ನವದೆಹಲಿ : ಕಳೆದ 24 ಗಂಟೆಗಳಲ್ಲಿ ಭಾರತದಲ್ಲಿ 50,848 ಹೊಸ ಕರೊನಾ ಪ್ರಕರಣಗಳು ದಾಖಲಾಗಿದ್ದು, 1,358 ಸಾವು ಸಂಭವಿಸಿವೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯದ ಇಂದು ಬೆಳಗಿನ ವರದಿ ತಿಳಿಸಿದೆ. ನಿನ್ನೆ ವರದಿಯಾಗಿದ್ದ ನಿತ್ಯಪ್ರಕರಣಗಳಿಗಿಂತ ಇದು ಶೇ.19 ರಷ್ಟು ಹೆಚ್ಚಾಗಿದೆ. ಆದರೆ, ಕಳೆದ 24 ಗಂಟೆಗಳಲ್ಲಿ ಸಕ್ರಿಯ ಪ್ರಕರಣಗಳ ಸಂಖ್ಯೆ 19,327 ರಷ್ಟು ಕಡಿಮೆಯಾಗಿದ್ದು, ಪ್ರಸ್ತುತ, ದೇಶದಲ್ಲಿ 6,43,194 ಸಕ್ರಿಯ ಕರೊನಾ ಪ್ರಕರಣಗಳಿವೆ.
ನಿನ್ನೆಯ ದಿನ 68,817 ಕರೊನಾ ರೋಗಿಗಳು ಸೋಂಕಿನಿಂದ ಚೇತರಿಸಿಕೊಂಡಿದ್ದು, ಭಾರತದ ಈವರೆಗಿನ ಚೇತರಿಕೆಯ ಸಂಖ್ಯೆ 2.89 ಕೋಟಿ ತಲುಪಿದೆ. ಕಳೆದ 40 ದಿನಗಳಿಂದ ಪ್ರತಿದಿನ ಸೋಂಕಿನಿಂದ ಚೇತರಿಸಿಕೊಳ್ಳುತ್ತಿರುವವರ ಸಂಖ್ಯೆಯು ಹೊಸ ಪ್ರಕರಣಗಳ ಸಂಖ್ಯೆಗಿಂತ ಹೆಚ್ಚಾಗಿಯೇ ಮುಂದುವರಿದಿದೆ.
ಎಲ್ಲ ವಯಸ್ಕರಿಗೂ ತೆರೆದುಕೊಂಡಿರುವ ಉಚಿತ ಕರೊನಾ ಲಸಿಕಾ ಅಭಿಯಾನದಡಿ, ನಿನ್ನೆ 53.4 ಲಕ್ಷ ಡೋಸ್ ಲಸಿಕೆ ನೀಡಲಾಗಿದೆ ಎಂದು ಆರೋಗ್ಯ ಸಚಿವಾಲಯ ತಿಳಿಸಿದೆ. (ಏಜೆನ್ಸೀಸ್)