ಬೆಂಗಳೂರು: ಸರ್ಕಾರದ ಮೋನೋಗ್ರಾಮ್ ಬಳಸಿ ನಕಲಿ ಪಾನ್ ಕಾರ್ಡ್, ಆಧಾರ್ ಕಾರ್ಡ್, ಆರ್ಸಿ ಬುಕ್ ಮತ್ತು ವೋಟರ್ ಐಡಿ ತಯಾರಿಸುತ್ತಿದ್ದ ಬೃಹತ್ ‘ನಕಲಿ ಜಾಲ’ವನ್ನು ಬಲೆಗೆ ಕೆಡವಿರುವ ಸಿಸಿಬಿ ಬರೋಬ್ಬರಿ 65 ಸಾವಿರ ನಕಲಿ ಐಡಿ ಕಾರ್ಡ್ ವಶಪಡಿಸಿಕೊಂಡು 11 ಆರೋಪಿಗಳನ್ನು ಬಂಧಿಸಿದೆ. 2018ರಲ್ಲಿ ರಾಜರಾಜೇಶ್ವರಿನಗರದಲ್ಲಿ ಬೆಳಕಿಗೆ ಬಂದಿದ್ದ ನಕಲಿ ವೋಟರ್ ಐಡಿ ಪ್ರಕರಣ ಹಾಗೂ ಇತ್ತೀಚೆಗೆ ನಡೆದ ಗ್ರಾಮ ಪಂಚಾಯಿತಿ ಚುನಾವಣೆಯಲ್ಲೂ ಬಂಧಿತ ಆರೋಪಿಗಳ ಪಾತ್ರವಿರುವ ಬಗ್ಗೆ ಶಂಕೆ ಮೂಡಿದೆ. ಈ ಸಂಬಂಧ ತನಿಖೆ ನಡೆಸುವಂತೆ ರಾಜ್ಯ ಚುನಾವಣಾ ಆಯೋಗಕ್ಕೆ ಪೊಲೀಸರು ಪತ್ರ ಬರೆದಿದ್ದಾರೆ. ಬಂಧಿತರ ಮನೆಗಳ ಮೇಲೆ ಸರಣಿ ದಾಳಿ ನಡೆಸಿದಾಗ ಎಲ್ಲ ನಕಲಿ ಕಾರ್ಡ್ಗಳು ಪತ್ತೆಯಾಗಿವೆ.
ಸಾರಿಗೆ ಇಲಾಖೆಯ ಕಾರ್ಡ್ಗಳ ಮುದ್ರಣದ ಗುತ್ತಿಗೆ ಪಡೆದಿರುವ ಕಂಪನಿಯ ಹಾಲಿ ಹಾಗೂ ಮಾಜಿ ನೌಕರರು ಜಾಲದಲ್ಲಿ ಭಾಗಿಯಾಗಿರುವುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ. ಆರೋಪಿಗಳ ಬಳಿ 34 ಸಾವಿರ ನಕಲಿ ಚುನಾವಣಾ ಗುರುತಿನ ಚೀಟಿಗಳು ಪತ್ತೆಯಾಗಿರುವುದರಿಂದ ಚುನಾವಣೆಯಲ್ಲಿ ನಕಲಿ ಮತದಾರರು ಮತ ಚಲಾಯಿಸಿರುವ ಬಗ್ಗೆಯೂ ಅನುಮಾನ ವ್ಯಕ್ತವಾಗಿದೆ.
ಕನಕಪುರ ರಸ್ತೆ ಗುಬ್ಬಲಾಳದ ನಿತ್ಯ ಹರಿಟೇಜ್ ಅಪಾರ್ಟ್ವೆುಂಟ್ ನಿವಾಸಿ, ಕಿಂಗ್ಪಿನ್ ಕಮಲೇಶ್ ಕುಮಾರ್ ಭವಾಲಿಯಾ (33) ಬಂಧಿತ. ಈತ ಕೊಟ್ಟ ಮಾಹಿತಿ ಮೇರೆಗೆ ಪುಟ್ಟೇನಹಳ್ಳಿಯ ಎಸ್. ಲೋಕೇಶ್ (37), ಶಾಂತಿನಗರದ ಸುದರ್ಶನ್ (50), ನಿರ್ಮಲ್ಕುಮಾರ್ (56), ಕೆಂಗೇರಿಯ ದರ್ಶನ್ (25), ಹಾಸನ ಜಿಲ್ಲೆ ಗವೇನಹಳ್ಳಿಯ ಶ್ರೀಧರ್(31), ಜ್ಞಾನಭಾರತಿಯ ಕೆಂಚನಪುರ ಕ್ರಾಸ್ನ ಚಂದ್ರಪ್ಪ (28), ವಿಜಯನಗರದ ಅಭಿಲಾಷ್ (27), ಸರಸ್ವತಿನಗರದ ಶ್ರೀಧರ್ ದೇಶಪಾಂಡೆ (35), ಬಸವೇಶ್ವರನಗರದ ತೇಜಸ್ (30) ಮತ್ತು ಲೋಹಿತ್(29)ರನ್ನು ಬಂಧಿಸಲಾಗಿದೆ.
ಹೇಗಿತ್ತು ಕಾರ್ಯಾಚರಣೆ?: ರಾಜಸ್ಥಾನದ ಕಮಲೇಶ್, ಸರ್ವಿಸ್ ಇಂಜಿನಿಯರ್ ಆಗಿದ್ದು, ಮುಂಬೈನಲ್ಲಿ ಕೆಲಸ ಮಾಡಿದ್ದ. ಆನಂತರ ಬೆಂಗಳೂರಿಗೆ ಬಂದು ಫ್ಲಾ್ಯಟ್ನಲ್ಲಿ ನೆಲೆಸಿದ್ದ. ಕಂಪನಿಗಳಿಗೆ ಸರ್ವಿಸ್ಗೆ ಹೋದಾಗ ಇತರ ಆರೋಪಿಗಳು ಪರಿಚಯವಾಗಿದ್ದರು. ಸಾರಿಗೆ ಇಲಾಖೆಯಲ್ಲಿ ಅರ್ಸಿ ಕಾರ್ಡ್, ಡಿಎಲ್ ಸೇರಿ ಇನ್ನಿತರ ಕಾರ್ಡ್ಗಳನ್ನು ಮುದ್ರಿಸುವ ಗುತ್ತಿಗೆ ಪಡೆದ ‘ರೋಸ್ವಾರ್ಟ್ ಟೆಕ್ನಾಲಜಿಕ್ಸ್ ಪ್ರೖೆ.ಲಿ. ಕಂಪನಿ’ಯಲ್ಲಿ ನೌಕರರಾದ ಲೋಕೇಶ್ ಮತ್ತು ಲೋಹಿತ್ ಪರಿಚಯವಾಗಿದ್ದು, ಇದೇ ರೀತಿ ಎಲ್ಲರನ್ನು ಒಟ್ಟುಗೂಡಿಸಿ ನಕಲಿ ಗುರುತಿನ ಜಾಲವನ್ನು ಶುರು ಮಾಡಿದ್ದ. ಈ ಕುರಿತು ಸಿಕ್ಕ ಖಚಿತ ಮಾಹಿತಿ ಮೇರೆಗೆ ಸಿಸಿಬಿ ಪೊಲೀಸರು, ಡಿ.30ರಂದು ಕಮಲೇಶ್ಗೆ ಸೇರಿದ ಫ್ಲಾ್ಯಟ್ ಮೇಲೆ ದಾಳಿ ನಡೆಸಿದಾಗ ಸ್ಪೋಟಕ ಮಾಹಿತಿ ಲಭ್ಯವಾಗಿದೆ. ನಕಲಿ ಆಧಾರ್, ಪಾನ್, ಆರ್ಸಿ ಕಾರ್ಡ್ ಮತ್ತು ಸರ್ಕಾರದ ಗುರುತಿನ ಚೀಟಿಗಳನ್ನು ಸಂಗ್ರಹಿಸಿರುವುದು ಪತ್ತೆಯಾಗಿವೆ ಎಂದು ನಗರ ಪೊಲೀಸ್ ಆಯುಕ್ತ ಕಮಲ್ ಪಂತ್ ತಿಳಿಸಿದ್ದಾರೆ.
ಕೇಂದ್ರ ಹಾಗೂ ರಾಜ್ಯ ಸರ್ಕಾರದ ದಾಖಲೆಗಳನ್ನು ನಕಲಿ ಮತ್ತು ಅಕ್ರಮ ದಾಸ್ತಾನು ಮಾಡಿದ್ದ 11 ಮಂದಿಯ ಗ್ಯಾಂಗ್ ಪತ್ತೆಹಚ್ಚಲಾಗಿದೆ. ಇವರಿಗೆ ಸಾಥ್ ಕೊಟ್ಟವರಿಗೂ ಬಲೆಬೀಸಲಾಗಿದೆ. | ಕಮಲ್ ಪಂತ್ ಬೆಂಗಳೂರು ಪೊಲೀಸ್ ಆಯುಕ್ತ
ಕೇಂದ್ರ ಮತ್ತು ರಾಜ್ಯ ಸರ್ಕಾರದ ದಾಖಲೆಗಳನ್ನು ಮುದ್ರಿಸುವ ಗುತ್ತಿಗೆ ಪಡೆದಿರುವ ರೋಸ್ವಾರ್ಟ್ ಟೆಕ್ನಾಲಜಿಕ್ಸ್ ಪ್ರೖೆ.ಲಿ. ಕಂಪನಿಯಲ್ಲಿ ಬಂಧಿತ ಲೋಕೇಶ್ ಮತ್ತು ಲೋಹಿತ್ ಕೆಲಸ ಮಾಡುತ್ತಿದ್ದರು. ಈ ಇಬ್ಬರೂ ಸರ್ಕಾರಕ್ಕೆ ಬರುತ್ತಿದ್ದ ಡೇಟಾವನ್ನು ಕದ್ದು ತಂದು ತಾವೇ ನಕಲಿ ಕಾರ್ಡ್ಗಳನ್ನು ಮುದ್ರಿಸಿ ವಿತರಣೆ ಮಾಡುತ್ತಿದ್ದರು. 2 ವರ್ಷಗಳಿಂದಲೂ ಆರೋಪಿಗಳು ನಕಲಿ ದಂಧೆಯಲ್ಲಿ ತೊಡಗಿದ್ದರು.
2018ರ ರಾಜರಾಜೇಶ್ವರಿನಗರ ವಿಧಾನಸಭಾ ಚುನಾವಣೆ ಸಂದರ್ಭದಲ್ಲಿ ಪತ್ತೆಯಾದ ನಕಲಿ ವೋಟರ್ ಐಡಿ ಪ್ರಕರಣದಲ್ಲಿಯೂ ಕೆಲವರ ಪಾತ್ರ ಇರುವುದು ತಿಳಿದುಬಂದಿದೆ. ಈ ಕುರಿತು ಹೆಚ್ಚಿನ ವಿಚಾರಣೆ ನಡೆಸಲಾಗುತ್ತಿದೆ. ಈ ಪ್ರಕರಣದಲ್ಲಿಯೂ ಹೆಸರು ವಿಳಾಸ ನಮೂದಿಸಿರುವ 6240 ವೋಟರ್ ಐಡಿ, ವಿಳಾಸ ಮುದ್ರಿಸದ 28 ಸಾವಿರ ವೋಟರ್ ಐಡಿ ಪತ್ತೆಯಾಗಿವೆ. ಇತ್ತೀಚೆಗೆ ಅಂತ್ಯವಾದ ಗ್ರಾಮ ಪಂಚಾಯಿತಿ ಚುನಾವಣೆಯಲ್ಲಿ ನಕಲಿ ವೋಟರ್ ಐಡಿ ಬಳಕೆ ಆಗಿರುವ ಬಗ್ಗೆಯೂ ಅನುಮಾನ ವ್ಯಕ್ತವಾಗಿದೆ. ಈ ಕುರಿತು ರಾಜ್ಯ ಚುನಾವಣಾ ಆಯೋಗಕ್ಕೆ ಪೊಲೀಸರು ಪತ್ರ ಬರೆದಿದ್ದಾರೆ.