ಉತ್ತರಾಖಂಡ: 21 ವರ್ಷದ ಯುವತಿಯೊಬ್ಬಳು ಶ್ರೀಕೃಷ್ಣನ ವಿಗ್ರಹವನ್ನು ವಿವಾಹವಾದಳು. ಈ ಮದುವೆ ಬಗ್ಗೆ ಎಲ್ಲೆಡೆ ಚರ್ಚೆಯಾಗುತ್ತಿದೆ. ಈಕೆ ಮದುವೆ ಫೋಟೋಗಳು ವೈರಲ್ ಆಗುತ್ತಿದ್ದಂತೆ ಸೋಶಿಯಲ್ ಮೀಡಿಯಾದಲ್ಲಿ ಈ ಕುರಿತಾಗಿ ಚರ್ಚೆ ಶುರುವಾಗಿದೆ.
ಶ್ರೀಕೃಷ್ಣನನ್ನು ವರನನ್ನಾಗಿ ಮಾಡಬೇಕೆಂದು ಕಳೆದ 15 ವರ್ಷಗಳಿಂದ ಕರ್ವಾ ಚೌತ್ ಉಪವಾಸ ಮಾಡುತ್ತಿದ್ದ ಹರ್ಷಿಕಾ ಪಂತ್ ಬೆಳಗ್ಗೆ 10.30ಕ್ಕೆ ಸಂಗೀತ ವಾದ್ಯಗಳ ಸಮೇತ ಮದುವೆ ಮೆರವಣಿಗೆಯೊಂದಿಗೆ ಬಂದರು. ಕುಮಾವೋನಿ ಪದ್ಧತಿಯ ಪ್ರಕಾರ, ಶ್ರೀಕೃಷ್ಣನನ್ನು ಬಾಗಿಲಲ್ಲಿ ಸ್ವಾಗತಿಸಲಾಯಿತು, ನಂತರ ಹೂಮಾಲೆ ಹಾಕಿ ಏಳು ಸುತ್ತು ಹಾಕಲಾಯಿತು. ಇಲ್ಲಿ ಏರ್ಪಡಿಸಲಾಗಿದ್ದ ವಿವಾಹ ಸಮಾರಂಭಕ್ಕೆ ಆಗಮಿಸಿದ ಅತಿಥಿಗಳಿಗೆ ಊಟೋಪಚಾರ ಮತ್ತಿತರ ವ್ಯವಸ್ಥೆ ಮಾಡಲಾಗಿತ್ತು. ಯುವತಿ ಶ್ರೀಕೃಷ್ಣನ ವಿಗ್ರಹವನ್ನು ಮದುವೆಯಾದಳು.
ಮದುವೆ ಸಮಾರಂಭಕ್ಕೆ ಆಗಮಿಸಿದ್ದ ಜನರು ಔತಣ ಸೇವಿಸಿ ಹರ್ಷಿಕಾಗೆ ಸುಖಮಯ ಜೀವನ ನಡೆಸುವಂತೆ ಆಶೀರ್ವದಿಸಿದರು. ಆಚರಣೆಯ ಸಮಯದಲ್ಲಿ, ಹರ್ಷಿಕಾ ಏಳು ಜನ್ಮಗಳಿಗೆ ವೃಂದಾವನದಿಂದ ತಂದ ಶ್ರೀ ಕೃಷ್ಣನ ವಿಗ್ರಹದೊಂದಿಗೆ ವಾಸಿಸುವುದಾಗಿ ಪ್ರಮಾಣ ಮಾಡಿದರು.ಜುಲೈ 11 ರಂದು ಅದ್ದೂರಿ ಮದುವೆಗೆ ಮುನ್ನ, ಬುಧವಾರ ಮನೆಯಲ್ಲಿ ಮೆಹಂದಿ ಮತ್ತು ಹಲ್ದಿ ಕಾರ್ಯಕ್ರಮವನ್ನು ನಡೆಸಲಾಯಿತು, ಇದರಲ್ಲಿ ಎಲ್ಲಾ ಸಂಬಂಧಿಕರು ಮತ್ತು ಹತ್ತಿರದ ಜನರು ಭಾಗವಹಿಸಿದ್ದರು.
ಹರ್ಷಿಕಾ ಅವರ ತಂದೆ ಪುರನ್ ಚಂದ್ರ ಪಂತ್ ತಮ್ಮ ಮಗಳನ್ನು ಶ್ರೀಕೃಷ್ಣನಿಗೆ ಮದುವೆ ಮಾಡಿಕೊಟ್ಟಿದ್ದು, ಈಗ ಶ್ರೀಕೃಷ್ಣನೇ ನನ್ನ ಅಳಿಯನಾಗಿದ್ದಾನೆ ಎಂದು ಹೇಳಿದ್ದಾರೆ. ಇಂದಿನಿಂದ ಶ್ರೀಕೃಷ್ಣನು ಮನೆಯಲ್ಲಿ ಪ್ರತ್ಯಕ್ಷನಾಗುತ್ತಾನೆ. ಐದನೇ ತರಗತಿವರೆಗೆ ಓದಿರುವ ಹರ್ಷಿಕಾ ಅಂಗವಿಕಲರಾಗಿದ್ದು, ದೇಹದ ಕೆಳಭಾಗ ಕೆಲಸ ಮಾಡದೇ ದಿನನಿತ್ಯದ ಕೆಲಸಗಳಿಗೆ ಬೇರೆಯವರನ್ನು ಅವಲಂಬಿಸಬೇಕಾಗಿದೆ.