ನವದೆಹಲಿ: ಯಾವುದೇ ಉತ್ಪನ್ನಕ್ಕೆ ರೂಪದರ್ಶಿಯನ್ನು ಆಯ್ಕೆ ಮಾಡುವಾಗ ಯುವತಿಯರನ್ನೇ ಸಾಮಾನ್ಯವಾಗಿ ಆರಿಸಿಕೊಳ್ಳುತ್ತಾರೆ. ಆದರೆ ಇಲ್ಲೊಂದು ಕಡೆ ಸೌಂದರ್ಯವರ್ಧಕ ಉತ್ಪನ್ನವೊಂದಕ್ಕೆ 99ರ ವೃದ್ಧೆಯನ್ನು ಆರಿಸಿಕೊಂಡಿದ್ದಾರೆ. ವಿಶೇಷವೆಂದರೆ ಮೊಮ್ಮಗಳ ಉತ್ಪನ್ನಕ್ಕೆ ಅಜ್ಜಿಯೇ ಬ್ರ್ಯಾಂಡ್ ಅಂಬಾಸಡರ್ ಆಗಿದ್ದಾರೆ.
ಕ್ಯಾಲಿಫೋರ್ನಿಯಾದ ಹೆಲೆನಿ ಸೈಮನ್ ಎಂಬ 99ರ ವೃದ್ಧೆ ಇಂಥದ್ದೊಂದು ಬೆಳವಣಿಗೆ ಮೂಲಕ ವಯಸ್ಸು ಎನ್ನುವುದು ಬರೀ ಒಂದು ಸಂಖ್ಯೆ ಎಂದು ಸಾಬೀತು ಮಾಡಿದ್ದಾರೆ. ಮಾತ್ರವಲ್ಲ, ಇತರರಿಗೂ ಈ ಮೂಲಕ ಪ್ರೇರಣೆಯಾಗಿದ್ದಾರೆ.
ಈಕೆಯ ಮೊಮ್ಮಗಳು ಲೇನಿ ಕ್ರೊವೆಲ್, ತನ್ನ ಕಂಪನಿಯ ಬ್ರ್ಯಾಂಡ್ 'ಸಾಯೀ'ಗೆ ರೂಪದರ್ಶಿಯನ್ನು ಅರಸುತ್ತಿದ್ದಾಗ ಅಜ್ಜಿಯೇ ಸೂಕ್ತ ಎಂಬ ಸಲಹೆ ಹಲವೆಡೆಯಿಂದ ಬಂದಿತ್ತಂತೆ. ಈ ಬಗ್ಗೆ ಅಜ್ಜಿಯನ್ನು ಸಂಪರ್ಕಿಸಿದಾಗ ಆಕೆ ಒಪ್ಪಲಿಲ್ಲ. ಕೊನೆಗೂ ತುಂಬಾ ಮನವರಿಕೆ ಮಾಡಿಸಿ ಒಪ್ಪಿಸಲಾಯಿತು ಎಂದು ಮೊಮ್ಮಗಳು ಹೇಳಿಕೊಂಡಿದ್ದಾಳೆ. (ಏಜೆನ್ಸೀಸ್)