆಯ ಹಾಲ್ನಲ್ಲಿ ನೇತಾಡುತ್ತಿತ್ತು. ಮಲ್ಲಪ್ಪನೇ ಪತ್ನಿ ಹಾಗೂ ಮಗುವನ್ನು ಕೊಂದು ಬಳಿಕ ತಾನೂ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ. ಆತ್ಮಹತ್ಯೆಗೆ ಕೌಟುಂಬಿಕ ಕಲಹವೇ ಕಾರಣ ಎಂದು ಶಂಕಿಸಲಾಗಿದೆ. ಗಜೇಂದ್ರಗಡ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದಾರೆ.