ನವದೆಹಲಿ: ಗಡಿ ಭದ್ರತಾ ಪಡೆ (ಬಿಎಸ್ಎಫ್) ಮತ್ತು ಭಾರತೀಯ ಕರಾವಳಿ ಕಾವಲು ಪಡೆ (ಐಸಿಜಿ) ಸಿಬ್ಬಂದಿ ಗುಜರಾತ್ನ ಗಡಿ ಔಟ್ಪೋಸ್ಟ್ ಬಿಬಿಕೆ ಬಳಿಯ ಕೋರಿ ಖಾರಿಯಲ್ಲಿ ಶನಿವಾರ ಜಂಟಿ ಕಾರ್ಯಾಚರಣೆ ನಡೆಸಿ ಪಾಕಿಸ್ತಾನದ 15 ಮೀನುಗಾರರನ್ನು ಬಂಧಿಸಿದ್ದಾರೆ. ಹಾಗೂ ಯಂತ್ರ ಅಳವಡಿಸಿದ ನಾಡ ದೋಣಿಯೊಂದನ್ನು ವಶಪಡಿಸಿ ಕೊಂಡಿದ್ದಾರೆ.
ಬಿಎಸ್ಎಫ್ 68ನೇ ಬೆಟಾಲಿಯನ್ನಿಂದ ಸಿಕ್ಕ ಖಚಿತ ಬೇಹುಗಾರಿಕೆ ಮಾಹಿತಿ ಮೇರೆಗೆ ಕೋರಿ ಕೊಲ್ಲಿಯ ಪ್ರದೇಶದಲ್ಲಿ ಶೋಧ ಕಾರ್ಯಾಚರಣೆ ಆರಂಭಿಸಲಾಗಿತ್ತು. ಗುಜರಾತ್ನ ಕಛ್ ವಲಯದ ಭಾರತ-ಪಾಕಿಸ್ತಾನ ಜಲ ಸೀಮೆಯ ಬಳಿ ಈ ಪ್ರದೇಶವಿದೆ. ಬಿಎಸ್ಎಫ್ ಮತ್ತು ಐಸಿಜಿ ಜಂಟಿ ತಂಡ ಲಕ್ಕಿ ನಾಲಾ ಜೆಟ್ಟಿಯಿಂದ ಎಫ್ಎಸಿ ಪ್ರಹಾರ್ ನೌಕೆಯಲ್ಲಿ ತೆರಳಿದ್ದರು. ಇತರ ಮೂರು ನೌಕೆಗಳೂ ಅವರಿಗೆ ಬೆಂಬಲವಾಗಿದ್ದವು.