ಮುಂಬೈ: 2024ರ ಲೋಕಸಭಾ ಚುನಾವಣೆಯಲ್ಲಿ ಇಲ್ಲಿಯವರೆಗೆ ಅಂದಾಜು 66.95 ಪ್ರತಿಶತದಷ್ಟು ಮತದಾನವಾಗಿದೆ, ಪ್ರಸ್ತುತ ನಡೆಯುತ್ತಿರುವ ಸಾರ್ವತ್ರಿಕ ಚುನಾವಣೆಗಳ ಮೊದಲ ನಾಲ್ಕು ಹಂತಗಳಲ್ಲಿ ಸರಿಸುಮಾರು 45.1 ಕೋಟಿ ಜನರು ಮತ ಚಲಾಯಿಸಿದ್ದಾರೆ.
ಈ ಬಾರಿಯ ಚುನಾವಣೆಯಲ್ಲಿ 97 ಕೋಟಿಗೂ ಹೆಚ್ಚು ಜನರು ಮತದಾನದ ಹಕ್ಕು ಹೊಂದಿದ್ದಾರೆ. ಒಟ್ಟು ಏಳು ಹಂತಗಳಲ್ಲಿ ಮತದಾನ ನಡೆಯುತ್ತಿದೆ. ಮೊದಲ ಮೂರು ಹಂತಗಳಲ್ಲಿನ ಮತದಾನವು 2019 ಕ್ಕಿಂತ ಕಡಿಮೆಯಿದ್ದರೆ, ನಾಲ್ಕನೇ ಹಂತದಲ್ಲಿ ಏರಿಕೆ ಕಂಡುಬಂದಿದೆ.
ಚುನಾವಣಾ ಪ್ರಾಧಿಕಾರದ ಪ್ರಕಾರ, ಮೇ 13 ರಂದು ನಡೆದ ನಾಲ್ಕನೇ ಹಂತದಲ್ಲಿ ಮತದಾನದ ಪ್ರಮಾಣವು ಶೇಕಡಾ 69.16 ರಷ್ಟಿದೆ. ಇದು 2019ರ ಸಂಸತ್ತಿನ ಚುನಾವಣೆಗೆ ಹೋಲಿಸಿದರೆ ಶೇಕಡಾ 3.65 ರಷ್ಟು ಹೆಚ್ಚಾಗಿದೆ. ಲೋಕಸಭೆ ಚುನಾವಣೆಯ ಮೂರನೇ ಹಂತದಲ್ಲಿ ಶೇಕಡಾ 65.68ರಷ್ಟು ಮತದಾನವಾಗಿದೆ. 2019ರ ಸಾರ್ವತ್ರಿಕ ಚುನಾವಣೆಯ ಮೂರನೇ ಹಂತದಲ್ಲಿ ಶೇಕಡಾ 68.4ರಷ್ಟು ಮತದಾನವಾಗಿತ್ತು.
ಏಪ್ರಿಲ್ 26 ರಂದು ನಡೆದ ಎರಡನೇ ಹಂತದ ಚುನಾವಣೆಯಲ್ಲಿ, ಶೇಕಡಾ 66.71 ಮತದಾನವಾಗಿದೆ. 2019 ರಲ್ಲಿ ಎರಡನೇ ಹಂತದಲ್ಲಿ ಶೇಕಡಾ 69.64 ಮತದಾನವಾಗಿತ್ತು.
ಪ್ರಸ್ತುತ ಸಾರ್ವತ್ರಿಕ ಚುನಾವಣೆಯ ಮೊದಲ ಹಂತದಲ್ಲಿ ಶೇ. 66.14ರಷ್ಟು ಮತದಾನವಾಗಿದೆ. 2019ರ ಚುನಾವಣೆಯಲ್ಲಿ ಮೊದಲ ಹಂತದಲ್ಲಿ ಶೇ. 69.43ರಷ್ಟು ಮತದಾನವಾಗಿತ್ತು.
ಈಗ, ಉಳಿದ ಮೂರು ಹಂತದ ಚುನಾವಣೆಗಳಲ್ಲಿ (ಮೇ 20, ಮೇ 25 ಮತ್ತು ಜೂನ್ 1) ಮತದಾನದ ಪ್ರಮಾಣವನ್ನು ಹೆಚ್ಚಿಸಲು ಆಯೋಗವು ಸಂಸತ್ತಿನ ಚುನಾವಣೆಯ ಉಳಿದ ಹಂತಗಳಲ್ಲಿ ಮತದಾರರಿಗೆ ತಿಳಿಸಲು, ಪ್ರೇರೇಪಿಸಲು ಮತ್ತು ಅನುಕೂಲ ಮಾಡಲು ಗಮನವನ್ನು ನೆಟ್ಟಿದೆ. ಈ ನಿಟ್ಟಿನಲ್ಲಿ ಕ್ರಮಗಳನ್ನು ಹೆಚ್ಚಿಸುವಂತೆ ರಾಜ್ಯ ಮುಖ್ಯ ಚುನಾವಣಾಧಿಕಾರಿಗಳಿಗೆ ತಿಳಿಸಲಾಗಿದೆ.