ವಾಷಿಂಗ್ಟನ್: ಅಮೆರಿಕದ ಅಧ್ಯಕ್ಷೀಯ ಚುನಾವಣೆ 2020 ಹಲವು ದಾಖಲೆಗಳನ್ನು ನಿರ್ಮಿಸಿದ್ದು, 120 ವರ್ಷಗಳಲ್ಲೇ ಅತ್ಯಧಿಕ ಮತದಾನ ಪ್ರಮಾಣ ದಾಖಲಾಗಿದೆ ಎಂದು ಫ್ಲೋರಿಡಾ ಯೂನಿರ್ವಸಿಟಿಯ ಪೊಲಿಟಿಕಲ್ ಸೈನ್ಸ್ ಅಸೋಸಿಯೇಟ್ ಪ್ರೊಫೆಸರ್ ಮೈಕಲ್ ಪಿ. ಮೆಕ್ಡೊನಾಲ್ಡ್ ಹೇಳಿದ್ದಾರೆ.
ಯುಎಸ್ ಎಲೆಕ್ಷನ್ ಪ್ರಾಜೆಕ್ಟ್ ಎಂಬ ನಿಷ್ಪಕ್ಷಪಾತ ಚುನಾವಣಾ ಸೈಟ್ನ ಮುಖ್ಯಸ್ಥರಾಗಿದ್ದು, ಚುನಾವಣಾ ದತ್ತಾಂಶಗಳನ್ನು ಸಂಗ್ರಹಿಸಿ ವಿಶ್ಲೇಷಿಸುತ್ತಿದ್ದಾರೆ. ಈ ಚುನಾವಣೆಗೆ 239 ದಶಲಕ್ಷ ಮತದಾರರು ಮತ ಚಲಾಯಿಸಲು ಅರ್ಹತೆ ಪಡೆದುಕೊಂಡಿದ್ದರು. ಪ್ರಾಥಮಿಕ ಅಂದಾಜಿನ ಪ್ರಕಾರ ಈ ಪೈಕಿ 160 ಮತದಾರರು ಮತಚಲಾಯಿಸಿದ್ದಾರೆ. ನವೆಂಬರ್ 3 ರಂದು ನಡೆದ ಚುನಾವಣೆಯಲ್ಲಿ ಶೇಕಡ 66.9 ಮತದಾನವಾಗಿದೆ. ಇದು 1900ನೇ ಇಸವಿಯಿಂದೀಚೆಗೆ ಗರಿಷ್ಠ ಪ್ರಮಾಣದ ಮತದಾನವಾಗಿದೆ. 1900ನೇ ಇಸವಿಯಲ್ಲಿ ನಡೆದ ಚುನಾವಣೆಯಲ್ಲಿ ಗರಿಷ್ಠ ಶೇಕಡ 73.7 ಮತದಾನವಾಗಿತ್ತು ಎಂದು ಎಲೆಕ್ಷನ್ ಪ್ರಾಜೆಕ್ಟ್ ತಿಳಿಸಿದೆ.
ಈ ವರ್ಷದ ಚುನಾವಣೆಯಲ್ಲಿ ಗರಿಷ್ಠ ಮತದಾನವಾಗಿದೆ. ಇದು 120 ವರ್ಷಗಳ ಅವಧಿಯಲ್ಲಿ ಗರಿಷ್ಠ ಪ್ರಮಾಣದ್ದಾಗಿದ್ದು, ನಿಖರ ಲೆಕ್ಕಾಚಾರ ಮುಂದಿನ ದಿನಗಳಲ್ಲಿ ಸಿಗಲಿದೆ. 2016ರಲ್ಲಿ ಶೇಕಡ 56 ಮತದಾನವಾಗಿತ್ತು. 2008ರಲ್ಲಿ ಶೇಕಡ 58 ಮತದಾನವಾಗಿತ್ತು ಎಂದು ಮೆಕ್ಡೊನಾಲ್ಡ್ ಹೇಳಿದ್ದಾರೆ. (ಏಜೆನ್ಸೀಸ್)