ಪಟನಾ: ನೇಪಾಳಿ ಪೊಲೀಸರ ಗುಂಡಿನ ದಾಳಿಗೆ ಭಾರತೀಯ ನಾಗರಿಕನೋರ್ವ ಗಂಭೀರ ಗಾಯಗೊಂಡಿದ್ದಾರೆ.
ಬಿಹಾರದ ಕಿಶಂಗಂಜ್ನಲ್ಲಿರುವ ಭಾರತ-ಚೀನಾ ಗಡಿ ಪ್ರದೇಶದಲ್ಲಿ ಶನಿವಾರ ಸಂಜೆ ನೇಪಾಳಿ ಪೊಲೀಸರು ಒಟ್ಟು ಮೂವರು ಭಾರತೀಯ ನಾಗರಿಕರತ್ತ ಗುಂಡು ಹಾರಿಸಿದ್ದಾರೆ. ಗಾಯಗೊಂಡ ವ್ಯಕ್ತಿಯನ್ನು ಆಸ್ಪತ್ರೆಗೆ ದಾಖಲು ಮಾಡಲಾಗಿದ್ದು, ಅವರ ಪರಿಸ್ಥಿತಿ ಗಂಭೀರವಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.
ಗಾಯಗೊಂಡ ವ್ಯಕ್ತಿಯನ್ನು ಜಿತೇಂದ್ರ ಕುಮಾರ್ (25)ಎಂದು ಗುರುತಿಸಲಾಗಿದೆ. ಜಿತೇಂದ್ರ ಕುಮಾರ್ ಸೇರಿ ಒಟ್ಟು ಮೂವರು ಶನಿವಾರ ಸಂಜೆ 7.40ರ ಹೊತ್ತಿಗೆ ತಮ್ಮ ಜಾನುವಾರುಗಳನ್ನು ಹುಡುಕುತ್ತ ನೇಪಾಳ ಗಡಿಯಲ್ಲಿರುವ ತೊಲಾ ಮಫಿ ಗ್ರಾಮಕ್ಕೆ ಹೋಗಿದ್ದರು. ಇದನ್ನೂ ಓದಿ: ಗೋವಾದ ಖಾಸಗಿ ಆಸ್ಪತ್ರೆಯಲ್ಲಿ ನಾಳೆಯಿಂದ ‘ಕೊವಾಕ್ಸಿನ್’ ಲಸಿಕೆ ಮಾನವರ ಮೇಲಿನ ಪ್ರಯೋಗ ಪ್ರಾರಂಭ
ಗ್ರಾಮದ ಹೊರವಲಯದಲ್ಲಿರುವ ಗದ್ದೆಯಲ್ಲಿ ಓಡಾಡುತ್ತ ಜಾನುವಾರುಗಳನ್ನು ಹುಡುಕುತ್ತಿರುವಾಗ, ಗಡಿ ಕಾಯುತ್ತಿದ್ದ ಪೊಲೀಸರು ಅವರೆಡೆಗೆ ಗುಂಡು ಹಾರಿಸಿದ್ದಾರೆ. ಮೂವರಲ್ಲಿ ಜಿತೇಂದ್ರ ಕುಮಾರ್ ತೀವ್ರವಾಗಿ ಗಾಯಗೊಂಡಿದ್ದಾರೆ. ನಂತರ ಗಡಿ ಪ್ರದೇಶದಲ್ಲಿದ್ದ ಭಾರತೀಯ ಪೊಲೀಸ್ ಅಧಿಕಾರಿಗಳಿಗೂ ವಿಷಯ ತಿಳಿಸಲಾಗಿದೆ.
ಕಳೆದ ತಿಂಗಳು ಕೂಡ ಭಾರತ-ನೇಪಾಳ ಗಡಿಯಲ್ಲಿ ಇಂಥದ್ದೇ ಒಂದು ಘಟನೆ ನಡೆದಿತ್ತು. ನೇಪಾಳಿ ಪೊಲೀಸರ ಗುಂಡಿಗೆ ಭಾರತೀಯ ನಾಗರಿಕನೋರ್ವ ಬಲಿಯಾಗಿದ್ದ. (ಏಜೆನ್ಸೀಸ್)