ರಾಷ್ಟ್ರೀಯ ಈಜು: ತನಿಷಿ, ತಾನ್ಯಾ ದಾಖಲೆ; ಕರ್ನಾಟಕಕ್ಕೆ ಮತ್ತೆ 3 ಚಿನ್ನದ ಪದಕ
ಬೆಂಗಳೂರು: ಕರ್ನಾಟಕದ ತನಿಷಿ ಗುಪ್ತಾ ಮತ್ತು ತಾನ್ಯಾ ಷಡಾಕ್ಷರಿ ಅವರು ಅಹಮದಾಬಾದ್ನಲ್ಲಿ ನಡೆಯುತ್ತಿರುವ 79ನೇ ಸೀನಿಯರ್ ರಾಷ್ಟ್ರೀಯ ಈಜು ಚಾಂಪಿಯನ್ಷಿಪ್ನಲ್ಲಿ (Senior National Aquatic Championship) ರಾಷ್ಟ್ರೀಯ ದಾಖಲೆ ಬರೆದಿದ್ದಾರೆ. ಇದರೊಂದಿಗೆ ಕರ್ನಾಟಕ ತಂಡ ಕೂಟದ 4ನೇ ದಿನವಾದ ಶುಕ್ರವಾರ ಮತ್ತೆ 3 ಚಿನ್ನ, 4 ಬೆಳ್ಳಿ ಮತ್ತು 1 ಕಂಚಿನ ಪದಕ ಗೆದ್ದುಕೊಂಡಿದೆ. ಕರ್ನಾಟಕ ಈಗ ಒಟ್ಟು 30 ಪದಕಗಳೊಂದಿಗೆ (13 ಚಿನ್ನ, 10 ಬೆಳ್ಳಿ, 7 ಕಂಚು) ಪದಕಪಟ್ಟಿಯಲ್ಲಿ ಅಗ್ರಸ್ಥಾನ ಭದ್ರಪಡಿಸಿಕೊಂಡಿದೆ.
ತನಿಷಿ ಗುಪ್ತಾ ಮಹಿಳೆಯರ 100 ಮೀ. ಬಟರ್ಫ್ಲೈ ವಿಭಾಗದಲ್ಲಿ 1 ನಿಮಿಷ, 0.07ಸೆಕೆಂಡ್ಗಳಲ್ಲಿ ಈಜಿ ನೂತನ ಕೂಟ ದಾಖಲೆ ಬರೆದು ಚಿನ್ನದ ಪದಕಕ್ಕೆ ಕೊರಳೊಡ್ಡಿದರು. ಬಳಿಕ 100 ಮೀ. ಬ್ಯಾಕ್ಸ್ಟೋಕ್ನಲ್ಲಿ ತನಿಷಿ ಬೆಳ್ಳಿ ಗೆದ್ದರೆ, ರಾಜ್ಯದ ಇನ್ನೋರ್ವ ಈಜುಪಟು ನೀನಾ ವೆಂಕಟೇಶ್ ಕಂಚು ಜಯಿಸಿದರು.
ತಾನ್ಯಾ ಷಡಾಕ್ಷರಿ ಮಹಿಳೆಯರ 400 ಮೀ. ಮೆಡ್ಲೆಯಲ್ಲಿ 4 ನಿಮಿಷ, 56.78 ಸೆಕೆಂಡ್ಗಳಲ್ಲಿ ಸ್ಪರ್ಧೆ ಮುಗಿಸಿ, 2018ರಲ್ಲಿ ರಿಚಾ ಮಿಶ್ರಾ (4ನಿ,59.17ಸೆ) ನಿರ್ಮಿಸಿದ್ದ ದಾಖಲೆ ಮುರಿಯುವ ಮೂಲಕ ಚಿನ್ನ ಒಲಿಸಿಕೊಂಡರು.
ಅನೀಶ್ ಎಸ್. ಗೌಡ ಪುರುಷರ 200 ಮೀ. ಫ್ರೀಸ್ಟೈಲ್ನಲ್ಲಿ ಚಿನ್ನ ಗೆದ್ದರೆ, ದರ್ಶನ್ ಎಸ್. ಬೆಳ್ಳಿ ಗಳಿಸಿದರು. ಎಸ್. ಲಕ್ಷ್ಯ ಮಹಿಳೆಯರ 100 ಮೀ. ಬ್ರೆಸ್ಟ್ಸ್ಟ್ರೊಕ್ನಲ್ಲಿ ಬೆಳ್ಳಿ ಜಯಿಸಿದರು. ಮಿಶ್ರ 4/100 ಮೀ. ಮೆಡ್ಲೆ ರಿಲೇಯಲ್ಲಿ ರಾಜ್ಯ ತಂಡ ಬೆಳ್ಳಿ ಪದಕ ಒಲಿಸಿಕೊಂಡಿತು.