ತುಮಕೂರು: ಚಂದನವನದ ರಾಜಕುಮಾರ, ಕೋಟ್ಯಂತರ ಜನರ ಪ್ರೀತಿಯ ಅಪ್ಪು ಅಭಿನಯದ 'ಗಂಧದಗುಡಿ' ಸಾಕ್ಷ್ಯಚಿತ್ರ ನಾಳೆ(ಅ.28) ರಾಜ್ಯಾದ್ಯಂತ ತೆರೆ ಕಾಣಲಿದ್ದು, ಈ ಹಿನ್ನೆಲೆ ಅಪ್ಪು ಅಭಿಮಾನಿಯೊಬ್ಬರು ಗ್ರಾಹಕರಿಗೆ ಉಚಿತ ಹೇರ್ ಕಟಿಂಗ್ ಮಾಡಿದ್ದಾರೆ.
ತುಮಕೂರು ಜಿಲ್ಲೆ ಗುಬ್ಬಿ ತಾಲೂಕಿನ ಕೆಜಿ ಟೆಂಪಲ್ ಗ್ರಾಮದ ಯುವಕ ಪವನ್ಗೆ ಪುನೀತ್ ರಾಜ್ಕುಮಾರ್ ಅಂದ್ರೆ ತುಂಬಾ ಇಷ್ಟ. ಹಾಗಾಗಿ ತನ್ನ ಶಾಪ್ಗೆ ಮಂಗಳವಾರ, ಬುಧವಾರ ಗ್ರಾಹಕರಿಗೆ ಉಚಿತವಾಗಿ ಹೇರ್ ಕಟಿಂಗ್ ಮಾಡಿ ಅಭಿಮಾನ ಮೆರೆದಿದ್ದಾರೆ.
ಕೆಜಿ ಟೆಂಪಲ್ ಗ್ರಾಮದಲ್ಲಿ ತನ್ನ ಸಹೋದರಿಯ ಹೆಸರಿನಲ್ಲಿ ಪವನ್ ಹೇರ್ ಕಟಿಂಗ್ ಸಲೂನ್ ತೆರೆದಿದ್ದಾರೆ. ಇದೇ ಸಲೂನ್ನಲ್ಲಿ ಉಚಿತ ಸೇವೆ ನೀಡಿದ್ದಾರೆ. ಪವನ್ ಕಾರ್ಯಕ್ಕೆ ಮನೆಯವರಿಂದಲೂ ಮೆಚ್ಚುಗೆ ವ್ಯಕ್ತವಾಗಿದೆ. ಪ್ರತಿ ವರ್ಷ ಅಪ್ಪು ಪುಣ್ಯಸ್ಮರಣೆಯ ವೇಳೆ ಉಚಿತ ಹೇರ್ ಕಟಿಂಗ್ ಸೇವೆ ನೀಡುವುದಾಗಿ ಪವನ್ ಹೇಳಿದ್ದಾರೆ.