Newborn Baby: ಹುಟ್ಟಿದ ಮಗು ನಿದ್ದೆಯಲ್ಲಿದ್ದಾಗ ಇದ್ದಕ್ಕಿದ್ದಂತೆ ನಗುವುದು, ತುಟಿ ಅಲುಗಾಡಿಸುವುದು, ಮುಖ ಸಿಂಡರಿಸುವುದು ಅಥವಾ ಕೈಕಾಲು ಆಡಿಸುವುದನ್ನು ಪೋಷಕರು ಗಮನಿಸಿರುತ್ತಾರೆ. ಈ ದೃಶ್ಯ ಖುಷಿ ನೀಡೋದು ಸಹಜ. ಆದರೆ ಮಗು ನಿದ್ದೆಯಲ್ಲೇ ಯಾಕೆ ನಗುತ್ತೆ? ಕೈಕಾಲು ಯಾಕೆ ಆಡಿಸುತ್ತೆ? ಇದರ ಹಿಂದೆ ಇರುವ ಕಾರಣ ಏನು?
ನವಜಾತ ಶಿಶುಗಳು ನಿದ್ರೆಯಲ್ಲಿ ನಗುವುದು ಅಥವಾ ಕೈಕಾಲುಗಳನ್ನು ಆಡಿಸುತ್ತಾ ಸನ್ನೆ ಮಾಡುವುದು ಸಂಪೂರ್ಣವಾಗಿ ಸಾಮಾನ್ಯ ಪ್ರಕ್ರಿಯೆಯಾಗಿದೆ. ಮನೆಯಲ್ಲಿ ಹಿರಿಯರು ಮಗು ಹಳೇ ನೆನಪುಗಳನ್ನು ನೆನೆಯುತ್ತಿದೆ ಅಥವಾ ದೇವರೆದುರು ಆಟವಾಡುತ್ತಿದೆ ಎಂದು ಹೇಳುತ್ತಾರಾದರೂ, ವೈಜ್ಞಾನಿಕವಾಗಿ ಇದಕ್ಕೆ ಬೇರೆದೇ ಆದ ಮುಖ್ಯ ಕಾರಣಗಳಿವೆ.
ಮಗು ಹುಟ್ಟಿದ ಆರಂಭದ ದಿನಗಳಲ್ಲಿ ಕಾಣಿಸುವ ನಗು ಸಾಮಾನ್ಯವಾಗಿ ‘ರಿಫ್ಲೆಕ್ಸ್ ಸ್ಮೈಲ್’(Reflex Smile)ಆಗಿರುತ್ತದೆ. ಇದು ಮಗು ಸಂತೋಷದಿಂದ ಉದ್ದೇಶಪೂರ್ವಕವಾಗಿ ನಗೋದಲ್ಲ. ಮೆದುಳು ಮತ್ತು ನರಮಂಡಲದಿಂದ ಮುಖದ ಸ್ನಾಯುಗಳಿಗೆ ಹೋಗುವ ಅಪ್ರಯತ್ನಿತ ಸಂಕೇತಗಳಿಂದ ಈ ನಗು ಕಾಣಿಸಿಕೊಳ್ಳಬಹುದು.
ನವಜಾತ ಶಿಶುಗಳು ಹೆಚ್ಚು ಸಮಯಆ್ಯಕ್ಟಿವ್ ಸ್ಲೀಪ್’ ಅಥವಾ ಆರ್ಇಎಂ (Rapid Eye Movement) ಅಂತದಲ್ಲಿ ಮೆದುಳು ಸಕ್ರಿಯವಾಗಿರುವುದರಿಂದ ಕಣ್ಣು, ತುಟಿ, ಮುಖ ಹಾಗೂ ಕೈಕಾಲುಗಳಲ್ಲಿ ಸಣ್ಣಪುಟ್ಟ ಚಲನೆಗಳು ಕಾಣಿಸಿಕೊಳ್ಳಬಹುದು. ಕೆಲವೊಮ್ಮೆ ಇವು ನಗುವಿನಂತೆ ಕಾಣಿಸುತ್ತವೆ.
ಹುಟ್ಟಿದ ಬಳಿಕ ಮಗುವಿನ ಮೆದುಳು ಮತ್ತು ನರಮಂಡಲ ವೇಗವಾಗಿ ಬೆಳೆಯುತ್ತಿರುತ್ತವೆ. ಹೀಗಾಗಿ ನಿದ್ರೆಯಲ್ಲೂ ಮುಖ, ಬೆರಳು, ಕೈಕಾಲುಗಳಲ್ಲಿ ಸಣ್ಣ ಚಲನೆಗಳು ಆಗೋದು ಸಹಜ. ಸಾಮಾನ್ಯವಾಗಿ ಇದಕ್ಕೆ ಆತಂಕಪಡುವ ಅಗತ್ಯವಿಲ್ಲ.
ನಿದ್ರೆಯಲ್ಲಿ ಕಾಣಿಸುವ ಈ ಸಣ್ಣಪುಟ್ಟ ಮುಖದ ಚಲನೆಗಳು ಮುಂದೆ ಮಗು ಎಚ್ಚರವಾಗಿದ್ದಾಗ ನಗುವುದು ಹಾಗೂ ವಿವಿಧ ಮುಖಭಾವ ತೋರಿಸುವುದನ್ನು ಕಲಿಯುವ ಪ್ರಕ್ರಿಯೆಯ ಭಾಗವಾಗಿರಬಹುದು. ಕೆಲವೊಮ್ಮೆ ಹಾಲು ಕುಡಿದ ನಂತರದ ಜೀರ್ಣಕ್ರಿಯೆ ಅಥವಾ ಗ್ಯಾಸ್ನಿಂದಲೂ ಮುಖದಲ್ಲಿ ನಗುವಿನಂಥ ಭಾವನೆ ಕಾಣಿಸಬಹುದು.
ಸಾಮಾನ್ಯವಾಗಿ 2ರಿಂದ 3 ತಿಂಗಳ ವೇಳೆಗೆ ಮಗು ಪೋಷಕರ ಮುಖ ನೋಡಿದಾಗ ಅಥವಾ ಧ್ವನಿ ಕೇಳಿದಾಗ ಪ್ರತಿಕ್ರಿಯೆಯಾಗಿ ನಗಲು ಶುರು ಮಾಡುತ್ತದೆ. ಇದನ್ನೇ ‘Social Smile’ ಅಂತ ಕರೆಯುತ್ತಾರೆ. ಇದು ಮಗುವಿನ ಸಾಮಾಜಿಕ ಬೆಳವಣಿಗೆಯ ಪ್ರಮುಖ ಹಂತ.
ಸಾಮಾನ್ಯವಾಗಿ ನಿದ್ದೆಯಲ್ಲಿ ಮಗು ನಗುವುದು, ತುಟಿ ಅಲುಗಾಡಿಸುವುದು, ಮುಖ ಸಿಂಡರಿಸುವುದು ಅಥವಾ ಕೈಕಾಲು ಆಡಿಸುವುದು ಸಹಜ. ಇದು ಬಹುತೇಕ ಸಂದರ್ಭಗಳಲ್ಲಿ ಮಗುವಿನ ಮೆದುಳು ಮತ್ತು ನರಮಂಡಲ ಬೆಳೆಯುತ್ತಿರುವುದರ ಭಾಗ.
ಆದರೆ ಚಲನೆಗಳು ಪದೇಪದೇ ಅಥವಾ ತೀವ್ರವಾಗಿ ಕಾಣಿಸಿಕೊಂಡರೆ, ಉಸಿರಾಟದಲ್ಲಿ ತೊಂದರೆ ಅಥವಾ ಬೇರೆ ಅಸಹಜ ಲಕ್ಷಣಗಳು ಕಂಡುಬಂದರೆ ಮಕ್ಕಳ ವೈದ್ಯರನ್ನು ಸಂಪರ್ಕಿಸುವುದು ಒಳ್ಳೆಯದು.